கந்த சஷ்டி விரதம் 2026: வீட்டிலேயே முருகப்பெருமானை வழிபடுவது எப்படி?

முருகப்பெருமானுக்கு உகந்த விரதங்களில் மிகவும் சிறப்பு வாய்ந்ததாகக் கருதப்படுவது கந்த சஷ்டி விரதம் (Kanda Sashti Vratam). ஆறு நாட்கள் கடைப்பிடிக்கப்படும் இந்த விரதத்தின் மூலம் மனத்தூய்மை, தீய எண்ணங்களில் இருந்து விடுபடுதல் மற்றும் இறை அருளைப் பெறலாம் என்பது பக்தர்களின் நம்பிக்கையாக உள்ளது. கோவிலுக்குச் செல்ல முடியாதவர்கள் வீட்டிலேயே எளிய முறையில் இந்த விரதத்தை எப்படிக் கடைப்பிடிக்கலாம் என்பதைப் பார்க்கலாம். குறிப்பாக முதல் நாளில் தேவையற்ற ஆசைகளையும் உலகப் பற்றுகளையும் குறைத்து, மனதை இறைவழிபாட்டில் செலுத்த வேண்டும் என்பது ஆன்மிக நம்பிக்கையாக உள்ளது.

Also Read: கந்த சஷ்டி: பூஜை அறையைச் சூப்பராக அலங்கரிக்க 7 கெத்து ஐடியாக்கள்!

வீட்டிலேயே விரதத்தைத் தொடங்கும் முறை

கந்த சஷ்டி விரதத்தைத் தொடங்குவதற்கு முன்பு அதிகாலையில் எழுந்து குளித்து, தூய்மையான ஆடைகளை அணிய வேண்டும். பின்னர் வீட்டின் பூஜை அறையைச் சுத்தம் செய்து, முருகப்பெருமானின் படம் அல்லது சிலைக்கு மலர்களால் அலங்காரம் செய்யலாம். சிவப்பு, மஞ்சள் அல்லது பச்சை நிற ஆடைகளை அணிந்து வழிபடுவது சிறப்பானதாகக் கருதப்படுகிறது. கோவிலுக்குச் செல்ல வாய்ப்புள்ளவர்கள் அர்ச்சகர் மூலம் காப்புக் கட்டிக்கொண்டு விரதத்தைத் தொடங்கலாம். வீட்டிலேயே விரதம் இருப்பவர்களும் முருகப்பெருமானை மனதார நினைத்து விரத உறுதியை எடுத்துக்கொள்ளலாம்.

ஆறு நாட்களும் கடைப்பிடிக்க வேண்டிய உணவு முறை

கந்த சஷ்டி விரதத்தின்போது அவரவர் உடல்நிலைக்கு ஏற்ப உணவு முறையைத் தேர்வு செய்து கொள்ளலாம். சிலர் முழுமையாக உணவு தவிர்த்து உபவாசம் இருப்பார்கள். மற்றவர்கள் பால் மற்றும் பழங்களை மட்டும் உட்கொண்டு விரதம் கடைப்பிடிப்பார்கள். மேலும் சிலர் ஒரு வேளை உப்பு மற்றும் காரம் குறைந்த எளிய சைவ உணவை எடுத்துக்கொள்வார்கள். எந்த முறையைப் பின்பற்றினாலும், உடல்நலத்தைப் பாதிக்காத வகையில் விரதம் இருப்பது அவசியம்.

தினமும் செய்ய வேண்டிய முருகப்பெருமான் வழிபாடு

விரதம் இருக்கும் ஆறு நாட்களிலும் காலையிலும் மாலையிலும் வீட்டில் விளக்கேற்றி முருகப்பெருமானை வழிபட வேண்டும். குறிப்பாக நெய் தீபம் ஏற்றி, அரளி, செம்பருத்தி போன்ற சிவப்பு நிற மலர்களால் அலங்கரிக்கலாம். தினமும் கந்த சஷ்டி கவசம், கந்த குரு கவசம், கந்தர் அலங்காரம் மற்றும் கந்தர் அனுபூதி போன்ற பாடல்களைப் பாராயணம் செய்யலாம். தங்களுடைய வேண்டுதல்களுக்கு ஏற்ப திருப்புகழ் பாடல்களையும் காலையிலும் மாலையிலும் பாராயணம் செய்து வழிபடுவது சிறப்பாகக் கருதப்படுகிறது.

Also Read: கந்த சஷ்டி: பூஜை அறையைச் சூப்பராக அலங்கரிக்க 7 கெத்து ஐடியாக்கள்!

ஆறு நாட்கள் விரதத்தின் ஆன்மிக நோக்கம்

கந்த சஷ்டி விரதம் என்பது உணவு கட்டுப்பாட்டுடன் இருப்பது மட்டுமல்லாமல், மனதில் இருக்கும் தீய எண்ணங்கள் மற்றும் எதிர்மறை குணங்களை அகற்றுவதற்கான ஆன்மிகப் பயிற்சியாகவும் பார்க்கப்படுகிறது. சூரபத்மன் உள்ளிட்ட அசுரர்களை முருகப்பெருமான் அழித்ததைப் போல, மனிதர்களுக்குள் இருக்கும் கோபம், பேராசை, பொறாமை, அளவுக்கு மீறிய ஆசை போன்ற குணங்களைக் கட்டுப்படுத்த வேண்டும் என்பதையும் இந்த விரதம் உணர்த்துகிறது.