சுவிட்சர்லாந்து சுற்றுலா போகப்போறீங்களா? சாரா அலிகானின் 5 ஸ்பெஷல் டிப்ஸ்!
Sara Ali Khan’s Swiss Alps: பாலிவுட் நடிகை சாரா அலிகான் தனது குடும்பத்தினருடன் சுவிட்சர்லாந்தின் ஆல்ப்ஸ் மலைப் பகுதியில் சுற்றுலா சென்று அங்குள்ள எழில் கொஞ்சும் இயற்கை அழகை ரசித்துள்ளார். இன்டர்லேக்கன் பகுதியில் உள்ள யுங்பிராவ்ஜோக் ரயில் பயணம், துன்-பிரியன்ஸ் ஏரி படகுச் சவாரி மற்றும் லௌட்டர்ப்ரூனன் பள்ளத்தாக்கு நடைபயணம் ஆகியவை பயணிகளுக்குப் பரவசமூட்டும் அனுபவத்தை அளிக்கின்றன.
பாலிவுட் நடிகை சாரா அலிகான் தனது குடும்பத்தினருடன் சுவிட்சர்லாந்தின் ஆல்ப்ஸ் மலைப் பகுதியில் மேற்கொண்ட சுற்றுலா இணையத்தில் வைரலாகி வருகிறது. இயற்கை எழில் கொஞ்சும் இன்டர்லேக்கன் பகுதியில் அமைந்த ஐரோப்பாவின் மிக உயரமான யுங்பிராவ்ஜோக் ரயில் பயணம் பயணிகளுக்கு மறக்க முடியாத அனுபவத்தைத் தருகிறது. மேலும், அமைதியான துன் மற்றும் பிரியன்ஸ் ஏரிகளில் மேற்கொள்ளப்படும் படகுப் பயணம் சுவிஸ் நாட்டின் இயற்கை அழகை ரசிக்கச் செய்கிறது. வரலாற்றுச் சிறப்புமிக்க செயிண்ட் பீட்டஸ் குகைகளில் உள்ள நிலத்தடி பாறைகள் மற்றும் நீர்வீழ்ச்சிகள் பார்வையாளர்களைப் பெரிதும் கவர்கின்றன. சாகச விரும்பிகளுக்கு லௌட்டர்ப்ரூனன் பள்ளத்தாக்கு நடைபயணம் மற்றும் பாராக்லைடிங் போன்றவை வான்வழி எழிலையும் நீர்வீழ்ச்சி காட்சிகளையும் வழங்குகின்றன. அத்துடன், சுவிட்சர்லாந்தின் புகழ்பெற்ற சாக்லேட்டுகளைத் தாங்களே தயாரித்துப் பார்க்கும் சிறப்புப் பயிற்சி வகுப்புகளும் இங்கு நடத்தப்படுகின்றன. இதனால் பனிப்பாறைகள், ஏரிகள் மற்றும் கலாச்சார அம்சங்கள் நிறைந்த சுவிட்சர்லாந்து உலகளவில் சிறந்த சுற்றுலாத் தலமாக விளங்குகிறது.
1. யுங்பிராவ்ஜோக் பனி ரயில் பயணம்
இன்டர்லேக்கன் ஆஸ்ட் (Interlaken Ost) நிலையத்திலிருந்து புறப்படும் யுங்பிராவ்ஜோக் (Jungfraujoch) இரயில் பயணம், ஐரோப்பாவின் மிக உயரமான ரயில் நிலையத்தை சென்றடைகிறது. இந்தப் பயணத்தின் போது பெர்னீஸ் ஆல்ப்ஸ் (Bernese Alps) மலைகளின் கண்கவர் காட்சிகளைக் காணலாம். உச்சியை அடைந்ததும் பனி அரண்மனை (Ice Palace), ஸ்பிங்க்ஸ் கண்காணிப்பகம் (Sphinx Observatory) மற்றும் பனிப்பாறை குகைப் பாதைகளை நேரில் கண்டு மகிழலாம்.
2. துன் மற்றும் பிரியன்ஸ் ஏரிகளில் படகுப் பயணம்
சுவிட்சர்லாந்தின் அமைதியை முழுமையாக உணர்வதற்கு துன் (Lake Thun) அல்லது பிரியன்ஸ் (Lake Brienz) ஏரிகளில் மேற்கொள்ளப்படும் படகுப் பயணம் சிறந்த தேர்வாகும். ஏரியின் பளிங்கு போன்ற தெளிவான நீரில் பயணித்தபடியே, சுற்றியுள்ள இயற்கை அழகையும் பழமையான வரலாற்றுச் சின்னங்களையும் புகைப்படங்களாகச் சேமிக்கலாம்.
3. செயிண்ட் பீட்டஸ் குகைகளை ஆராய்தல்
துன் ஏரிக்கு அருகில் அமைந்துள்ள செயிண்ட் பீட்டஸ் (St. Beatus) குகைகள், இயற்கையாக உருவான சுண்ணாம்புக் பாறை அமைப்புகளுக்குப் பெயர் பெற்றவை. ஒளியூட்டப்பட்ட இந்த நிலத்தடி குகைகளுக்குள் நடக்கும்போது, பழமையான பாறைப் படிமங்களையும், குகைக்குள் ஆர்ப்பரிக்கும் நிலத்தடி நீர்வீழ்ச்சிகளையும் கண்டு வியக்கலாம்.
4. லௌட்டர்ப்ரூனன் பள்ளத்தாக்கு நடைபயணம்
சாகச விரும்பிகளுக்கு லௌட்டர்ப்ரூனன் (Lauterbrunnen) முதல் ஸ்டெச்செல்பர்க் (Stechelberg) கிராமம் வரையிலான நடைபயணம் (Hike) ஒரு மறக்க முடியாத அனுபவத்தைத் தரும். எளிமையான இந்த நடைபயணத்தின் போது ஸ்டாப்பாக் (Staubbach) மற்றும் ட்ரம்மல்பாச் (Trummelbach) ஆகிய புகழ்பெற்ற இயற்கை நீர்வீழ்ச்சிகளின் எழில் கொஞ்சும் காட்சிகளை அருகில் இருந்து ரசிக்க முடியும்.
5. சுவிஸ் சாக்லேட் தயாரிப்பு பயிற்சி வகுப்புகள்
சுவிட்சர்லாந்து நாட்டின் சுவையான சாக்லேட்டுகள் உலகப் புகழ்பெற்றவை. இன்டர்லேக்கனில் உள்ள ‘ஃபங்கி சாக்லேட் கிளப்’ (Funky Chocolate Club) போன்ற இடங்களில் பயணிகள் தாங்களாகவே சாக்லேட்களை உருக்கி, அச்சுக்களில் வார்த்து, அலங்கரித்து சொந்தமாக சாக்லேட் தயாரிக்கும் சுவாரசியமான அனுபவத்தைப் பெறலாம்.
