பள்ளி குழந்தைகள் கொண்டும் செல்லும் வாட்டர் பாட்டிலை எப்படி தேர்வு செய்வது?

கோடைக்காலம் மற்றும் சாதாரண நாட்களிலும் பள்ளி செல்லும் குழந்தைகளின் ஆரோக்கியத்தைப் பேணுவதில் அவர்கள் பருகும் குடிநீர் முக்கியப் பங்கு வகிக்கிறது. ஆனால், அவர்கள் கொண்டு செல்லும் தண்ணீர் பாட்டில்கள் பாதுகாப்பானவையா என்பதில் பெற்றோர்கள் கூடுதல் கவனம் செலுத்த வேண்டியது அவசியமாகிறது. சந்தையில் விற்கப்படும் கவர்ச்சிகரமான பல வண்ண பாட்டில்கள் அனைத்தும் குழந்தைகளுக்கு உகந்தவை அல்ல என்று மருத்துவர்கள் எச்சரிக்கின்றனர்.

பிளாஸ்டிக் பாட்டில்களின் ஆபத்துகளும் விழிப்புணர்வும்

இன்றைய சூழலில் பெரும்பாலான பெற்றோர்கள் எளிதாகக் கிடைக்கிறது மற்றும் எடை குறைவாக இருக்கிறது என்பதற்காக பிளாஸ்டிக் பாட்டில்களையே தேர்வு செய்கிறார்கள். எனினும், மலிவான தரம் குறைந்த பிளாஸ்டிக் பாட்டில்களில் பிஸ்பெனால்-ஏ (BPA) போன்ற ஆபத்தான இரசாயனங்கள் கலந்திருக்க வாய்ப்புள்ளது. இத்தகைய பாட்டில்களில் நீண்ட நேரம் தண்ணீர் இருக்கும்போது, அந்த இரசாயனங்கள் தண்ணீரில் கலந்து குழந்தைகளின் ஹார்மோன் சமநிலையைப் பாதிக்கலாம். எனவே, தவிர்க்க முடியாத பட்சத்தில் பிளாஸ்டிக் பாட்டில்களை வாங்குவதாக இருந்தால், அவை கட்டாயம் ‘BPA Free’ என்று சான்றளிக்கப்பட்ட உணவுத் தரத்திலான (Food Grade) பிளாஸ்டிக் தானா என்பதைச் சரிபார்த்து வாங்குவது மிக அவசியமாகும்.

எஃகு மற்றும் தாமிர பாட்டில்களின் ஆரோக்கிய நன்மைகள்

குழந்தைகளின் உடல்நலத்திற்கு மிகச் சிறந்த மற்றும் பாதுகாப்பான தேர்வாக இருப்பது துருப்பிடிக்காத எஃகு (Stainless Steel) மற்றும் தாமிர (Copper) பாட்டில்கள் ஆகும். எஃகு பாட்டில்கள் நீடித்த உழைப்பைத் தருவதுடன், சுத்தம் செய்வதற்கும் எளிதானவை; மேலும் இவற்றில் எவ்வித இரசாயனக் கசிவுகளும் ஏற்படுவதில்லை. அதேபோல், தாமிர பாட்டில்களில் தண்ணீரைச் சேமித்து வைக்கும் போது, அது இயற்கையாகவே பாக்டீரியாக்களை அழிக்கும் ஆற்றலைப் பெறுகிறது. இது குழந்தைகளின் நோய் எதிர்ப்புச் சக்தியை அதிகரிக்கவும், செரிமான மண்டலத்தைச் சீராக்கவும் உதவுகிறது. ஆனால், தாமிர பாட்டில்களைத் தேர்வு செய்யும் போது, அவற்றை தினமும் முறையாகச் சுத்தப்படுத்துவது அவசியமாகும்.

Also Read: பள்ளிக்குச் செல்லும் குழந்தைகளை அவசரமின்றி, புன்னகையோடு தயார் செய்வது எப்படி?

பாட்டிலின் வடிவமைப்பு மற்றும் எடையைக் கவனித்தல்

ஆரோக்கியம் மட்டுமின்றி, பாட்டிலின் எடையும் அதன் பயன்பாட்டுத் தன்மையும் கூட இங்கு முக்கியமானதாகும். பள்ளிப் பைகளின் எடையைக் குறைக்க, பாட்டில்கள் லேசான எடையில் இருப்பது நல்லது. அதேபோல், சிறிய குழந்தைகளுக்குப் பயன்படுத்தும் போது எளிதாகத் திறந்து மூடும் வசதி கொண்ட (Sipper அல்லது Flip-top) மூடிகளைக் கொண்ட பாட்டில்களைத் தேர்வு செய்ய வேண்டும். அகலமான வாய் பகுதி கொண்ட பாட்டில்களை வாங்குவதன் மூலம், அவற்றை உட்புறமாகத் தூரிகை (Brush) கொண்டு எளிதாகச் சுத்தம் செய்ய முடியும். இது பாட்டில்களின் மூலைகளில் கிருமிகள் மற்றும் பாசிகள் படிவதைத் தடுக்க உதவும்.

முக்கியக் குறிப்பு: எந்த வகையான வாட்டர் பாட்டிலாக இருந்தாலும், அதனை வாரத்திற்கு ஒருமுறையாவது வெதுவெதுப்பான நீர் மற்றும் எலுமிச்சை சாறு அல்லது சமையல் சோடா (Bakingsoda) கொண்டு நன்கு சுத்தப்படுத்துவது கிருமித் தொற்றுகளில் இருந்து குழந்தைகளைப் பாதுகாக்கும்.