AQI
TV9 NETWORK LOGO
Default Image
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

Latest Newsதமிழ்நாடுகிரிக்கெட்பொழுதுபோக்குவெப் ஸ்டோரிஸ்லைஃப்ஸ்டைல்வணிகம்டெக்னாலஜிஇந்தியாஆன்மீகம்உலகம்ஹெஃல்த்வைரல்போட்டோ கேலரி

குளிர்காலத்திலும் வீட்டிற்குள் பூத்துக் குலுங்கும் 6 அழகான செடிகள்!

Cold Weather: குளிர்காலத்திலும் வீட்டிற்குள் அழகாகப் பூக்கக்கூடிய கிறிஸ்துமஸ் கற்றாழை, ஆப்பிரிக்கன் வயலட், சைக்லமன், அமரில்லிஸ், ஆர்க்கிட் மற்றும் கலன்கோ ஆகிய ஆறு செடிகளை வளர்க்கலாம். இவை குறைந்த இடத்திலும் வளரக்கூடியதுடன், வீட்டிற்கு இயற்கையான அழகையும் புத்துணர்ச்சியையும் தருகின்றன. ஒவ்வொரு செடிக்கும் ஏற்ற சூரிய ஒளி, தண்ணீர் மற்றும் பராமரிப்பு முறைகளைப் பின்பற்றினால் குளிர்காலத்திலும் அழகான மலர்களைப் பெறலாம்.

குளிர்காலத்திலும் வீட்டிற்குள் பூத்துக் குலுங்கும் 6 அழகான செடிகள்!
உட்புறச் செடிகள்Image Source: social media
Sivasankari Bose
Sivasankari Bose | Published: 21 Nov 2026 10:29 AM IST

குளிர்காலம் (Indoor Plants) தொடங்கிவிட்டாலே வெளிப்புறத் தோட்டங்களில் பூக்கள் பூப்பது குறையத் தொடங்கும். குளிர்ந்த வானிலை மற்றும் குறைவான சூரிய ஒளி காரணமாகப் பல செடிகளின் வளர்ச்சியும் பாதிக்கப்படலாம். ஆனால், வீட்டிற்குள் வளர்க்கக்கூடிய சில செடிகள் குளிர்காலத்திலும் அழகான பூக்களைத் தரும். அதிக பராமரிப்பு தேவையில்லாமல் வீட்டிற்கு இயற்கையான அழகையும் புத்துணர்ச்சியையும் கொடுக்கக்கூடிய அத்தகைய ஆறு செடிகள் குறித்து பார்க்கலாம்.

Also Read: தினமும் ஆலிவ் எண்ணெய் சாப்பிட்டால் உடலில் நடக்கும் அதிசய மாற்றங்கள்!

1. கிறிஸ்துமஸ் கற்றாழை

பொதுவாகக் கற்றாழை என்றாலே வெப்பமான சூழலில் வளரக்கூடியது என்ற எண்ணம் இருக்கும். ஆனால், கிறிஸ்துமஸ் கற்றாழை குளிர்ச்சியான சூழலிலும் நன்றாக வளரக்கூடியது. குறிப்பாக, டிசம்பர் மாதத்தில் இளஞ்சிவப்பு, சிவப்பு மற்றும் வெள்ளை நிறங்களில் அழகான மலர்களைப் பூக்கச் செய்யும். இதை அதிக வெப்பம் இல்லாத, போதுமான வெளிச்சம் கிடைக்கும் ஜன்னல் அருகில் வைக்கலாம். மண்ணின் மேற்பகுதி உலர்ந்ததும் தண்ணீர் ஊற்றுவது நல்லது.

2. ஆப்பிரிக்கன் வயலட்

சிறிய அளவில் வளரக்கூடிய ஆப்பிரிக்கன் வயலட் செடி, வீட்டிற்குள் வளர்ப்பதற்கு ஏற்றது. ஊதா, இளஞ்சிவப்பு மற்றும் வெள்ளை நிறங்களில் பூக்களைத் தரக்கூடிய இந்தச் செடி, குளிர்காலத்திலும் தொடர்ந்து பூக்கக்கூடிய தன்மை கொண்டது. நேரடியாகச் சூரிய ஒளி படாத இடத்தில் வைப்பதுடன், மண்ணில் ஈரப்பதத்தைச் சீராகப் பராமரிக்க வேண்டும். இலைகளின் மீது குளிர்ந்த நீர் படாமல் பார்த்துக்கொள்வதும் அவசியம்.

