AQI
TV9 NETWORK LOGO
Default Image
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

Latest Newsதமிழ்நாடுகிரிக்கெட்பொழுதுபோக்குவெப் ஸ்டோரிஸ்லைஃப்ஸ்டைல்வணிகம்டெக்னாலஜிஇந்தியாஆன்மீகம்உலகம்ஹெஃல்த்வைரல்போட்டோ கேலரி

“எங்களுக்கு போராட இனி தெம்பில்லை!”.. விரக்தியில் லாரி ஓட்டுநர் பாலகிருஷ்ணனின் உடலைப் பெற சம்மதித்த குடும்பம்!

Balakrishnan custodial death: மதுரை காவல் நிலையத்தில் உயிரிழந்த லாரி ஓட்டுநர் பாலகிருஷ்ணனின் உடலை வாங்க மறுத்து உறவினர்கள் பல நாட்களாகத் தொடர் போராட்டத்தில் ஈடுபட்டு வந்த நிலையில், வேறு வழியின்றி விரக்தியடைந்து உடலைப் பெறச் சம்மதித்துள்ளனர். சிபிசிஐடி விசாரணை நடைபெற்று வரும் நிலையில் உடல் தேனிக்குக் கொண்டு செல்லப்படுகிறது.

“எங்களுக்கு போராட இனி தெம்பில்லை!”.. விரக்தியில் லாரி ஓட்டுநர் பாலகிருஷ்ணனின் உடலைப் பெற சம்மதித்த குடும்பம்!
உயிரிழந்த பாலகிருஷ்ணன்
Esakkiraja Selvarathinam
Esakkiraja Selvarathinam | Published: 18 Nov 2026 11:45 AM IST

தேனி, நவ.18: தேனி மாவட்டம் அழகநாயக்கன்பட்டியைச் சேர்ந்த லாரி ஓட்டுநர் பாலகிருஷ்ணன் கடந்த சில நாட்களுக்கு முன்பு ஏலக்காய் ஏற்றிச் சென்ற லாரி தீக்கிரையாக்கப்பட்ட சம்பவம் தொடர்பாகக் காவல் நிலையத்தில் விசாரணைக்கு அழைக்கப்பட்டுள்ளார். கடந்த 13-ஆம் தேதி மதுரை மாவட்டம் சச்சானூர் காவல் நிலையத்திற்கு விசாரணைக்காக அழைத்துச் செல்லப்பட்ட அவர், அங்கு மர்மமான முறையில் தற்கொலை செய்து கொண்டதாகக் கூறப்பட்ட சம்பவம் தமிழகம் முழுவதும் பெரும் கொந்தளிப்பையும் அதிர்ச்சியையும் ஏற்படுத்தியது. காவல்துறையின் தாக்குதலால்தான் பாலகிருஷ்ணன் உயிரிழந்தார் என்று கூறி அவரது குடும்பத்தினரும் உறவினர்களும் மதுரை அரசு ராஜாஜி மருத்துவமனை முன்பு உடலை வாங்க மறுத்துத் தொடர் போராட்டத்தில் ஈடுபட்டு வந்தனர்.

இதையும் படிக்க: “சென்னையில் சர்வதேச தரத்தில் பிரம்மாண்ட ஒலிம்பிக் சிட்டி!”.. செம்மஞ்சேரியில் 124 ஏக்கர் நிலத்தை இறுதி செய்தது தமிழக அரசு!

