ரூ.5000 கோடி நிதி மோசடி வழக்கு.. சென்னையில் அதிரடியாக கைது செய்யப்பட்ட தொழிலதிபர் பிரேம்குமார்!!

சென்னை, அக்.30: இந்திய அளவில் ஆயிரக்கணக்கான முதலீட்டாளர்களை ஏமாற்றி சுமார் ரூ.5000 கோடிக்கும் அதிகமான தொகையைக் சுருட்டியதாக எழுந்துள்ள மாபெரும் நிதி மோசடி புகார் நாட்டின் பலத்த அதிர்வுகளை ஏற்படுத்தியுள்ளது. ‘பாரத் லஜனா மல்டி ஸ்டேட் ஹவுசிங் கூட்டுறவு சங்கம்’ என்ற பெயரில் இயங்கி வந்த நிதி நிறுவனத்தின் தலைவராகச் செயல்பட்டு வந்த பிரேம்குமார் என்பவர் மீது கடுமையான குற்றச்சாட்டுகள் முன்வைக்கப்பட்டன. பொதுமக்களின் கோடிக்கணக்கான சேமிப்புப் பணத்தை முறைகேடான முறையில் பதுக்கியதுடன், தலைமறைவாகிவிட்ட அவரைப் பிடிக்கக் கேரள மாநிலம் கோழிக்கோடு குற்றப்பிரிவு காவல்துறையினர் தீவிரத் தேடுதல் வேட்டையில் ஈடுபட்டு வந்தனர். பல மாதங்களாகத் தலைமறைவாக இருந்த பிரேம்குமார் சென்னையில் பதுங்கியிருப்பதை உறுதி செய்த தனிப்படை போலீசார், கடந்த சில நாட்களுக்கு முன்பு சென்னையில் வைத்து அவரை அதிரடியாகக் கைது செய்து தங்களது கட்டுப்பாட்டுக்குள் கொண்டுவந்தனர்.

இதையும் படிக்க: கே.என்.நேரு தொடர்புடைய இடங்களில் லஞ்ச ஒழிப்புத்துறை அதிரடி ரெய்டு.. 170 ஆவணங்கள், 13 மின்னணு சாதனங்கள் பறிமுதல்!

போலீசார், நீதிமன்றத்தின் துரித நடவடிக்கை:

சென்னையில் கைது செய்யப்பட்ட பிரேம்குமார், காவல்துறையினரின் பிடியிலிருந்து தப்புவதற்காகவும் சட்ட நடவடிக்கைகளைத் தாமதப்படுத்துவதற்காகவும் தனக்கு நெஞ்சுவலிப்பதாகக் கூறி நாடகமாடியுள்ளார். உடனடியாக அவரை வடபழனியில் உள்ள ஒரு தனியார் மருத்துவமனையில் அனுமதித்துச் பரிசோதனைகள் மேற்கொண்ட போதிலும், அவர் உடல்நலக் குறைவு நாடகத்தை அரங்கேற்றுவது தெரியவந்தது. இதனையடுத்து, அவரை சைதாப்பேட்டை நீதிமன்றத்திற்கு அழைத்துச் செல்ல முயன்றபோது மீண்டும் தனக்கு உடல்நிலை சரியில்லை என அவர் முறையிட்டுள்ளார். உடனடியாக அவரை சைதாப்பேட்டை அரசு மருத்துவமனையில் முதலுதவி சிகிச்சைக்காகச் சேர்த்த காவல்துறையினர், பின்னர் மேல் சிகிச்சை மற்றும் முறையான சான்றிதழ் பெறுவதற்காக ராயப்பேட்டை அரசு மருத்துவமனைக்கு அழைத்துச் சென்றனர். அங்கு மருத்துவர்கள் அவரது உடல்நிலை முற்றிலும் சீராக இருப்பதாகவும், அவர் முழு ஆரோக்கியத்துடன் இருப்பதாகவும் சான்றிதழ் வழங்கியதைத் தொடர்ந்து சட்ட நடவடிக்கைகள் தீவிரப்படுத்தப்பட்டன.

கேரளாவுக்கு அழைத்துச் செல்லும் போலீசார்:

மருத்துவமனையில் மருத்துவர்களின் உறுதிப்படுத்தல் சான்றிதழ் பெறப்பட்ட பிறகு, கேரளக் காவல்துறையினர் பிரேம்குமாரைச் சைதாப்பேட்டை நீதிமன்ற நீதித்துறை நடுவர் முன்பு நள்ளிரவில் ஆஜர்படுத்தினர். இந்த மாபெரும் நிதி மோசடி வழக்கு கேரள மாநிலத்துடன் நேரடியாகத் தொடர்புடையது என்பதால், அவரை உடனடியாகக் கேரளாவிற்குக் கொண்டு செல்வதற்காக நீதிமன்றத்திடம் ‘டிரான்சிட் வாரண்ட்’  முறையாகப் பெறப்பட்டது. நீதிமன்ற அனுமதியைப் பெற்ற கையுடன், நள்ளிரவு 12 மணியளவில் ராயப்பேட்டை மருத்துவமனையில் இருந்து அவர் முழுமையாக டிஸ்சார்ஜ் செய்யப்பட்டு, பலத்த போலீஸ் பாதுகாப்புடன் கார் மூலமாகக் கேரளாவுக்கு அழைத்துச் செல்லப்பட்டார். இந்த நடவடிக்கையின் போது காவல்துறையினர் காட்டிய துரிதம் மற்றும் சட்டப்பூர்வமான அணுகுமுறை அனைவரின் கவனத்தையும் ஈர்த்தது.

இதையும் படிக்க: கவுன்சிலருக்கு மட்டுமில்ல எனக்கே இந்த நிலை தான்.. சென்னை மாநகராட்சியை கலைத்து விடலாம்.. கூட்டத்தில் கொந்தளித்த மேயர் ஆர். பிரியா!

வெளிவரவிருக்கும் அடுத்தடுத்த உண்மைகள்:

பல ஆயிரம் கோடி ரூபாய் மதிப்புள்ள இந்த நிதி மோசடி வழக்கில் கைது செய்யப்பட்டுள்ள பிரேம்குமாரிடம் கேரளாவுக்கு அழைத்துச் செல்லப்பட்டதும் தீவிர விசாரணைகள் நடத்தப்படவுள்ளன. அவர் திரட்டிய பணம் எங்கு முதலீடு செய்யப்பட்டது, இந்த முறைகேட்டில் அவருக்கு உடந்தையாக இருந்த முக்கியப் பிரமுகர்கள் மற்றும் அரசியல் புள்ளிகள் யார் யார் என்பது குறித்த பல திடுக்கிடும் தகவல்கள் விசாரணையில் வெளிவரும் என எதிர்பார்க்கப்படுகிறது. சாதாரண பொதுமக்களின் உழைப்பைச் சூறையாடிய இந்தச் சோகம் நிறைந்த மோசடி வழக்கில், தலைமறைவாக உள்ள மற்ற கூட்டாளிகளையும் பிடிக்கக் காவல்துறையினர் முணைப்புடன் செயல்பட்டு வருவதால், வரும் நாட்களில் மேலும் பல அதிரடி கைதுகள் அரங்கேற வாய்ப்புள்ளதாகத் தகவல்கள் வெளியாகியுள்ளன.