மேகதாது அணை விவகாரம்.. தமிழ்நாடு சட்டமன்றத்தில் தனித்தீர்மானம்..

ஜூன் 19, 2026: காவிரி ஆற்றின் குறுக்கே மேகதாது அணை கட்டுவது தொடர்பாக, தமிழக சட்டப்பேரவைக் கூட்டத்தொடரில் இன்று தனித் தீர்மானம் நிறைவேற்றப்பட உள்ளதாக தெரிவிக்கப்பட்டுள்ளது. இந்தத் தீர்மானத்தை தமிழ்நாடு முதலமைச்சர் ஜோசப் விஜய் முன்மொழிய உள்ளார். தமிழக வெற்றிக் கழகத்தின் முதல் சட்டப்பேரவைக் கூட்டத்தொடர் ஜூன் 18ஆம் தேதி தொடங்கி நடைபெற்று வருகிறது. இந்த நிலையில், காவிரி ஆற்றின் குறுக்கே மேகதாது அணை கட்டுவது தொடர்பாக, தமிழக அரசின் இசைவின்றி அணைக்கட்டும் பணியை மேற்கொள்ளக் கூடாது என மத்திய அரசை வலியுறுத்தும் வகையில் இந்தத் தீர்மானம் கொண்டு வரப்படும் என தெரிவிக்கப்பட்டுள்ளது.

ஆளுநர் உரையில் இடம்பெற்ற மேகதாது அணை விவகாரம்:

தமிழ்நாடு சட்டப்பேரவையின் 17ஆவது கூட்டத்தொடர் நடைபெற்று வரும் சூழலில், முதல் நாளான நேற்று ஆளுநர் உரையுடன் கூட்டம் தொடங்கியது. ஆளுநர் உரையில், மேகதாது திட்டத்தை தடுக்க சட்டரீதியான முயற்சிகள் முன்னெடுக்கப்படும் என குறிப்பிடப்பட்டது.

காவிரி ஆற்றின் குறுக்கே மேகதாது அணை கட்டுவது தொடர்பாக பல ஆண்டுகளாக பிரச்சினை தொடர்ந்து இருந்து வருகிறது. இந்தத் திட்டத்திற்கு மத்திய நீர்வளத் துறையிடம் அனுமதி கோரி கர்நாடக அரசு கோரிக்கை வைத்துள்ளது. மேலும், இந்த விவகாரத்தில் மத்திய அரசு உரிய நடவடிக்கை எடுக்க வேண்டும் என்றும் வலியுறுத்தியுள்ளது.

மேலும் படிக்க: “பாஜகவின் உண்மையான பி டீமாக திமுக தான் செயல்பட்டது”.. அமைச்சர் அருண் ராஜ் குற்றச்சாட்டு!

மேகதாது அணை – புதிய திட்ட அறிக்கையை சமர்பித்த கர்நாடகா அரசு:

இந்தத் திட்டத்திற்கு எதிர்ப்பு தெரிவித்து, தமிழக அரசு சார்பில் உச்சநீதிமன்றத்தில் மனு தாக்கல் செய்யப்பட்டிருந்தது. ஆனால், அந்த மனுவை விசாரணை நீதிமன்றம் தள்ளுபடி செய்து உத்தரவிட்டது. எனவே, அணை கட்டுவதற்கு தடை இல்லை என்ற நிலை ஏற்பட்டுள்ள சூழலில், கர்நாடக அரசு காவிரி ஆற்றின் குறுக்கே புதிய அணை கட்டத் தீர்மானித்துள்ளது.

இந்தத் திட்டத்தை செயல்படுத்த 715 ஆயிரம் கோடி ரூபாய் செலவாகும் என கணிக்கப்பட்டுள்ளது. இதற்காக, அந்த மாநில அரசு திருத்தப்பட்ட விரிவான திட்ட அறிக்கையை சமீபத்தில் மத்திய நீர் ஆணையத்திடம் தாக்கல் செய்ததும் குறிப்பிடத்தக்கது. இதன் மீது விரைவாக நடவடிக்கை எடுத்து ஒப்புதல் வழங்க வேண்டும் எனவும், துணை முதலமைச்சர் டி.கே. சிவக்குமார் பிரதமர் மோடி மற்றும் மத்திய அமைச்சர் சி.ஆர். பாட்டீலிடம் கோரிக்கை முன்வைத்திருந்தார்.

ஆனால், மேகதாது அணை கட்டப்பட்டால் உபரி நீர் தமிழகத்திற்கு கிடைக்காது. இதனால் டெல்டா பாசன விவசாயம் கடுமையாக பாதிக்கப்படும். எனவே, தமிழ்நாடு அரசு இதற்கு கடும் எதிர்ப்பு தெரிவித்து வருகிறது. இருப்பினும், மேகதாதுவில் புதிய அணையை கட்டியே தீருவோம் என கர்நாடக அரசு தொடர்ந்து கூறி வருகிறது.

சட்டப்பேரவையில் தனித்தீர்மானம்:

இந்த நிலையில், தமிழக சட்டப்பேரவையில் மேகதாது அணை விவகாரம் தொடர்பாக இன்று தனித் தீர்மானம் கொண்டுவரப்படுகிறது. இந்தத் தீர்மானத்தை தமிழ்நாடு முதலமைச்சர் ஜோசப் விஜய் முன்மொழிய உள்ளார். தமிழக அரசின் இசைவின்றி மேகதாதுவில் அணை கட்டும் திட்டத்திற்கு மத்திய அரசு அனுமதி வழங்கக் கூடாது என வலியுறுத்தும் வகையில் இந்தத் தீர்மானம் கொண்டு வரப்படும் என தெரிவிக்கப்பட்டுள்ளது.

அதேபோல், காவிரி படுகையில் எந்த இடத்திலும் புதிய நீர்த்தேக்கத் திட்டங்களை மேற்கொள்ளக் கூடாது என்பதும் இந்தத் தனித் தீர்மானத்தில் இடம்பெற உள்ளது.