இரவில் பஞ்சு போன்ற தூக்கம் பெற மெலடோனினா? மெக்னீசியமா?

இன்றைய நவீன வாழ்க்கை முறையில் பணி அழுத்தம், கணினி மற்றும் கைபேசித் திரைகளின் பயன்பாடு காரணமாக பலருக்கும் இரவில் அமைதியான தூக்கம் என்பது பெரும் சவாலாக மாறியுள்ளது. இதன் காரணமாக, தூக்கமின்மைப் பிரச்சினையைச் சமாளிக்க பலர் ‘மெலடோனின்’ (Melatonin) மற்றும் ‘மெக்னீசியம்’ (Magnesium) ஆகிய சப்ளிமென்ட்களை அதிகளவில் பயன்படுத்தத் தொடங்கியுள்ளனர். ஆனால், இவை இரண்டில் எது உண்மையில் சிறந்த தூக்கத்தைத் தரும் என்ற கேள்வி பலரிடமும் எழுந்துள்ளது. இது குறித்து மருத்துவ நிபுணர்கள் வெளியிட்டுள்ள முக்கியத் தகவல்கள் இதோ:

தூக்கச் சுழற்சியை சீராக்கும் மெலடோனின்

மெலடோனின் என்பது நமது மூளையிலுள்ள ‘பினியல் சுரப்பி’ மூலம் இயற்கையாகவே சுரக்கப்படும் ஒரு ஹார்மோன் ஆகும். இருள் சூழும்போது மூளைக்கு தூங்கும் நேரத்தை உணர்த்தும் சிக்னலாக இது செயல்படுகிறது. வெளிநாடுகளுக்குப் பயணம் செய்யும்போது ஏற்படும் ‘ஜெட் லேக்’ (Jet Lag) மற்றும் இரவு நேர ஷிப்ட் வேலைகளால் உடலின் இயற்கை கடிகாரம் (Circadian Rhythm) பாதிக்கப்படுபவர்களுக்கு மெலடோனின் மிகவும் பயனுள்ளதாக இருக்கும். இது நீங்கள் விரைவில் தூங்குவதற்கு உதவுமே தவிர, தூக்கத்தை ஆழமாக்குவதில்லை என மருத்துவர்கள் சுட்டிக்காட்டுகின்றனர்.

மனதை அமைதிப்படுத்தும் மெக்னீசியம்

மறுபுறம், மெக்னீசியம் என்பது நாம் உட்கொள்ளும் உணவில் காணப்படும் ஒரு அத்தியாவசிய தாது உப்பு (Mineral) ஆகும். இது நரம்பு மண்டலத்தை அமைதிப்படுத்தவும், த தசைகளைத் தளர்த்தவும் பெரிதும் உதவுகிறது. மூளையில் உள்ள ‘காபா’ (GABA) எனப்படும் நரம்பியல் வேதிப்பொருளைக் கட்டுப்படுத்தி, மன அழுத்தத்தைக் குறைப்பதில் மெக்னீசியம் முக்கியப் பங்கு வகிக்கிறது. தூங்குவதில் சிரமம் உள்ளவர்களை விட, இரவில் அடிக்கடி விழிப்பவர்கள் மற்றும் பதற்றத்தால் தூக்கமின்மையால் அவதிப்படுபவர்களுக்கு மெக்னீசியம் நல்ல தீர்வை அளிக்கிறது.

Also Read: அசல் உடன்குடி கருப்பட்டியைக் கண்டறிவது எப்படி? போலி பித்தலாட்டம் அம்பலம்!

உங்களது தேவைக்கேற்ப சரியான தேர்வு

மெலடோனின் மற்றும் மெக்னீசியம் ஆகிய இரண்டும் முற்றிலும் வெவ்வேறு வழிகளில் உடலில் செயல்படுகின்றன. உங்கள் உடலின் தூக்க சுழற்சி பாதிக்கப்பட்டு, தூக்கம் வர காலதாமதமானால் மெலடோனின் சிறந்த தேர்வாக இருக்கும். மாறாக, அதிக மன அழுத்தம், தசைப்பிடிப்பு அல்லது இரவில் ஆழ்ந்த தூக்கம் இல்லாமை போன்ற பிரச்சினைகள் இருந்தால் மெக்னீசியம் சிறந்த பலனைத் தரும். எனினும், சுய மருத்துவமாக இவற்றை உட்கொள்வதைத் தவிர்த்து, மருத்துவரின் ஆலோசனையைப் பெற்ற பின்னரே சரியான அளவில் எடுத்துக்கொள்வது பாதுகாப்பானது என்று நிபுணர்கள் எச்சரிக்கின்றனர்.

பொறுப்புத் துறப்பு: இத்தளத்தில் உள்ள லைப்ஸ்டைல், ஆரோக்கியம் மற்றும் உணவு சார்ந்த தகவல்கள் பொதுவான விழிப்புணர்விற்காக மட்டுமே; இவை மருத்துவ ஆலோசனையல்ல. இதில் உள்ள குறிப்புகளைப் பின்பற்றும் முன் தகுந்த நிபுணர் அல்லது மருத்துவரின் ஆலோசனையைப் பெறுவது அவசியமாகும்.