2027 ஹஜ் யாத்திரை: தமிழக அரசின் புதிய விதி, விண்ணப்ப வழிகாட்டி!
Haj 2027 Pilgrimage: 2027-ஆம் ஆண்டு புனித ஹஜ் பயணத்திற்கு விண்ணப்பிக்க விரும்புவோர் 'Haj Suvidha' செயலி அல்லது அதிகாரப்பூர்வ இணையதளம் மூலம் வரும் ஜூலை 20-ஆம் தேதிக்குள் இலவசமாக விண்ணப்பிக்கலாம். சவூதி அரேபிய அரசின் புதிய விதிகளின்படி, பயணிகள் கட்டாயமாக 'நுஸுக்' அடையாள அட்டை (Nusuk Card) மற்றும் போலியோ, மூளைக்காய்ச்சல் தடுப்பூசி சான்றிதழ்களைப் பெற்றிருக்க வேண்டும்.
இஸ்லாமிய மார்க்கத்தின் மிக முக்கியமான ஐந்து கடமைகளில் ஒன்றாகக் கருதப்படும் ஹஜ் புனிதப் பயணத்தை ஆண்டுதோறும் லட்சக்கணக்கான மக்கள் மேற்கொண்டு வருகின்றனர். கடந்த 2026-ஆம் ஆண்டிற்கான புனித யாத்திரை வெற்றிகரமாக நிறைவடைந்ததைத் தொடர்ந்து, தற்போது வரும் 2027-ஆம் ஆண்டுக்கான ஹஜ் பயணத்திற்கான அதிகாரப்பூர்வ அறிவிப்பை தமிழ்நாடு அரசு வெளியிட்டுள்ளது. இந்த அறிவிப்பில் விண்ணப்பிக்கும் முறை, அதற்கான தகுதிகள் மற்றும் கடைப்பிடிக்க வேண்டிய அத்தியாவசிய விதிமுறைகள் தெளிவாக விளக்கப்பட்டுள்ளன. உடல் ரீதியாகவும், பொருளாதார ரீதியாகவும் தகுதி வாய்ந்த நபர்கள் தங்களின் வாழ்நாளில் ஒருமுறையாவது இந்த புனிதப் பயணத்தை மேற்கொள்ள வேண்டும் என்பது விதியாகும்.
விண்ணப்பிக்கும் வழிமுறைகள் மற்றும் முக்கிய தேதிகள்
புனித ஹஜ் பயணத்தை மேற்கொள்ள விரும்பும் இந்திய யாத்ரீகர்கள், அதிகாரப்பூர்வ இணையதளமான ‘hajcommittee.gov.in’ மூலமாகவோ அல்லது ‘Haj Suvidha’ என்ற மொபைல் செயலி வழியாகவோ தங்களின் விண்ணப்பங்களை எவ்வித கட்டணமுமின்றி இலவசமாகச் சமர்ப்பிக்கலாம். தமிழ்நாட்டைச் சேர்ந்த விண்ணப்பதாரர்கள் தமிழ்நாடு மாநில ஹஜ் கமிட்டி மூலமாகவும் இதற்கான வழிகாட்டுதல்களையும் உதவிகளையும் பெற வழிவகை செய்யப்பட்டுள்ளது. வரும் 2027-ஆம் ஆண்டு மே மாதம் 15-ஆம் தேதி இந்த புனித யாத்திரை தொடங்கும் என எதிர்பார்க்கப்படும் நிலையில், தகுதியான விண்ணப்பதாரர்கள் இந்த ஆண்டு ஜூலை மாதம் 20-ஆம் தேதிக்குள் தங்களது விண்ணப்பங்களைச் சமர்ப்பிக்க வேண்டும் என்று தமிழக அரசு கெடு விதித்துள்ளது.
கட்டாய மருத்துவ விதிமுறைகள் மற்றும் ஆவணங்கள்
ஹஜ் பயணத்திற்கு விண்ணப்பிக்கும் ஒவ்வொரு நபரிடமும் தகுதியான, செல்லுபடியாகும் இந்திய பாஸ்போர்ட் இருப்பது அவசியமாகும். மேலும், சவூதி அரேபிய அரசாங்கத்தின் புதிய விதிமுறைகளின்படி, யாத்ரீகர்கள் ‘நுஸுக்’ அட்டை (Nusuk ID Card) வைத்திருப்பது கட்டாயமாக்கப்பட்டுள்ளது. மருத்துவப் பாதுகாப்பைக் கருத்தில் கொண்டு, மூளைக்காய்ச்சல் (மெனிங்கோகோகல்) மற்றும் போலியோ ஆகிய நோய்களுக்கான தடுப்பூசி செலுத்தியதற்கான சான்றிதழ்களை யாத்ரீகர்கள் சமர்ப்பிக்க வேண்டும். இந்திய ஹஜ் குழுவின் கீழ் பதிவு செய்து பயணிப்பவர்கள், தங்கள் வாழ்நாளில் ஒரே ஒரு முறை மட்டுமே இந்தச் சலுகையைப் பயன்படுத்தி ஹஜ் பயணம் மேற்கொள்ள முடியும் என்பது குறிப்பிடத்தக்கது.
நிதி விவரங்கள் மற்றும் புனிதச் சடங்குகள்
விண்ணப்பித்தவர்களில் குலுக்கல் முறையில் தேர்வு செய்யப்படும் பயணிகள், தங்களின் பயணத்திற்கான முதல் தவணைத் தொகையாக ரூபாய் 1,52,300 செலுத்துவதற்குத் தயாராக இருக்குமாறு அறிவுறுத்தப்பட்டுள்ளனர். மக்கா நகரைச் சென்றடையும் யாத்ரீகர்கள் இஹ்ராம் அணிதல், கஃபாவை வலம் வருதல் (தவாஃப்), சஃபா மற்றும் மர்வா மலைகளுக்கு இடையே நடத்தல் (ஸஃயீ), அரஃபா மைதானத்தில் தங்குதல் மற்றும் ஜமராத் பகுதியில் கல் எறிந்து தியாகப் பிராணி கொடுத்தல் ஆகிய ஐந்து முக்கிய புனிதச் சடங்குகளை நிறைவேற்றுவர். துல்லியமான ஹஜ் தேதிகள் அனைத்தும் இஸ்லாமிய சந்திர நாட்காட்டியின்படி பிறை தெரிவதைக் கொண்டே இறுதி செய்யப்படும்.
