ரூ.27 லட்சம் வரை மருத்துவ உதவி… தமிழக அரசின் புதிய காப்பீட்டுத் திட்டம் ஜூலை 1 முதல் அமல்..

ஜூன் 26, 2026: தமிழக அரசு ஊழியர்கள், அரசு ஓய்வூதியதாரர்கள் மற்றும் தகுதியுடைய குடும்ப உறுப்பினர்களுக்காக புதிய மருத்துவக் காப்பீட்டுத் திட்டம் – 2026 அமல்படுத்தப்பட்டுள்ளது. இந்தத் திட்டம் வரும் ஜூலை 1-ஆம் தேதி முதல் அடுத்த ஐந்து ஆண்டுகளுக்கு நடைமுறையில் இருக்கும் என தமிழக அரசு அறிவித்துள்ளது. அரசு ஊழியர்கள் மற்றும் அரசு ஓய்வூதியதாரர்களுக்காக செயல்பட்டு வரும் மருத்துவக் காப்பீட்டுத் திட்டம், புதிய அம்சங்களுடன் புதுப்பிக்கப்பட்டுள்ளது.

அரசு ஊழியர்கள், ஓய்வூதியதாரர்களுக்கு புதிய மருத்துவ காப்பீடு:

இதன்படி, தகுதியுடைய குடும்ப உறுப்பினர்களும் அங்கீகரிக்கப்பட்ட அரசு மற்றும் தனியார் மருத்துவமனைகளில் பணமில்லா (Cashless) சிகிச்சை பெறும் வசதி வழங்கப்பட்டுள்ளது. இந்தத் திட்டத்தின் கீழ், ஒரு குடும்பத்திற்கு ரூ.7.50 லட்சம் வரை மருத்துவச் செலவுகளுக்கான காப்பீட்டு வசதி வழங்கப்படுகிறது. மேலும், குறிப்பிட்ட 46 வகையான தீவிர நோய்களுக்காக, ஒரு குடும்பத்திற்கு ரூ.12 லட்சம் வரை பணமில்லா சிகிச்சை பெறும் சிறப்பு வசதியும் ஏற்படுத்தப்பட்டுள்ளது.

மேலும் படிக்க: சட்டப்பேரவையில் குட்டி கதை சொல்லி விமர்சித்த முதல்வர் விஜய்.. நிதியமைச்சர் நிர்மலா சீதாராமன் கொடுத்த ரியாக்ஷன்!!

அரசு ஊழியர்களுக்கு கூடுதலாக கார்பஸ் (Corpus) நிதி மூலம் ரூ.15 லட்சம் வரை நிதியுதவி வழங்கப்படுவதால், மொத்தமாக ரூ.27 லட்சம் வரை மருத்துவ உதவியைப் பெறும் வாய்ப்பு உள்ளது.

முக்கிய அம்சங்கள் என்ன?

புதிய மருத்துவக் காப்பீட்டுத் திட்டத்தில் 2,992 வகையான சிகிச்சைகள் மற்றும் அறுவைச் சிகிச்சைகள் இடம்பெற்றுள்ளன. மேலும், மாநிலம் முழுவதும் 1,535 அரசு மற்றும் தனியார் மருத்துவமனைகள் இந்தத் திட்டத்தின் கீழ் இணைக்கப்பட்டுள்ளதாக தெரிவிக்கப்பட்டுள்ளது.

மேலும் படிக்க: ‘Start Run, Stop Drugs’ ஓட்டம்.. மக்களுடன் இணைந்து மாரத்தானில் பங்கேற்ற முதலமைச்சர் விஜய்..

தூய்மைப் பணியாளர்கள், அங்கன்வாடி பணியாளர்கள், சத்துணவு ஊழியர்கள் உள்ளிட்ட பல்வேறு பிரிவினரும் இந்த மருத்துவக் காப்பீட்டுத் திட்டத்தில் இணைக்கப்பட்டுள்ளனர். மேலும், குறைந்த ஊதியம் பெறும் பணியாளர்களுக்கான காப்பீட்டு பிரீமியம் தொகையை தமிழக அரசே ஏற்கும் என்றும் அரசு தெரிவித்துள்ளது.

இந்த புதிய மருத்துவக் காப்பீட்டுத் திட்டத்தின் மூலம் அரசு ஊழியர்கள், ஓய்வூதியதாரர்கள் மற்றும் அவர்களது குடும்பத்தினருக்கு தரமான மருத்துவச் சேவைகள் எளிதாகவும், நிதிச் சுமையின்றியும் கிடைப்பதை உறுதி செய்வதே அரசின் நோக்கமாகும்.