வேகமாக பரவும் எபோலா வைரஸ்.. அவசரநிலை அறிவித்த உலக சுகாதார அமைப்பு.. எந்தெந்த நாடுகளுக்கு ஆபத்து ?

மே 24, 2026: உலக சுகாதார அமைப்பு ஆப்பிரிக்காவின் சில பகுதிகளில் பரவி வரும் எபோலா வைரஸ் தொற்றை சர்வதேச பொதுசுகாதார அவசரநிலையாக (PHEIC) அறிவித்துள்ளது. காங்கோ ஜனநாயக குடியரசு மற்றும் உகாண்டா ஆகிய நாடுகளில் எபோலா பரவல் அதிகரித்து வருவதால், சர்வதேச சுகாதார ஒழுங்குமுறைகள் (IHR), 2005-ன் கீழ் மே 17ஆம் தேதி இந்த அறிவிப்பு வெளியிடப்பட்டது. குறிப்பாக, எபோலா வைரஸின் “பண்டிபுக்யோ” (Bundibugyo) வகை வேகமாக பரவி வருவது குறித்து கவலை அதிகரித்துள்ளது.

இந்திய சுகாதார மற்றும் குடும்ப நல அமைச்சகம் வெளியிட்ட அறிக்கையில், ஆப்பிரிக்க நோய் கட்டுப்பாடு மற்றும் தடுப்பு மையங்கள்  அமைப்பும் இந்த எபோலா பரவலை “கண்டம் முழுவதும் பாதுகாப்பு அவசரநிலை” (PHECS) என அறிவித்துள்ளதாக தெரிவித்துள்ளது.

எபோலா என்றால் என்ன?

எபோலா என்பது எபோலா வைரஸால் ஏற்படும் கடுமையான வைரஸ் ரத்தக்கசிவு காய்ச்சல் நோயாகும். தற்போது பரவி வரும் “பண்டிபுக்யோ” வகை எபோலா வைரஸ் மிகவும் ஆபத்தானதாகவும், அதிக உயிரிழப்பை ஏற்படுத்தக்கூடியதாகவும் கருதப்படுகிறது.

இந்த வகை எபோலாவைத் தடுக்கும் அல்லது சிகிச்சையளிக்கும் அங்கீகரிக்கப்பட்ட தடுப்பூசிகள் அல்லது குறிப்பிட்ட மருந்துகள் தற்போது இல்லை என சுகாதார அதிகாரிகள் தெரிவித்துள்ளனர்.

WHO என்ன கூறியுள்ளது?

மே 22ஆம் தேதி நடைபெற்ற WHO-வின் IHR அவசரக்குழு கூட்டத்தில், பண்டிபுக்யோ வைரஸால் ஏற்படும் எபோலா பரவலை கட்டுப்படுத்த தற்காலிக பரிந்துரைகள் வெளியிடப்பட்டன.

மேலும் படிக்க: நல்ல செய்தி வரப்போகுது – அமெரிக்க வெளியுறவுத்துறை அமைச்சர் சொன்ன விஷயம்!

அதில், சர்வதேச நுழைவாயில்களில் சுகாதார பரிசோதனைகள் மற்றும் நோய் கண்காணிப்பை வலுப்படுத்த வேண்டும் என வலியுறுத்தப்பட்டுள்ளது. மேலும், “பண்டிபுக்யோ வைரஸ் பரவல் உறுதி செய்யப்பட்ட பகுதிகளில் இருந்து வரும் காய்ச்சல் அறிகுறிகள் கொண்ட பயணிகளை கண்டறிந்து, பரிசோதித்து, கண்காணித்து, சிகிச்சை அளிக்க வேண்டும்” என நாடுகளுக்கு WHO அறிவுறுத்தியுள்ளது. அதேபோல், வைரஸ் கண்டறியப்பட்ட பகுதிகளுக்கு தேவையற்ற பயணங்களை தவிர்க்கவும் WHO பரிந்துரைத்துள்ளது.

எந்த நாடுகள் அதிக ஆபத்தில் உள்ளன?

அறிவிப்பின்படி, காங்கோ ஜனநாயகக் குடியரசு மற்றும் உகாண்டாவுடன் எல்லை பகிரும் நாடுகள் அதிக ஆபத்தில் உள்ளதாக கருதப்படுகின்றன. குறிப்பாக தெற்கு சூடான் பாதிப்பு ஏற்படும் அபாயம் அதிகம் உள்ள நாடாக குறிப்பிடப்பட்டுள்ளது.

இந்தியாவில் பாதிப்பு உள்ளதா?

பண்டிபுக்யோ வகை எபோலா தொடர்பான எந்த நோயாளியும் இதுவரை இந்தியாவில் பதிவாகவில்லை என மத்திய அரசு தெரிவித்துள்ளது.

இந்திய அரசு வெளியிட்டுள்ள அறிவுரை

இந்த சூழ்நிலையை கருத்தில் கொண்டு, இந்திய அரசு குடிமக்கள் தேவையற்ற பயணங்களை காங்கோ ஜனநாயகக் குடியரசு, உகாண்டா மற்றும் தெற்கு சூடான் நாடுகளுக்கு மேற்கொள்ள வேண்டாம் என அறிவுறுத்தியுள்ளது.

மேலும், அந்நாடுகளில் வசிக்கும் அல்லது பயணம் மேற்கொண்டு வரும் இந்தியர்கள், அங்குள்ள சுகாதார அதிகாரிகள் வழங்கும் வழிகாட்டுதல்களை கண்டிப்பாக பின்பற்ற வேண்டும் என்றும், அதிக முன்னெச்சரிக்கையுடன் இருக்க வேண்டும் என்றும் அறிவுறுத்தப்பட்டுள்ளது.