சென்னை உள்ளிட்ட பல்வேறு மாவட்டங்களில் தொடரும் மிதமான மழை.. வெப்பநிலை எப்படி இருக்கும் ?

ஜூன் 14, 2026: தமிழகத்தில் சென்னை, செங்கல்பட்டு, திருவள்ளூர் உள்ளிட்ட மாவட்டங்களில் கடந்த சில வாரங்களாக வெயில் கொளுத்தி வந்த சூழலில், கடந்த இரண்டு நாட்களாக பல்வேறு பகுதிகளில் மிதமான மழை பதிவாகி வருகிறது. இதன் காரணமாக வெப்பநிலையின் தாக்கம் கணிசமாக குறைந்துள்ளது. அதிகபட்ச வெப்பநிலையைப் பொறுத்தவரையில், கடந்த 24 மணி நேரத்தில் மதுரையில் 38 டிகிரி செல்சியஸ் வெப்பநிலை பதிவாகியுள்ளது. அதனைத் தொடர்ந்து தஞ்சையில் 38 டிகிரி செல்சியஸ், நாகையில் 39 டிகிரி செல்சியஸ், கடலூரில் 37.8 டிகிரி செல்சியஸ் வெப்பநிலை பதிவாகியுள்ளது.

சென்னையைப் பொறுத்தவரையில், அதிகபட்சமாக மீனம்பாக்கத்தில் 33.5 டிகிரி செல்சியஸும், நுங்கம்பாக்கத்தில் 33.8 டிகிரி செல்சியஸ் வெப்பநிலையும் பதிவாகியுள்ளது. வரக்கூடிய நாட்களில் வெப்பநிலையில் பெரிய அளவு மாற்றம் இருக்காது எனவும், வட உள் தமிழகத்தில் மட்டும் சற்று உயரக் கூடும் எனவும் தெரிவிக்கப்பட்டுள்ளது.

 சென்னை உள்ளிட்ட மாவட்டங்களுக்கு மழை எச்சரிக்கை:

சென்னை மற்றும் புறநகர் பகுதிகளைப் பொறுத்தவரையில், வானம் பொதுவாக மேகமூட்டத்துடன் காணப்படும். அதே சமயத்தில், நகரின் பல்வேறு பகுதிகளில் இடி மின்னலுடன் கூடிய லேசான முதல் மிதமான மழை பதிவாகக் கூடும் எனவும் தெரிவிக்கப்பட்டுள்ளது. அதிகபட்ச வெப்பநிலையைப் பொறுத்தவரையில், 36 டிகிரி செல்சியஸை ஒட்டியும், குறைந்தபட்ச வெப்பநிலை 29 டிகிரி செல்சியஸை ஒட்டியும் இருக்கக் கூடும் என தெரிவிக்கப்பட்டுள்ளது.

மேலும் படிக்க: டாஸ்மாக் காலி பாட்டில் திரும்பப் பெறும் தானியங்கி இயந்திரங்கள் அறிமுகம் – எப்படி வேலை செய்யும்?

ஜூன் 13 மற்றும் 14 ஆகிய இரண்டு நாட்களுக்கு மேற்கு தொடர்ச்சி மலை மாவட்டங்கள், டெல்டா மாவட்டங்கள் மற்றும் வட உள் தமிழகத்தில் ஒரு சில இடங்களில் இடி மின்னல் மற்றும் பலத்த காற்றுடன் கூடிய மிதமான மழை பெய்யக்கூடும் எனவும், ஏனைய தமிழகம் முழுவதும் லேசான முதல் மிதமான மழை இருக்கக் கூடும் எனவும் கணிக்கப்பட்டுள்ளது.

எத்தனை நாட்களுக்கு மழை இருக்கும்?

அதேபோல், ஜூன் 15ஆம் தேதியைப் பொறுத்தவரையில், மேற்கு தொடர்ச்சி மலை மாவட்டங்கள் மற்றும் டெல்டா மாவட்டங்களில் மிதமான மழை இருக்கக் கூடும் என தெரிவிக்கப்பட்டுள்ளது. அதனைத் தொடர்ந்து வரக்கூடிய ஜூன் 18ஆம் தேதி வரை தமிழகத்தில் ஒரு சில இடங்களில் மிதமான மழைக்கு வாய்ப்பு இருப்பதாக குறிப்பிடப்பட்டுள்ளது.

தமிழகத்தில் கடந்த சில நாட்களாக டெல்டா மற்றும் மேற்கு தொடர்ச்சி மலை மாவட்டங்களில் கனமழை கொட்டி வந்த சூழலில், தற்போது அது படிப்படியாக குறைந்து இருப்பதும் குறிப்பிடத்தக்கது.