10 நாட்களில் பெட்ரோல், டீசல் விலை 3வது முறையாக உயர்வு..

மத்திய கிழக்கு நாடுகளில் ஏற்பட்டுள்ள பதற்றம் மற்றும் போர்ச் சூழல் காரணமாக, சர்வதேச சந்தையில் கச்சா எண்ணெய் விலை தொடர்ந்து அதிகரித்து வருகிறது. இதன் தாக்கத்தால், இந்தியாவில் பொதுத்துறை எண்ணெய் நிறுவனங்கள் பெட்ரோல் மற்றும் டீசல் விலையை மீண்டும் உயர்த்தியுள்ளன. கடந்த 10 நாட்களில் எரிபொருள் விலை உயர்த்தப்படுவது இது மூன்றாவது முறையாகும்.

இதையும் படிக்க: ரூ.2 லட்சத்திற்கு வட்டி மட்டுமே ரூ.90,000.. அசத்தல் லாபம் தரும் அஞ்சலக டைப் டெபாசிட் திட்டம்!

பெட்ரோல், டீசல் விலை உயர்வு:

அந்தவகையில், சென்னையில் இன்று சனிக்கிழமை முதல் அமலுக்கு வந்துள்ள புதிய விலை மாற்றத்தின்படி, பெட்ரோல் விலை லிட்டருக்கு 82 காசுகள் உயர்த்தப்பட்டு, ஒரு லிட்டர் பெட்ரோல் ரூ.105.31 ஆக அதிகரித்துள்ளது. டீசல் விலை லிட்டருக்கு 87 காசுகள் உயர்த்தப்பட்டு, ஒரு லிட்டர் டீசல் ரூ.96.98 ஆக அதிகரித்துள்ளது.

10 நாட்களில் ரூ.5 வரை உயர்வு:

கடந்த மே 15ஆம் தேதி முதல் எண்ணெய் நிறுவனங்கள் இந்த விலை உயர்வை தராசு முறையில் (Calibrated manner) அமல்படுத்தி வருகின்றன. மே 15ம் தேதி முதல் கட்டமாக லிட்டருக்கு அதிரடியாக ₹3 உயர்த்தப்பட்டது. தொடர்ந்து, மே 19ம் தேதி இரண்டாவது முறையாக லிட்டருக்கு 90 காசுகள் உயர்த்தப்பட்டது. மே 23ம் தேதி தற்போது மூன்றாவது முறையாக விலை உயர்த்தப்பட்டுள்ளது.

இதன் மூலம் கடந்த 10 நாட்களுக்குள் மட்டும் பெட்ரோல் மற்றும் டீசலின் விலை ஒட்டுமொத்தமாக லிட்டருக்கு தோராயமாக ₹5 வரை அதிகரித்துள்ளது என்பது குறிப்பிடத்தக்கது.

விலை உயர்வுக்கான காரணம் என்ன?

மத்திய கிழக்கு பகுதியில் நிலவி வரும் போர்ச் சூழலால் கச்சா எண்ணெய் வரத்து பாதிக்கப்பட்டு, அதன் சர்வதேச சந்தை விலை கணிசமாக உயர்ந்துள்ளது. இதனால் இந்திய பொதுத்துறை எண்ணெய் நிறுவனங்களான இந்தியன் ஆயில் (IOCL), பாரத் பெட்ரோலியம் (BPCL) மற்றும் ஹிந்துஸ்தான் பெட்ரோலியம் (HPCL) ஆகியவற்றுக்கு தினசரி பல நூறு கோடி ரூபாய் இழப்பு ஏற்பட்டு வந்தது.

இந்த நஷ்டத்தைக் குறைக்கும் பொருட்டும், எரிசக்தி விலைச் சுமையைச் சமாளிக்கும் வகையிலும் எண்ணெய் நிறுவனங்கள் இந்த விலை உயர்வை படிப்படியாக பொதுமக்களுக்குக் கடத்தி வருகின்றன.

இதையும் படிக்க: சோதனை நிறைவு.. விரைவில் பிஎஃப் பணத்தை யுபிஐ மூலம் எடுக்கலாம்?.. மத்திய அமைச்சர் சொன்னது என்ன?

பொதுமக்கள் மற்றும் வாகன ஓட்டிகள் கவலை:

தொடர்ச்சியாக ஏறி வரும் இந்த விலை உயர்வால் அத்தியாவசியப் பொருட்களின் விலையும் உயரும் அபாயம் ஏற்பட்டுள்ளது. இதனால் நடுத்தர வர்க்கத்தினரும், வாகன ஓட்டிகளும் பெரும் பொருளாதாரச் சுமைக்கு ஆளாகியுள்ளனர். டெல்லி தவிர்த்து மும்பை, சென்னை மற்றும் கொல்கத்தா ஆகிய இதர பெருநகரங்களிலும் இதன் தாக்கம் எதிரொலித்து, பெட்ரோல் விலை ₹105-ஐ தாண்டி விற்பனையாகி வருவது பொதுமக்களிடையே பெரும் அதிர்ச்சியை ஏற்படுத்தியுள்ளது.