IND vs ZIM: ஆரம்பத்தில் சொதப்பல்.. பின்வரிசையில் அசத்தல்.. போராடி வென்ற இந்திய மகளிர்!
India Women vs Zimbabwe Women 1st T20I: ஜிம்பாப்வே மகளிர் அணி நிர்ணயித்த 115 ரன்களை இலக்காக கொண்டு விளையாடிய இந்திய அணி ஆரம்பத்தில் அடுத்தடுத்து 4 விக்கெட்களை இழந்தது. இருப்பினும், தீப்தி சர்மாவின் 49 ரன்கள் மற்றும் நிக்கி பிரசாத்தின் 39 ரன்களால் இந்திய மகளிர் அணி 15.4 ஓவர்களில் வெற்றியை ருசித்தது.
ஜிம்பாப்வே மகளிர் அணி (IND W vs ZIM W) நிர்ணயித்த 115 ரன்களை இலக்காக கொண்டு விளையாடிய இந்திய அணி ஆரம்பத்தில் அடுத்தடுத்து 4 விக்கெட்களை இழந்தது. இருப்பினும், தீப்தி சர்மாவின் 49 ரன்கள் மற்றும் நிக்கி பிரசாத்தின் 39 ரன்களால் இந்திய மகளிர் அணி 15.4 ஓவர்களில் வெற்றியை ருசித்தது. இதன்மூலம், 3 போட்டிகள் கொண்ட டி20 தொடரில் இந்திய அணி (Indian Womens Cricket Team) 1-0 என்ற கணக்கில் முன்னிலை பெற்றது. இந்தப் போட்டியில் பெற்ற வெற்றியின் மூலம் ஸ்மிருதி மந்தனா ஒரு முழு நேர கேப்டனாக தனது புதிய கேப்டன்ஷி அத்தியாயத்தைத் தொடங்கியுள்ளார்.
ALSO READ: இன்னும் 133 ரன்கள் மட்டுமே… உலக சாதனையின் விளிம்பில் இருக்கும் ஸ்மிருதி மந்தனா!
115 ரன்கள் என்ற இலக்குக்கு திணறிய இந்திய மகளிர்:
இந்திய கேப்டன் ஸ்மிருதி மந்தனா டாஸ் வென்று முதலில் பந்துவீச்சைத் தீர்மானித்தார். முதலில் பேட்டிங் செய்த ஜிம்பாப்வே மகளிர் அணி, 20 ஓவர்களில் 5 விக்கெட் இழப்பிற்கு 114 ரன்கள் எடுத்தது. தொடக்க ஆட்டக்காரர் கெலிஸ் நட்லோவு 42 ரன்களும், ஷார்னே மேயர்ஸ் 43 ரன்களும் எடுத்து ஆட்டமிழக்காமல் இருந்தனர். இந்திய பந்துவீச்சாளர்களில் நந்தனி சர்மா 2 விக்கெட்டுகளை வீழ்த்தினார். அதேநேரத்தில், கிராந்தி கௌட், ஸ்ரீ சரணி மற்றும் அருந்ததி ரெட்டி ஆகியோர் தலா ஒரு விக்கெட்டை வீழ்த்தினர். இதன் விளைவாக, ஜிம்பாப்வே அணி 114 ரன்கள் மட்டுமே எடுத்தது.
தீப்தி ஷர்மா, நிக்கி பிரசாத் நிதான ஆட்டம்:
115 ரன்கள் என்ற இலக்கைத் துரத்திய இந்தியா, தொடக்கத்திலேயே அடுத்தடுத்து 4 விக்கெட்டுகளை இழந்தது. இதில், கேப்டன் ஸ்மிருதி மந்தனா, ஷபாலி வர்மா மற்றும் ஹர்மன்ப்ரீத் கவுர் விக்கெட்கள் பறி போகின. இருப்பினும், தீப்தி ஷர்மா ஒரு முக்கியமான இன்னிங்ஸை ஆடி, இந்திய மகளிர் அணியை இலக்கிற்கு அருகில் கொண்டு சென்றார். தீப்தி 35 பந்துகளில் 49 ரன்கள் எடுத்தார், இதன் மூலம் தனது அரைசதத்தை எட்டுவதற்கு ஒரு ரன் மட்டுமே தேவை என்ற நிலையில் ஆட்டமிழந்தார்.
தீப்தி சர்மா ஆட்டமிழந்த பிறகும், நிக்கி பிரசாத் இந்திய மகளிர் அணியின் வெற்றிக்கு பொறுப்பேற்றார். நிக்கி தனது அறிமுகப் போட்டியிலேயே முக்கியப் பங்காற்றினார். இறுதியில், இந்தியா வெற்றிக்குத் தேவையான ரன்களை எட்டியது. நிக்கி பிரசாத் கடைசி வரை ஆட்டமிழக்காமல் 35 பந்துகளில் 39 ரன்கள் எடுத்து அணியின் வெற்றிக்கு வழிவகுத்தார். அவரது இன்னிங்ஸில் 6 பவுண்டரிகள் அடங்கும். இறுதியில், அருந்ததி ரெட்டி 2 பந்துகளில் 2 ரன்கள் எடுத்து ஆட்டமிழக்காமல் இருந்தார்.
ALSO READ: இனி முழுநேர கேப்டன்.. பொறுப்பு குறித்து வெளிப்படையாக பேசிய ஸ்மிருதி மந்தனா!
ஸ்மிருதி மந்தனாவுக்கு ஒரு வெற்றிகரமான தொடக்கம்..
ஹர்மன்பிரீத் கவுருக்குப் பிறகு முழுநேர டி20 கேப்டனாகப் பொறுப்பேற்ற ஸ்மிருதி மந்தனாவுக்கு வெற்றியுடன் கேப்டன்சி ஒரு நல்ல தொடக்கத்தைப் பெற்றது. இந்தப் போட்டி மற்றொரு காரணத்திற்காகவும் சிறப்பு வாய்ந்ததாக இருந்தது. இந்திய மற்றும் ஜிம்பாப்வே மகளிர் அணிகள் ஒரு டி20 சர்வதேசப் போட்டியில் சந்தித்தது இதுவே முதல் முறையாகும். இந்த முதல் சந்திப்பில் இந்தியா வெற்றி பெற்றது.
