டெல்லியில் போராட்டம் அறிவிப்பு: 20,000-க்கும் மேற்பட்ட பாதுகாப்புப் படையினர் குவிப்பு; ஜந்தர் மந்தரில் கட்டுப்பாடுகள்!
Delhi Protest: போராட்ட அறிவிப்பைத் தொடர்ந்து, ஜந்தர் மந்தர் மற்றும் அதைச் சுற்றியுள்ள பகுதிகளில் பாதுகாப்பு பலப்படுத்தப்பட்டுள்ளது. அப்பகுதியில் பாரதிய நாகரிக் சுரக்ஷா சன்ஹிதா (BNSS) சட்டத்தின் 163-வது பிரிவின் கீழ் கட்டுப்பாடுகள் அமல்படுத்தப்பட்டுள்ளதாகத் தெரிவிக்கப்பட்டுள்ளது. டெல்லி எல்லைப் பகுதிகளில் வாகனச் சோதனைகள் தீவிரப்படுத்தப்பட்டுள்ளன. சமூக வலைதளப் பதிவுகளும் கண்காணிக்கப்பட்டு வருகின்றன.
அக்டோபர் 10, 2026: டெல்லியில் தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும், சிறப்பு தீவிர வாக்காளர் பட்டியல் திருத்தத்தை (SIR) ரத்து செய்ய வேண்டும் என்றும் கோரி, காக்ரோச் ஜனதா கட்சி இன்று ஜந்தர் மந்தர் பகுதியில் போராட்டம் நடத்த அழைப்பு விடுத்துள்ளது. இதையடுத்து, தலைநகர் முழுவதும் பாதுகாப்பு பலப்படுத்தப்பட்டு, பதற்றமான சூழல் நிலவுகிறது.
போராட்டத்திற்கு போலீசார் அனுமதி மறுப்பு
ஜந்தர் மந்தரில் போராட்டம் நடத்த சிஜேபி கட்சிக்கு டெல்லி போலீசார் அனுமதி மறுத்துள்ளனர். கடந்த காலப் போராட்டங்களில் விதிக்கப்பட்ட நிபந்தனைகள் மீறப்பட்டதாகவும், வன்முறைச் சம்பவங்கள் நடைபெற்றதாகவும் போலீசார் தெரிவித்துள்ளனர். முந்தைய போராட்டங்களில் 200-க்கும் மேற்பட்ட போலீசார் காயமடைந்ததாகவும், குற்றப் பின்னணி கொண்டவர்கள் போராட்டத்தில் பங்கேற்றதாகவும் போலீசார் குற்றம்சாட்டியுள்ளனர்.
இருப்பினும், போலீசாரின் தடையை மீறியும் போராட்டம் நடத்தப்படும் என்று சிஜேபி தலைவர் அபிஜீத் தீப்கே தெரிவித்துள்ளார். கைது நடவடிக்கைகளுக்கும் தடுப்புக் காவலுக்கும் அஞ்சப் போவதில்லை என்றும் அவர் கூறியுள்ளார்.
ஜந்தர் மந்தரில் பலத்த பாதுகாப்பு
போராட்ட அறிவிப்பைத் தொடர்ந்து, ஜந்தர் மந்தர் மற்றும் அதைச் சுற்றியுள்ள பகுதிகளில் பாதுகாப்பு பலப்படுத்தப்பட்டுள்ளது. அப்பகுதியில் பாரதிய நாகரிக் சுரக்ஷா சன்ஹிதா (BNSS) சட்டத்தின் 163-வது பிரிவின் கீழ் கட்டுப்பாடுகள் அமல்படுத்தப்பட்டுள்ளதாகத் தெரிவிக்கப்பட்டுள்ளது.
மேலும் படிக்க: ஜிஎஸ்டி அதிகாரிகளின் அதிகாரம் பறிப்பு.. கூட்டத்தில் திடீர் முடிவு.. அமைச்சர் நிர்மலா சீதாராமன் அறிவிப்பு!
20,000-க்கும் மேற்பட்ட பாதுகாப்புப் பணியாளர்கள் குவிக்கப்பட்டுள்ளதாகவும், ஆயிரக்கணக்கான மத்திய ரிசர்வ் காவல் படையினர் (CRPF) உள்ளிட்ட காவல்துறை மற்றும் துணை ராணுவப் படையினர் பாதுகாப்புப் பணியில் ஈடுபடுத்தப்பட்டுள்ளதாகவும் தகவல்கள் தெரிவிக்கின்றன.
போக்குவரத்து மற்றும் கண்காணிப்பு தீவிரம்
டெல்லி எல்லைப் பகுதிகளில் வாகனச் சோதனைகள் தீவிரப்படுத்தப்பட்டுள்ளன. சமூக வலைதளப் பதிவுகளும் கண்காணிக்கப்பட்டு வருகின்றன. மேலும், சட்டம்-ஒழுங்கைப் பராமரிக்க டெல்லி போலீசாருடன் ஒருங்கிணைந்து செயல்படுமாறு அண்டை மாநிலங்களின் தலைமைச் செயலாளர்களுக்கு மத்திய உள்துறை அமைச்சகம் அறிவுறுத்தியுள்ளதாகக் கூறப்படுகிறது.
மேலும் படிக்க: “இந்தியா ஜனநாயக நாடு; காலனி அல்ல!” – எலான் மஸ்க்கிற்கு கமல்ஹாசன் பதிலடி
டெல்லி முழுவதும் பலத்த பாதுகாப்பு ஏற்பாடுகள் செய்யப்பட்டுள்ளன. சில பகுதிகளில் இணையச் சேவைகளுக்குக் கட்டுப்பாடுகள் விதிக்கப்பட்டுள்ளதாகவும், 45 இடங்களில் மெட்ரோ ரயில் சேவைகள் நிறுத்தப்பட்டுள்ளதாகவும் தகவல்கள் தெரிவிக்கின்றன. வெளிமாநிலங்களில் இருந்து இயக்கப்படும் 250-க்கும் மேற்பட்ட ரயில்கள் ரத்து செய்யப்பட்டுள்ளதாகவும் கூறப்படுகிறது.
கனாட் பிளேஸ் மற்றும் ஜந்தர் மந்தரை இணைக்கும் சுமார் 500 மீட்டர் நீளமுள்ள சன்சத் மார்க் பகுதியில் அதிக அளவில் பாதுகாப்புப் படையினர் குவிக்கப்பட்டுள்ளனர். பதற்றம் ஏற்படக்கூடிய இடங்களில் ஒலிப்பதிவு வசதியுடன் கூடிய 300-க்கும் மேற்பட்ட சிசிடிவி கேமராக்கள் பொருத்தப்பட்டு கண்காணிப்பு தீவிரப்படுத்தப்பட்டுள்ளது.
