27 மாவட்டங்களுக்கு கனமழை எச்சரிக்கை.. சென்னையில் மழைக்கு வாய்ப்பா?

ஜூன் 19, 2026: தமிழகத்தில் கடந்த சில நாட்களாக அதிகபட்ச வெப்பநிலை சென்னையில் பதிவாகி வருகிறது. அந்த வகையில், கடந்த 24 மணி நேரத்தில் சென்னையில் அதிகபட்சமாக 38.5 டிகிரி செல்சியஸ் வெப்பநிலை பதிவாகியுள்ளது. அதனைத் தொடர்ந்து, பாளையங்கோட்டையில் 37.9 டிகிரி செல்சியஸ் மற்றும் மதுரையில் 37 டிகிரி செல்சியஸ் வெப்பநிலை பதிவாகியுள்ளது. கடந்த சில நாட்களாக பல்வேறு மாவட்டங்களில் 40 டிகிரி செல்சியஸ் வரை வெப்பநிலை பதிவாகி வந்த சூழலில், தற்போது அது கணிசமாகக் குறைந்துள்ளது. பல்வேறு மாவட்டங்களில் தொடர்ந்து மழைப் பதிவும் இருந்து வருகிறது.

சென்னையில் சூறைக்காற்றுடன் கனமழை:

சென்னைையைப் பொருத்தவரையில், நேற்று மாலை திடீரென சூறாவளிக் காற்றுடன் கூடிய கனமழை பல்வேறு பகுதிகளில் பதிவானது. குறிப்பாக, அம்பத்தூர் உள்ளிட்ட பகுதிகளில் நல்ல மழைப் பதிவு இருந்தது குறிப்பிடத்தக்கது.

வெப்பநிலையைப் பொருத்தவரையில், வரக்கூடிய நாட்களில் பெரிய அளவில் மாற்றம் இருக்காது என்றும், இயல்பை ஒட்டியே இருக்கக்கூடும் என்றும் சென்னை வானிலை ஆய்வு மையம் தெரிவித்துள்ளது.

அதேபோல், சுமார் 0.9 கிலோமீட்டர் உயரத்தில் கிழக்கு விதர்பா முதல் தமிழகப் பகுதிகள் வரை, தெலங்கானா மற்றும் ஆந்திரப் பிரதேசம் வழியாக ஒரு வளிமண்டலக் கீழடுக்கு சுழற்சி நிலவுகிறது. மேலும், 3.1 கிலோமீட்டர் உயரத்தில் தென்கிழக்கு அரபிக்கடல் மற்றும் அதனை ஒட்டிய கேரளப் பகுதிகளின் மேல் ஒரு வளிமண்டல சுழற்சி நிலவுகிறது.

27 மாவட்டங்களுக்கு கனமழை எச்சரிக்கை:

இதன் காரணமாக, ஜூன் 19ஆம் தேதியான இன்று நீலகிரி, கோவை, ஈரோடு, திருப்பூர், தேனி, திண்டுக்கல், மதுரை, சிவகங்கை, புதுக்கோட்டை, தஞ்சாவூர், திருவாரூர், நாகப்பட்டினம், மயிலாடுதுறை, கரூர், திருச்சி, அரியலூர், பெரம்பலூர், கடலூர், கள்ளக்குறிச்சி, விழுப்புரம், திருவண்ணாமலை, வேலூர், திருப்பத்தூர், கிருஷ்ணகிரி, தர்மபுரி, சேலம் மற்றும் நாமக்கல் ஆகிய மாவட்டங்களில் ஒரு சில இடங்களில் இடி, மின்னல் மற்றும் பலத்த காற்றுடன் கூடிய கனமழை பெய்யக்கூடும் என கணிக்கப்பட்டுள்ளது.

மேலும் படிக்க: ஒன்டே ஆக்சன்.. ஆர்டிஓ அலுவலகங்களில் அதிரடி சோதனை.. ரூ.37.81 லட்சம் பறிமுதல்.. ஊழல் தடுப்பு போலீசார் அதிரடி!

ஜூன் 20ஆம் தேதியைப் பொருத்தவரையில், தமிழகத்தில் ஒரு சில இடங்களில் இடி, மின்னல் மற்றும் பலத்த காற்றுடன் கூடிய லேசானது முதல் மிதமான மழை பதிவாகக்கூடும். இந்த நிலை வரக்கூடிய ஜூன் 22ஆம் தேதி வரை நீடிக்கக்கூடும் என்றும் தெரிவிக்கப்பட்டுள்ளது. மேலும், ஜூன் 24ஆம் தேதி வரை தமிழகத்தின் பல்வேறு மாவட்டங்களில் லேசான மழைக்கு வாய்ப்பு இருப்பதாகவும் கணிக்கப்பட்டுள்ளது.

சென்னையில் வானிலை எப்படி இருக்கும்?

சென்னை மற்றும் புறநகர்ப் பகுதிகளைப் பொருத்தவரையில், வானம் ஓரளவு மேகமூட்டத்துடன் காணப்படும். நகரின் ஒரு சில பகுதிகளில் இடி, மின்னலுடன் கூடிய லேசானது முதல் மிதமான மழை பெய்ய வாய்ப்பு இருப்பதாகவும் தெரிவிக்கப்பட்டுள்ளது. அதிகபட்ச வெப்பநிலை 38 டிகிரி செல்சியஸாகவும், குறைந்தபட்ச வெப்பநிலை 29 டிகிரி செல்சியஸை ஒட்டியும் இருக்கக்கூடும் என சென்னை வானிலை ஆய்வு மையம் தெரிவித்துள்ளது.