IND W vs BAN W: அடித்து ஆட நினைத்து அடங்கிய வங்கதேச மகளிர்.. இந்திய மகளிர் அணிக்கு 137 ரன்கள் இலக்கு!
IND W vs BAN W 1st Innings: 2026 மகளிர் டி20 உலகக் கோப்பையில் இன்று அதாவது வங்கதேச மகளிர் அணியும், இந்திய மகளிர் அணியும் மோதி வருகிறது. இந்த போட்டியில் முதலில் டாஸ் வென்று பேட்டிங்கை தேர்வு செய்த வங்கதேச மகளிர் அணி 20 ஓவர்கள் முடிவில் 8 விக்கெட்டுகள் இழப்பிற்கு 136 ரன்கள் எடுத்தது.
2026 மகளிர் டி20 உலகக் கோப்பையில் (ICC Womens T20 World Cup 2026) இன்று அதாவது 2026 ஜூன் 25ம் தேதி வங்கதேச மகளிர் அணியும், இந்திய மகளிர் அணியும் மோதி வருகிறது. இந்த போட்டியில் முதலில் டாஸ் வென்று பேட்டிங்கை தேர்வு செய்த வங்கதேச மகளிர் அணி 20 ஓவர்கள் முடிவில் 8 விக்கெட்டுகள் இழப்பிற்கு 136 ரன்கள் எடுத்தது. இதையடுத்து, 2026 மகளிர் உலகக் கோப்பையில் தங்களது 3வது வெற்றியைப் பதிவு செய்ய, இந்திய அணி (Indian Womens Cricket Team) 137 ரன்கள் எடுக்க வேண்டும். வங்கதேச மகளிர் அணிக்காக 3 விக்கெட்டுகளை வீழ்த்திய ராதா யாதவ், இந்தியாவின் மிகவும் வெற்றிகரமான பந்து வீச்சாளராகத் திகழ்ந்தார். அரையிறுதிப் போட்டியைக் கருத்தில் கொண்டு, இந்திய அணிக்கு இன்று வங்கதேசத்திற்கு எதிராக ஒரு பெரிய வெற்றி மிகவும் அவசியமாகத் தேவைப்படுகிறது.
சிறப்பான தொடக்கம்:
மான்செஸ்டரில் நடைபெற்று வரும் இந்தப் போட்டியில், டாஸ் வென்ற வங்கதேசம் முதலில் பேட்டிங் செய்யத் தீர்மானித்தது. ஆட்டம் தொடங்கிய சிறிது நேரத்திலேயே இந்த முடிவு அவர்களுக்குப் பாதகமாக அமைந்தது. வங்கதேச அணியில், ஜுரியா ஃபிர்தௌஸ், ஷோபனா மொஸ்தாரி மற்றும் கேப்டன் நிகர் சுல்தானா ஆகியோர் நல்ல தொடக்கத்தைப் பெற்றனர். ஆனால் அவர்களால் அதை பெரிய ஸ்கோர்களாக மாற்ற முடியவில்லை. ஃபிர்தௌஸ், ஷோபனா மற்றும் சுல்தானா முறையே 33, 22 மற்றும் 32 ரன்கள் எடுத்தனர்.
இந்திய சுழற்பந்து வீச்சாளர்கள் ஆதிக்கம்:
இந்திய சுழற்பந்து வீச்சாளர்கள் வங்கதேசத்தின் ரன் விகிதத்தைக் கட்டுப்படுத்தியது மட்டுமல்லாமல், விக்கெட்டுகளையும் கைப்பற்றினர். ராதா யாதவ் 4 ஓவர்களில் வெறும் 28 ரன்களுக்கு மூன்று விக்கெட்டுகளை வீழ்த்தினார். அதே சமயம், தீப்தி ஷர்மா விக்கெட் எதுவும் எடுக்கவில்லை என்றாலும், தனது 4 ஓவர் பந்துவீச்சில் வெறும் 23 ரன்களை மட்டுமே விட்டுக்கொடுத்தார். ஸ்ரீ சரணி மற்றும் ஷெஃபாலி வர்மா ஆகியோரும் ஐந்திற்கும் குறைவான எகானமி ரேட்டில் ரன்களை விட்டுக்கொடுத்தனர். இதுமட்டுமின்றி, ஸ்ரீ சரணி 2 விக்கெட்டுகளையும், ரேணுகா தாக்கூர் மற்றும் நந்தினி ஷர்மா தலா ஒரு விக்கெட்டையும் கைப்பற்றினர்.
இந்தியா எப்படியாவது வெற்றி பெற வேண்டும்..
இந்திய அணி தற்போது குரூப் ஏ புள்ளிப் பட்டியலில் 3 போட்டிகளில் 2 வெற்றிகளுடன் இரண்டாம் இடத்தில் உள்ளது. வங்கதேசத்திற்கு எதிரான ஒரு பெரிய வெற்றி இந்திய மகளிர் அணிக்கு 6 புள்ளிகளைப் பெற்றுத் தருவதோடு, நிகர ரன் ரேட்டில் இந்தியா, தென்னாப்பிரிக்காவை விட வெகு முன்னிலையில் வைக்கும். தென்னாப்பிரிக்கா தற்போது இந்திய அணியுடன் 4 புள்ளிகளுடன் சமநிலையில் உள்ளது. வருகின்ற 2026 ஜூன் 28 ஆம் தேதி ஆஸ்திரேலியாவிடமிருந்து ஒரு கடுமையான சவாலை எதிர்கொள்ளவிருப்பதால், இன்றைய போட்டியில் வெற்றி பெறுவது இந்திய அணிக்கு மிகவும் முக்கியமானது.
