நாடு முழுவதும் இன்று முதல் E20 பெட்ரோல் விற்பனை தொடக்கம்.. மத்திய அரசு அதிரடி உத்தரவு

இந்தியாவின் எரிசக்தி மாற்ற உத்தி திட்டத்தில் ஒரு முக்கிய மைல்கல்லாக, 20 சதவீதம் எத்தனால் கலக்கப்பட்ட பெட்ரோலை (E20 எரிபொருள்) இன்று (ஏப்ரல் 1, 2026) முதல் நாடு முழுவதும் அறிமுகப்படுத்த மத்திய அரசு உத்தரவிட்டுள்ளது. அதிகப்படியான எத்தனால் கலந்திருந்தாலும், என்ஜினின் உகந்த செயல்திறனை உறுதி செய்வதற்காக, இந்த எரிபொருள் குறைந்தபட்சம் 95 என்ற ‘ரிசர்ச் ஆக்டேன் நம்பர்’ (RON) கொண்டிருக்கும் என்று பெட்ரோலியம் மற்றும் இயற்கை எரிவாயு அமைச்சகம் தெரிவித்துள்ளது. அதோடு, இந்த எரிபொருள் இந்திய தர நிர்ணய பணியகத்தால் (BIS) பரிந்துரைக்கப்பட்ட தரங்களுக்கு உட்பட்டிருக்கும் என்று அதிகாரிகள் தெரிவித்தனர்.

இதையும் படிக்க : குழாயில் வரும் கேஸ்.. எல்பிஜிக்கு மாற்றாகும் பிஎன்ஜி.. எப்படி கிடைக்கும்? அரசு சொல்வது என்ன?

இறக்குமதியை குறைக்க நடவடிக்கை:

கச்சா எண்ணெய் இறக்குமதி சார்ந்திருப்பதை குறைக்கவும், வாகன புகையினால் ஏற்படும் மாசுபாட்டைக் குறைக்கவும் இந்த நாடு தழுவிய நடவடிக்கை எடுக்கப்பட்டுள்ளது. குறிப்பாக மேற்கு ஆசிய போர் சூழல் நெருக்கடியால் பல்வேறு நாடுகளில் எரிவாயு மற்றும் எரிபொருள் தட்டுப்பாடு ஏற்பட்டுள்ளது. இதன் தொடர்ச்சியாக எரிபொருள் தட்டுப்பாட்டை தவிர்க்கவும், கச்சா எண்ணெய் இறக்குமதியை குறைக்கவும் பல்வேறு நடவடிக்கைகள் மேற்கொள்ளப்பட்டு வருகின்றன. அதில் ஒன்றாக தான் எத்தனால் கலக்கப்பட்ட இ-20 பெட்ரோலை இன்று முதல் முத்திய அரசு விற்பனை செய்ய உத்தரவிட்டுள்ளது. இருப்பினும், நுகர்வோர், வாகனத் தொழில் மற்றும் சுற்றுச்சூழல் ஆகியவற்றில் இது ஏற்படுத்தும் தாக்கங்கள் குறித்து பரவலான விவாதங்கள் எழுந்துள்ளன.

வாகன உரிமையாளர்கள் கவலை:

அந்தவகையில், எரிபொருள் சிக்கனம் மற்றும் என்ஜின் செயல்திறனில் ஏற்படக்கூடிய மாற்றங்கள் குறித்து வாகன உரிமையாளர்கள் கவலை தெரிவித்துள்ளனர். பெட்ரோலை விட எத்தனால் குறைந்த ஆற்றல் அடர்த்தி கொண்டது என்பதால், எரிபொருள் சிக்கனம் (மைலேஜ்) 2 முதல் 7 சதவீதம் வரை குறையக்கூடும் என்று நிபுணர்கள் மதிப்பிடுகின்றனர், குறிப்பாக E20 எரிபொருளுக்காக வடிவமைக்கப்படாத பழைய வாகனங்களில் இந்த பாதிப்பு இருக்கும். எத்தனால் ஈரப்பதத்தை உறிஞ்சும் தன்மை கொண்டதால், என்ஜின்களில் உள்ள ரப்பர் மற்றும் பிளாஸ்டிக் பாகங்கள் நீண்ட கால அடிப்படையில் தேய்மானத்திற்கு உள்ளாகலாம் என்ற அச்சமும் உள்ளது.

