“பாகிஸ்தான் பெண் உளவாளிக்கு தகவல் கசிவு”.. கோவையில் கடற்படை மாலுமி கைது.. ஆந்திர போலீசார் நடவடிக்கை!!

கோவை, அக்.04: இந்திய ராணுவம் மற்றும் கடற்படைப் பிரிவுகளின் பாதுகாப்பு அம்சங்களை இலக்காகக் கொண்டு, சமூக வலைதளங்கள் மூலமாக பெண் உளவாளிகளைப் பயன்படுத்தி ரகசியங்களைச் சேகரிக்கும் ‘ஹனிட்ராப்’ சம்பவங்கள் தொடர் கதையாகி வருகின்றன. அந்த வகையில், இந்திய கடற்படையின் மிக முக்கிய தளங்களில் ஒன்றான விசாகப்பட்டினம் பாதுகாப்புத் தகவல்களைப் பாகிஸ்தான் உளவு அமைப்பைச் சேர்ந்த பெண் உளவாளிக்குக் கசியவிட்டதாகக் எழுந்த குற்றச்சாட்டின் பேரில், கடற்படை அதிகாரி ஒருவர் கோவையில் வைத்து கைது செய்யப்பட்டுள்ள சம்பவம் பெரும் அதிர்வலைகளை உருவாக்கியுள்ளது.

இதையும் படிக்க: “கையில் பென்சில், போனில் கூகுள் பே!”.. இடைத்தேர்தலில் ‘ஊரையே விலை பேசும்’ புதிய உத்தி.. சிபிஐ வீரபாண்டியன் கொந்தளிப்பு!!

கோவையில் நடந்த கைது நடவடிக்கை:

மேற்கு வங்க மாநிலத்தைச் சேர்ந்த 31 வயதான பிரதீப் முகர்ஜி என்ற கடற்படை மாலுமி, ஆந்திர மாநிலம் விசாகப்பட்டினத்தைத் தலைமையகமாகக் கொண்டு இயங்கும் கிழக்குக் கடற்படையில் பணியாற்றி வருகிறார். இவர் கோவை ரெட் ஃபீல்ட் பகுதியில் அமைந்துள்ள இந்திய கடற்படை பயிற்சி மையமான ‘ஐ.என்.எஸ் அக்ரானி’யில் (INS Agrani) நடைபெற்ற மேலாண்மை மேம்பாட்டுப் பயிற்சியில் கலந்துகொள்வதற்காக கடந்த ஒரு வாரத்திற்கு முன்பு கோவை வந்து தங்கியிருந்தார்.

ஆந்திர காவல் துறை ரகசிய வேட்டை:

இந்நிலையில், எல்லை தாண்டிய உளவு வேலைகள், பயங்கரவாத அச்சுறுத்தல்கள் மற்றும் தேசிய பாதுகாப்புச் சார்ந்த தீவிர குற்றங்களை விசாரித்து வரும் ஆந்திரப் பிரதேச காவல்துறையின் ‘கவுண்டர் இன்டெலிஜென்ஸ்’ (Counter Intelligence – CI) சிறப்புப் பிரிவு அதிகாரிகளுக்குக் கடற்படை ரகசியங்கள் கசிந்தது தொடர்பான அதிர்ச்சித் தகவல் கிடைத்தது. சமூக ஊடகங்கள் வழியாகத் தொடர்பிலிருந்த பாகிஸ்தானிய பெண் உளவாளி ஒருவரிடம், பிரதீப் முகர்ஜி விசாகப்பட்டினம் கடற்படைத் தளத்தின் அதிமுக்கிய பாதுகாப்பு விபரங்கள் மற்றும் உத்திசார் தகவல்களைப் பகிர்ந்து கொண்டது ஆந்திர சி.ஐ அதிகாரிகளின் ரகசிய விசாரணையில் திட்டவட்டமாக உறுதி செய்யப்பட்டது.

கடற்படை அனுமதியுடன் அதிரடி கைது:

இதனைத் தொடர்ந்து, குற்றச்சாட்டில் சிக்கிய மாலுமி பிரதீப் முகர்ஜியைக் கைது செய்வதற்கான முறையான சட்டப்பூர்வ அனுமதிகளை ஆந்திர மாநில சிறப்புப் பிரிவு போலீசார் இந்திய கடற்படை உயர் அதிகாரிகளிடம் இருந்து பெற்றனர். கடற்படை தலைமையின் பச்சைக்கொடி காட்டுதலைத் தொடர்ந்து, ஆந்திராவில் இருந்து நேற்று காலை கோவைக்கு விரைந்த சி.ஐ சிறப்புப் படை அதிகாரிகள், கோவை ஐ.என்.எஸ் அக்ரானி வளாகத்திற்குள் வைத்து பிரதீப் முகர்ஜியை அதிரடியாகக் கைது செய்தனர்.

இதையும் படிக்க: “யார் பணத்தில் திட்டங்கள்?”.. முதல்வர் விஜய்யின் கேள்வியும்.. மு.க.ஸ்டாலினின் அதிரடி பதிலடியும்!!

விஜயவாடாவில் தொடரும் தீவிர விசாரணை:

கைது செய்யப்பட்ட பிரதீப் முகர்ஜியை கோவை உள்ளூர் நீதிமன்றத்தில் ஆஜர்படுத்திய காவல் துறையினர், வழக்கு விசாரணை மற்றும் மேல்நடவடிக்கைகளுக்காக அவரை ஆந்திர மாநிலம் விஜயவாடாவிற்கு அழைத்துச் சென்றனர். பாகிஸ்தான் பெண் உளவாளியிடம் இவர் பணத்திற்காகத் தகவல்களைக் கசியவிட்டாரா அல்லது வேறு ஏதேனும் பின்னணி உள்ளதா என்பது குறித்தும், அவருடன் தொடர்பில் இருந்த பிற நபர்கள் குறித்தும் விஜயவாடாவில் வைத்து ஆந்திர சி.ஐ போலீசார் தீவிர விசாரணை மேற்கொண்டு வருகின்றனர்.