3. சைக்லமன்

இதய வடிவிலான பச்சை மற்றும் வெள்ளி நிறக் கலவையிலான இலைகளைக் கொண்ட சைக்லமன் செடி பார்ப்பதற்கு மிகவும் அழகாக இருக்கும். குளிர்ந்த காலநிலையில் பட்டாம்பூச்சிகளைப் போன்ற தோற்றமுடைய மலர்களைப் பூக்கும். அதிக வெப்பம் இல்லாத அறைகளிலும், போதுமான வெளிச்சம் கிடைக்கும் ஜன்னல் ஓரங்களிலும் இதை வளர்க்கலாம். மண் உலரும்போது தண்ணீர் ஊற்றுவதுடன், வாடிய பூக்களை அகற்றுவது புதிய மொட்டுகள் உருவாக உதவும்.

4. அமரில்லிஸ்

வீட்டிற்குள் பெரிய அளவிலான அழகான பூக்களை வளர்க்க விரும்புபவர்களுக்கு அமரில்லிஸ் செடி சிறந்த தேர்வாக இருக்கும். இதன் கிழங்கை இலையுதிர் காலத்தின் இறுதியில் நட்டு வைத்தால், சுமார் ஆறு முதல் எட்டு வாரங்களில் மலர்கள் பூக்கத் தொடங்கும். சிவப்பு, இளஞ்சிவப்பு மற்றும் வெள்ளை நிறங்களில் பெரிய பூக்களைத் தரும். நல்ல சூரிய ஒளி கிடைக்கும் இடத்தில் வைத்து, மண்ணில் லேசான ஈரப்பதத்தைப் பராமரிக்க வேண்டும்.

5. ஆர்க்கிட்

வீட்டிற்கு அழகான தோற்றத்தைக் கொடுக்கக்கூடிய பூச்செடிகளில் ஆர்க்கிட்டும் முக்கியமானது. இலையுதிர் காலத்தில் ஏற்படும் லேசான வெப்பநிலை மாற்றம் இதன் பூக்கும் தன்மையைத் தூண்டக்கூடும். இதன் மலர்கள் நீண்ட காலம் வாடாமல் இருப்பது மற்றொரு சிறப்பம்சமாகும். சாதாரண மண்ணுக்குப் பதிலாக ஆர்க்கிட் வளர்ப்பதற்கான மரப்பட்டைகளைப் பயன்படுத்தலாம். போதுமான வடிகட்டிய வெளிச்சம் கிடைக்கும் இடத்தில் வைத்து, வாரத்திற்கு ஒருமுறை தண்ணீர் ஊற்றி அதிகப்படியான நீரை வெளியேற்ற வேண்டும்.

6. கலன்கோ

தடிமனான இலைகளையும் கொத்துக் கொத்தாகப் பூக்கும் சிறிய மலர்களையும் கொண்டது கலன்கோ செடி. சிவப்பு, மஞ்சள், இளஞ்சிவப்பு உள்ளிட்ட பல்வேறு நிறங்களில் பூக்களைத் தரக்கூடிய இந்தச் செடி, குறைந்த தண்ணீரிலும் வளரக்கூடியது. இதன் இலைகளில் நீரைச் சேமித்து வைக்கும் தன்மை இருப்பதால், குளிர்காலத்தில் வீட்டிற்குள் நிலவும் வறண்ட சூழலையும் ஓரளவுக்குத் தாங்கும். சூரிய ஒளி கிடைக்கும் ஜன்னல் அருகில் வைத்து, மண் முழுமையாக உலர்ந்த பிறகு தண்ணீர் ஊற்றலாம். வாடிய பூக்களை அவ்வப்போது அகற்றினால் புதிய பூக்கள் உருவாக உதவும்.

Also Read: தினமும் ஆலிவ் எண்ணெய் சாப்பிட்டால் உடலில் நடக்கும் அதிசய மாற்றங்கள்!

வீட்டுத் தோட்டத்தை அழகாக்கலாம்!

குளிர்காலத்திலும் வீட்டிற்குள் பூக்களைப் பூக்கச் செய்ய விரும்புபவர்கள் இந்த ஆறு செடிகளையும் தேர்வு செய்யலாம். ஒவ்வொரு செடிக்கும் ஏற்ற வெளிச்சம், தண்ணீர் மற்றும் பராமரிப்பு முறைகளைப் பின்பற்றினால் வீட்டின் அழகை இயற்கையான முறையில் அதிகரிக்கலாம்.

Follow Us