இந்தியாவில் தரநிலைகள் இல்லை:

இந்திய வாகன ஆராய்ச்சி சங்கம் (ARAI) மற்றும் இந்திய ஆட்டோமொபைல் உற்பத்தியாளர்கள் சங்கம் (SIAM) உள்ளிட்ட தொழில்துறை அமைப்புகள் இந்த அச்சத்தைப் போக்க முயன்றுள்ளன. E20 எரிபொருள் பாதுகாப்பானது என்றும், என்ஜின் சேதம் குறித்த கவலைகள் பெரும்பாலும் ஆதாரமற்றவை என்றும் அவை கூறுகின்றன. சுற்றுச்சூழல் வல்லுநர்கள் கூறுகையில், எத்தனால் கலப்பு கார்பன் மோனாக்சைடு, ஹைட்ரோகார்பன்கள் மற்றும் துகள்மப் பொருட்கள் (particulate matter) போன்ற உமிழ்வைக் குறைக்க உதவும் என்றாலும், இது நைட்ரஜன் ஆக்சைடுகள் மற்றும் அசிடால்டிஹைட் அதிகரிப்புக்கு வழிவகுக்கும் என்று குறிப்பிடுகின்றனர். மேலும், இந்த உமிழ்வுகளில் சிலவற்றை கண்காணிக்க இந்தியாவில் தற்போது விரிவான தரநிலைகள் இல்லை என்றும் அவர்கள் சுட்டிக்காட்டுகின்றனர்.

எத்தனால் தேவை அதிகரிப்பு:

இது போக்குவரத்துத் துறைக்கு அப்பால் விநியோகச் சங்கிலிகளிலும் பாதிப்பை ஏற்படுத்தத் தொடங்கியுள்ளது. எத்தனால் தேவை அதிகரிப்பது மருந்து, ரசாயனம் மற்றும் பானங்கள் போன்ற தொழில்களுக்கான அதன் இருப்பில் அழுத்தத்தை ஏற்படுத்தியுள்ளதாகக் கூறப்படுகிறது, இதனால் சில நிறுவனங்கள் இறக்குமதியை நாடும் நிலை ஏற்பட்டுள்ளது. எரிபொருள் உற்பத்திக்காக கரும்பு மற்றும் சோளம் போன்ற பயிர்களை திசை திருப்புவது உணவு விலைகள் மற்றும் நீர் பயன்பாட்டில் தாக்கங்களை ஏற்படுத்தக்கூடும் என்று நிபுணர்கள் எச்சரிக்கின்றனர்.

இதையும் படிக்க : கலால் வரி குறைக்கப்பட்டும் பெட்ரோல், டீசல் விலைகள் குறையவில்லை – காரணம் என்ன?

எத்தனால் மீதான தீவிரமான உந்துதல்:

எத்தனால் மீதான தீவிரமான உந்துதல், மின்சார வாகனங்கள் (EV) போன்ற தூய்மையான மாற்றுகளை ஏற்றுக்கொள்வதைத் தாமதப்படுத்தலாம் என்று சில ஆய்வாளர்கள் வாதிடுகின்றனர். எனவே சீரான மாற்றத்திற்கான உத்தி தேவை என்று அவர்கள் கோருகின்றனர். இந்தியா E20 அறிமுகத்தை நோக்கி நகரும் வேளையில், நுகர்வோர், தொழில்துறை தயார்நிலை மற்றும் சுற்றுச்சூழல் விளைவுகளில் அதன் ஒட்டுமொத்த தாக்கம் உன்னிப்பாகக் கண்காணிக்கப்படும் என்று எதிர்பார்க்கப்படுகிறது.