ஃபிரிட்ஜுக்கு கவர் போடுபவரா? உங்க கரண்ட் பில் எகிற இதுதான் காரணம்!
Refrigerator: குளிர்சாதனப் பெட்டியின் மீது கவர் போடுவதால் பின்புறம் மற்றும் பக்கவாட்டில் வெளியேற வேண்டிய வெப்பக் காற்று உள்ளேயே தங்கி, கம்ப்ரஸருக்கு அதிக அழுத்தத்தைக் கொடுத்து சாதனத்தை விரைவில் பழுதடையச் செய்கிறது. வெப்பம் தணியாமல் கம்ப்ரஸர் இடைவெளியின்றி இயங்குவதால் மின்சாரப் பயன்பாடு கணிசமாக அதிகரித்து மாத இறுதியில் கரண்ட் பில் பெருமளவில் உயர்கிறது.
வீட்டில் உள்ள குளிர்சாதனப் பெட்டியை (ஃபிரிட்ஜ்) தூசிகள் அடையாமல் சுத்தமாக வைத்துக்கொள்ள வேண்டும் என்ற எண்ணத்தில், பெரும்பாலான வீடுகளில் அதன் மீது அழகுக்காகவும் பாதுகாப்பிற்காகவும் பிளாஸ்டிக் அல்லது துணி கவர்களைப் பயன்படுத்துகிறோம். ஆனால், நாம் செய்யும் இந்த சிறிய தவறு ஃபிரிட்ஜின் செயல்பாட்டைப் பாதிப்பதோடு, எதிர்பாராத பல பொருளாதார மற்றும் பாதுகாப்பு அச்சுறுத்தல்களுக்கு வழிவகுக்கிறது என்பதைப் பலரும் உணர்வதில்லை.
கவர் போடுவது எப்படி ஆபத்தானது?
குளிர்சாதனப் பெட்டி இயங்கும்போது அதன் உட்புறத்தில் உள்ள வெப்பமானது பின்புறம் மற்றும் பக்கவாட்டுப் பகுதிகள் வழியேதான் வெளியேறுகிறது. ஆனால் ஃபிரிட்ஜின் மீது மேலுறை (கவர்) போடும்போது, அவ்வாறு வெளியேறும் வெப்பக் காற்று தடுக்கப்பட்டு சாதனத்தின் உள்ளேயே தேங்கத் தொடங்குகிறது. இதன் காரணமாக கம்ப்ரஸர் மீது அளவுக்கு அதிகமான அழுத்தம் ஏற்பட்டு, சாதனத்தின் ஒட்டுமொத்த ஆயுட்காலமும் குறையக்கூடும்.
பின்புறம் சூடாவது ஏன்?
ஃபிரிட்ஜின் உள்ளே இருக்கும் பொருட்களைக் குளிர்விப்பதற்காக, அதன் கம்ப்ரஸர் மற்றும் கன்டென்சர் சுருள்கள் தொடர்ந்து உழைக்கின்றன. இந்தச் செயல்பாட்டின் போது இயற்கையாகவே அதிக வெப்பம் உருவாகிறது. சுற்றிலும் போதிய காற்றோட்டம் இருந்தால் மட்டுமே இந்த வெப்பம் எளிதில் தணிந்து சாதனம் சீராக இயங்கும். கவர் போட்டு மூடும்போது இயல்பான காற்றுச் சுழற்சி தடைபட்டு, சாதனம் மிக விரைவாக சூடேறும் நிலை ஏற்படுகிறது.
அதிகமாக சூடாவது எப்படி?
வெப்பம் வெளியேற முடியாத சூழலில், உள் வெப்பநிலையைக் கட்டுப்படுத்த முடியாமல் ஃபிரிட்ஜின் உணரிகளும் (Sensors) பிற மின் பாகங்களும் கடும் பாதிப்புக்கு உள்ளாகின்றன. இதனால் கம்ப்ரஸருக்கு அதிக சிரமம் ஏற்பட்டு, வயரிங் உருகும் சூழல் உண்டாகிறது. சில தீவிரமான நேரங்களில் இது மின் கசிவையோ அல்லது எதிர்பாராத தீ விபத்துகளையோ கூட ஏற்படுத்தக்கூடும்.
மின் கட்டணம் அதிகமாக வரலாம்!
வெப்பம் வெளியேறாமல் உள்கட்டமைப்பில் தங்குவதால், நிர்ணயிக்கப்பட்ட குளிர்ச்சியை எட்ட கம்ப்ரஸர் இடைவெளியின்றித் தொடர்ந்து இயங்க வேண்டிய கட்டாயத்திற்குத் தள்ளப்படுகிறது. இயல்பான அளவை விட அதிக நேரமும் ஆற்றலுடனும் கம்ப்ரஸர் செயல்படுவதால், மின்சாரப் பயன்பாடு பல மடங்கு அதிகரித்து மாத இறுதியில் மின்கட்டணம் வழக்கத்தை விடக் கணிசமாக உயரக் காரணமாகிறது.
உணவுப் பொருட்கள் சீக்கிரம் கெட்டுப்போகலாம்!
வெப்ப பரிமாற்றம் சரியாக நடைபெறாததால் ஃபிரிட்ஜின் உட்புறத்தில் ஒரே சீரான குளிர்ச்சி நிலவுவதில்லை. இதன் விளைவாக, உள்ளே சேமித்து வைக்கப்படும் காய்கறிகள், பால் மற்றும் எஞ்சிய உணவுகள் தங்களது தன்மையை இழந்து மிக விரைவாகக் கெட்டுப்போகின்றன. மேலும், முறையற்ற குளிர்ச்சியால் பனி உறைந்து தண்ணீர் கசிவு, துர்நாற்றம் மற்றும் பூஞ்சை காளான்கள் உருவாகவும் இது வழிவகுக்கிறது.
பொறுப்புத் துறப்பு: இத்தளத்தில் உள்ள லைப்ஸ்டைல், ஆரோக்கியம் மற்றும் உணவு சார்ந்த தகவல்கள் பொதுவான விழிப்புணர்விற்காக மட்டுமே; இவை மருத்துவ ஆலோசனையல்ல. இதில் உள்ள குறிப்புகளைப் பின்பற்றும் முன் தகுந்த நிபுணர் அல்லது மருத்துவரின் ஆலோசனையைப் பெறுவது அவசியமாகும்.