காவல்துறையினர் மீது எடுக்கப்பட்ட நடவடிக்கை:

இந்தச் சம்பவம் குறித்துத் தீவிர விசாரணை நடத்தக் கோரி தாக்கல் செய்யப்பட்ட வழக்குகளின் அடிப்படையில், இவ்வழக்கு சிபிசிஐடி (CB-CID) பிரிவுக்கு மாற்றப்பட்டுத் தென்மண்டல ஐஜி விஜேந்திர பிரகாஷ் உத்தரவிட்டார். மேலும், சச்சானூர் காவல் நிலைய ஆய்வாளர் முத்து மற்றும் காவலர்கள் கலைச்செல்வி, பழனிவேல் ராஜன் உள்ளிட்டோர் பணியிடை நீக்கம் செய்யப்பட்டனர். சிபிசிஐடி போலீசார் காவல் நிலையத்திலிருந்த சிசிடிவி காட்சிகளை ஆய்வு செய்வதோடு, பல்வேறு கோணங்களிலும் விசாரணையைத் தீவிரப்படுத்தி வருகின்றனர். இதனிடையே, பிரேதப் பரிசோதனை அறிக்கையில் பாலகிருஷ்ணன் உடலில் ஐந்து இடங்களில் காயங்கள் இருந்தது தெரியவந்ததால், காவல்துறையினர் மீது கொலை வழக்குப்பதிவு செய்து கைது செய்ய வேண்டும் எனக் குடும்பத்தினர் கோரிக்கை விடுத்தனர்.

தொடர் போராட்டமும் குடும்பத்தினர் எடுத்த முடிவும்:

நீதி கேட்டு கடந்த நான்கு நாட்களுக்கும் மேலாகத் தொடர் போராட்டத்தில் ஈடுபட்டு வந்த பாலகிருஷ்ணனின் குடும்பத்தினரும் உறவினர்களும், உரிய நீதி கிடைக்கும் வரை உடலைப் பெற மாட்டோம் என உறுதியாக இருந்தனர். எனினும், பல்வேறு கட்டப் பேச்சுவார்த்தைகள் மற்றும் சட்டரீதியான போராட்டங்களுக்குப் பிறகு, தங்களால் தொடர்ந்து போராடுவதற்கான தெம்பு உடலில் இல்லை எனக் கூறி குடும்பத்தினர் கடும் விரக்தியடைந்தனர். நீதிமன்றத்தின் மீதும் சட்டத்தின் மீதும் நம்பிக்கை வைத்து இந்த முடிவை எடுப்பதாகத் தெரிவித்த அவர்கள், வேறு வழியின்றி பாலகிருஷ்ணனின் உடலைப் பெற்றுக்கொள்ளச் சம்மதித்தனர்.

இதையும் படிக்க: “நள்ளிரவில் வீடு புகுந்த கொடிய விஷப்பாம்பு!”.. தாயுடன் தூங்கிய 2 பிஞ்சுக் குழந்தைகள் பரிதாப பலி.. நெஞ்சை உலுக்கும் சோகம்..

தேனிக்கு கொண்டு செல்லப்படும் உடல்:

இதனைத் தொடர்ந்து, மதுரை அரசு ராஜாஜி மருத்துவமனை பிரேதப் பரிசோதனைப் பகுதியில் வைக்கப்பட்டுள்ள பாலகிருஷ்ணனின் உடல் முறையான நடைமுறைகளுக்குப் பிறகு அவரது குடும்பத்தினரிடம் ஒப்படைக்கப்பட்டது. உடலைப் பெற்றுக்கொண்ட உறவினர்கள் ஆம்புலன்ஸ் மூலம் தேனி மாவட்டத்தில் உள்ள சொந்த ஊரான அழகநாயக்கன்பட்டிக்கு உடலைக் கொண்டு சென்று இறுதிச் சடங்குகளை நடத்தத் திட்டமிட்டுள்ளனர். காவல் நிலைய மரணம் மற்றும் அதற்குரிய நீதி கோரிய இச்சம்பவம் தமிழக அரசியலில் பெரும் விவாதத்தை ஏற்படுத்தியுள்ள நிலையில், சிபிசிஐடி விசாரணையின் இறுதி அறிக்கைக்காகப் பொதுமக்கள் அனைவரும் எதிர்பார்த்துக் காத்துள்ளனர்.

Follow Us