அந்தமான் கடலில் உருவாகும் புதிய காற்றழுத்தத் தாழ்வுப் பகுதி – எங்கெல்லாம் மழை?
Tamil Nadu weather today : தெற்கு அந்தமான் கடல் மற்றும் அதையொட்டிய பகுதிகளின் மேல், சுமார் 5.8 கி.மீ. உயரம் வரை வளிமண்டல சுழற்சி ஒன்று நிலவுகிறது. இதன் காரணமாக, அடுத்த 24 மணி நேரத்தில் அதே பகுதியில் புதிய காற்றழுத்தத் தாழ்வுப் பகுதி உருவாகக்கூடும் என வானிலை ஆய்வு மையம் தெரிவித்துள்ளது.
சென்னை, அக்டோபர் 28 : வங்கக்கடலில் உருவான அர்னாப் புயல், மிகத் தீவிரப் புயலாக அக்டோபர் 28, 2026 இன்று அதிகாலை ஆந்திரா – புதுச்சேரியின் ஏனாம் கடற்கரைப் பகுதியில் கரையைக் கடந்தது. புயல் கரையைக் கடந்தபோது, மணிக்கு 125 முதல் 150 கி.மீ. வேகத்தில் சூறைக்காற்று வீசியதாக இந்திய வானிலை ஆய்வு மையம் தெரிவித்துள்ளது.
கரையைக் கடந்த பிறகு வலுவிழந்த அர்னாப், காலை 8.30 மணியளவில் தீவிரப் புயலாக ஆந்திரம், ஏனாம் மற்றும் அதையொட்டிய பகுதிகளில் நிலைகொண்டிருந்தது. இது மேலும் வடக்கு – வடமேற்காக நகர்ந்து, அடுத்த 6 மணி நேரத்தில் சாதாரணப் புயலாக வலுவிழக்கும் என வானிலை ஆய்வு மையம் தெரிவித்துள்ளது.
இதையும் படிக்க : சசிகலா கட்சியில் இருந்து நீக்கம்.. அஇபுதமமுக அதிரடி நடவடிக்கை.. தேர்தலுக்காக கட்சியைப் பயன்படுத்தி கொண்டதாக குற்றச்சாட்டு!!
புயல் கரையைக் கடக்கத் தொடங்கியதிலிருந்து, ஆந்திரா மற்றும் ஒடிசாவின் கடலோர மாவட்டங்களில் அக்டோபர் 27, 2026 இரவு முழுவதும் பலத்த காற்றுடன் கனமழை கொட்டித் தீர்த்தது. குறிப்பாக, ஆந்திர மாநிலம் காக்கிநாடா நகரில் புயலால் கடும் சேதம் ஏற்பட்டது. பல இடங்களில் மரங்கள் வேருடன் சாய்ந்தன. பல பகுதிகளில் மின் இணைப்பு துண்டிக்கப்பட்டது. வாகனப் போக்குவரத்து இன்றிச் சாலைகள் வெறிச்சோடிக் காணப்பட்டன.
அந்தமான் கடலில் புதிய தாழ்வுப் பகுதி
இதற்கிடையே, தெற்கு அந்தமான் கடல் மற்றும் அதையொட்டிய பகுதிகளின் மேல், சுமார் 5.8 கி.மீ. உயரம் வரை வளிமண்டல சுழற்சி ஒன்று நிலவுகிறது. இதன் காரணமாக, அடுத்த 24 மணி நேரத்தில் அதே பகுதியில் புதிய காற்றழுத்தத் தாழ்வுப் பகுதி உருவாகக்கூடும் என வானிலை ஆய்வு மையம் தெரிவித்துள்ளது.
எங்கெல்லாம் மழை?
இதனையடுத்து 2026, அக்டோபர் 28 – 30 ஆகிய 3 நாட்கள் மேற்குத் தொடர்ச்சி மலையையொட்டிய மாவட்டங்களில் ஓரிரு இடங்களில் லேசானது முதல் மிதமான மழையும், தென் தமிழகத்தில் லேசான மழையும் பெய்யக்கூடும். பிற பகுதிகளில் வறண்ட வானிலை நிலவும் என வானிலை மையம் அறிவித்துள்ளது.
மேலும் அக்டோபர் 31, 2026 அன்று மேற்குத் தொடர்ச்சி மலை மாவட்டங்கள், வட தமிழகம், புதுச்சேரி, காரைக்காலில் லேசானது முதல் மிதமான மழை பெய்யக்கூடும் என்றும் நவம்பர் 1, 2026 அன்று மாநிலத்தின் ஓரிரு இடங்களில் லேசானது முதல் மிதமான மழையும், நவம்பர் 2 அன்று வடதமிழகம், புதுச்சேரி, காரைக்காலில் மிதமான மழையும், தென் தமிழகத்தில் லேசானது முதல் மிதமான மழையும் பெய்யக்கூடும் என்றும் அறிவிக்கப்பட்டுள்ளது. அதனைத் தொடர்ந்து நவம்பர் 3, 2026 திருவள்ளூர் மாவட்டத்தில் ஓரிரு இடங்களில் கனமழை பெய்யக்கூடும். வடதமிழகத்தில் மிதமான மழை பெய்ய வாய்ப்புள்ளதாகவும் தெரிவிக்கப்பட்டுள்ளது.
இதையும் படிக்க : இன்று முதல் அமலுக்கு வருகிறது ஆவின் விலை உயர்வு.. நெய், தயிர் மற்றும் இனிப்புப் பொருட்களின் புதிய விலைப்பட்டியல் வெளியீடு!
சென்னை வானிலை நிலவரம்
சென்னையில் இன்றும் நாளையும் வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 34 முதல் 35 டிகிரி செல்சியஸாகவும், குறைந்தபட்ச வெப்பநிலை 25 முதல் 26 டிகிரி செல்சியஸாகவும் இருக்கும்.
