“ஆடு, மாடுகளுக்குத் தான் ரேஷன் அரிசி”.. அமைச்சர் செங்கோட்டையன் சொன்ன அந்த ஒரு வார்த்தை.. கொந்தளித்த திமுக உறுப்பினர்கள்!!

சென்னை, ஆகஸ்ட் 20: தமிழ்நாடு சட்டப்பேரவைக் கூட்டத்தொடரில், பொதுவிநியோகத் திட்டத்தின் கீழ் ரேஷன் கடைகளில் வழங்கப்படும் அரிசியின் தரம் மற்றும் சன்னரக அரிசி விநியோகம் தொடர்பாக ஆளுங்கட்சிக்கும் எதிர்க்கட்சிக்கும் இடையே மிகக் காரசாரமான விவாதங்கள் நடைபெற்றன. ரேஷன் அரிசியின் பயன்பாடு குறித்து அமைச்சர் கே.ஏ. செங்கோட்டையன் தெரிவித்த கருத்துக்கள் பேரவையில் பெரும் சலசலப்பை ஏற்படுத்திய நிலையில், கே.என். நேரு உட்பட திமுக சட்டமன்ற உறுப்பினர் அனைவரும் அதற்குத் தங்களது கடுமையான எதிர்ப்புகளை பதிவு செய்தனர்.

இதையும் படிக்க: தமிழ்நாட்டிலேயே “மனசாட்சியே இல்லாத நிறுவனம் என்எல்சி!”.. பேரவையில் வெடித்த சௌமியா அன்புமணி.. அமைச்சர் அளித்த உறுதி!!

ரேஷன் அரிசி திட்டத்திற்கு பலரும் பாராட்டு:

சட்டமன்றத்தில் பேசிய திமுக உறுப்பினர் கே.என். நேரு, திராவிட முன்னேற்றக் கழக ஆட்சிக் காலத்தில் பொதுவிநியோகத் திட்டம் உலக அளவிலும் தேசிய அளவிலும் பாராட்டைப் பெற்றுள்ளதாகச் சுட்டிக்காட்டினார். “இந்தியாவின் முன்னணி நாளிதழ்களும், உச்ச நீதிமன்ற முன்னாள் நீதிபதிகளும் தமிழ்நாட்டின் ரேஷன் திட்டத்தை மிகச் சிறப்பாகச் செயல்படும் திட்டம் என்று வெகுவாகப் பாராட்டியுள்ளனர். மத்திய அரசுத் தொகுப்பில் இருந்து சத்தீஸ்கர் மாநிலத்தின் மூலம் பெறப்பட்ட அரிசி பழுப்பு நிறத்தில் இருந்ததை அறிந்தவுடன், தமிழ்நாடு முதலமைச்சர் அதை உடனடியாகத் திரும்பப் பெற உத்தரவிட்டார். தொடர்ந்து மத்திய உணவுத் துறை அமைச்சரைச் சந்தித்து, இனி பஞ்சாப் மற்றும் ஆந்திர மாநிலங்களிலிருந்து மட்டுமே தரமான அரிசியை அனுப்ப வேண்டும் என்று ஆணை பெற்று அதை நடைமுறைப்படுத்தினோம்” என்று குறிப்பிட்டார்.

ஆடு, மாடுகளுக்கு ரேஷன் அரிசியா?

மேலும், தமிழ்நாட்டிலேயே கொள்முதல் செய்யப்படும் நெல்லை நவீன தொழில்நுட்பத்துடன் செயலாக்கம் செய்வது குறித்துப் பேசிய அமைச்சர் கே.என். நேரு, “நமது மாநிலத்தில் கொள்முதல் செய்யப்படும் அரிசியை மேலும் வெண்மையாக்கித் தரமாக வழங்குவதற்காக, அரிசி ஆலைகளில் கலர் சாட்டர் (Color Sorter) எனும் நவீன இயந்திரங்களைப் பொருத்துவதற்கு அப்போதைய உணவுத் துறை அமைச்சர் சக்கரபாணிக்கு முதலமைச்சர் உத்தரவிட்டார். இவ்வளவு கட்டமைப்பு நடவடிக்கைகளும், மக்கள் நலன் சார்ந்த பணிகளும் மேற்கொள்ளப்பட்டு வரும் நிலையில், ஏழை எளிய மக்கள் வாங்கிச் சாப்பிடும் ரேஷன் அரிசியை ஆடு, மாடுகளுக்குத் தான் போடுகிறார்கள் என்று ஒரு மூத்த சட்டமன்ற உறுப்பினர் கொச்சப்படுத்திப் பேசுவது எந்த விதத்தில் நியாயம்?” என ஆவேசமாகக் கேள்வி எழுப்பினார்.

இதையும் படிக்க: அம்பேத்கர் அயலகக் கல்வி உதவித்தொகை விவகாரம்.. பேரவையில் அமைச்சர் வன்னியரசு VS கோவி. செழியன் காரசார விவாதம்!!

கொச்சப்படுத்தும் நோக்கில் பேசவில்லை:

இந்த குற்றச்சாட்டிற்குப் பதிலளித்துப் பேசிய அமைச்சர் கே.ஏ. செங்கோட்டையன், “நான் பொதுவிநியோகத் திட்டத்தையோ அல்லது ரேஷன் அரிசியையோ கொச்சப்படுத்தும் நோக்கில் பேசவில்லை. பேரறிஞர் அண்ணா காலத்தில் ‘ஒரு ரூபாய்க்கு ஒரு படி அரிசி’ என்ற லட்சியத் திட்டத்துடன் தொடங்கப்பட்டு வரலாற்றுப் புகழ் பெற்ற திட்டம் இது. ரேஷன் அரிசியைப் பொதுமக்கள் அனைவரும் முழுமையாகப் பயன்படுத்த வேண்டும் என்பதுதான் அரசினுடைய நோக்கமாகவும் இருக்கிறது. எனினும், சில இடங்களில் தரமில்லாத அரிசி வரும்போது கிராமப்புறங்களில் சில பொதுமக்கள் அதை அவ்வாறு பயன்படுத்துவதாகத் தகவல்கள் வந்தன. அந்த குறைபாட்டை அரசின் கவனத்திற்குக் கொண்டு வந்து, மக்கள் விரும்பிச் சாப்பிடும் சன்னரக அரிசியை ரேஷன் கடைகள் மூலம் முழுமையாக வழங்க வலியுறுத்தவே நான் அவ்வாறு குறிப்பிட்டேன்” எனத் தனது தரப்பு விளக்கத்தை அளித்தார்.