4 தொகுதிகள் காலி.. அடுத்து என்ன நடக்கும்? தவெகவுக்கு இது மேலும் பலமா?

மே 26, 2026: தமிழகத்தில் மொத்தம் உள்ள 234 சட்டமன்ற தொகுதிகளில் தற்போது நான்கு தொகுதிகள் காலியாக உள்ளன. இதனால் தற்போது 230 சட்டமன்ற உறுப்பினர்கள் மட்டுமே உள்ளனர். கடந்த மாதம் நடைபெற்ற சட்டப்பேரவைத் தேர்தலின் வாக்கு எண்ணிக்கை மே 4ஆம் தேதி நடைபெற்றது. இதில் யாரும் எதிர்பார்க்காத வகையில் எந்தக் கட்சிக்கும் தெளிவான பெரும்பான்மை கிடைக்காமல், தொங்கு சட்டமன்றம் அமைந்தது.

2026 சட்டப்பேரவைத் தேர்தலில் அதிமுக, திமுக, நாம் தமிழர் கட்சி மற்றும் தமிழக வெற்றி கழகம் ஆகிய நான்கு முக்கிய கட்சிகள் மோதிய சூழலில், தமிழக வெற்றி கழகம் 108 இடங்களில் வெற்றி பெற்றது. இரண்டாவது இடத்தில் திமுகவும், மூன்றாவது இடத்தில் அதிமுகவும் இருந்தது குறிப்பிடத்தக்கது.

பிற கட்சிகளின் ஆதரவுடன் ஆட்சி அமைத்த தவெக:

இந்த நிலையில், தமிழக வெற்றி கழகம் ஆட்சி அமைப்பதற்கு இந்திய கம்யூனிஸ்ட் கட்சி, மார்க்சிஸ்ட் கம்யூனிஸ்ட் கட்சி, விடுதலை சிறுத்தைகள் கட்சி மற்றும் இந்திய யூனியன் முஸ்லிம் லீக் ஆகிய கட்சிகள் ஆதரவு அளித்தன. அதனைத் தொடர்ந்து நடைபெற்ற சட்டப்பேரவை கூட்டத் தொடரில், தமிழக வெற்றி கழக அரசு தனது பெரும்பான்மையை நிரூபித்தது.

பேரவையில் நடைபெற்ற நம்பிக்கை வாக்கெடுப்பில் 144 சட்டமன்ற உறுப்பினர்கள் ஆதரவு தெரிவித்தனர். அதிமுக தற்போது இரண்டு அணிகளாக பிரிந்து செயல்பட்டு வரும் நிலையில், சி.வி. சண்முகம் – எஸ்.பி. வேலுமணி தலைமையிலான அணியில் இருந்த சில எம்.எல்.ஏ.க்கள் தமிழக வெற்றி கழக அரசுக்கு ஆதரவு அளித்தது அரசியல் வட்டாரத்தில் பெரும் பரபரப்பை ஏற்படுத்தியது.

அதிமுக உட்கட்சி விவகாரம்:

இதற்கிடையில், தமிழக வெற்றி கழகம் குதிரை பேரத்தில் ஈடுபட்டு வருவதாக தொடர்ந்து குற்றச்சாட்டுகள் முன்வைக்கப்பட்டு வருகின்றன. அதிமுக இரண்டு அணிகளாக செயல்பட்டு வரும் சூழலில், மீண்டும் இரு அணிகளையும் ஒன்றிணைப்பதற்கான பேச்சுவார்த்தைகளும் நடைபெற்று வருகின்றன.

தமிழக வெற்றி கழக அமைச்சரவையில் விடுதலை சிறுத்தைகள் கட்சி மற்றும் இந்திய யூனியன் முஸ்லிம் லீக் ஆகிய கட்சிகளுக்கு இடம் வழங்கப்பட்டிருந்தாலும், அதிமுகவுக்கு அமைச்சரவைப் பொறுப்பு வழங்கப்படவில்லை. இதனால் அதிமுகவில் மீண்டும் ஒருங்கிணைப்பு முயற்சிகள் தீவிரமடைந்துள்ளதாக தகவல்கள் வெளியாகியுள்ளன.

அதிமுக எம்.எல்.ஏக்கள் 3 பேர் ராஜினாமா:

இந்த நிலையில், நேற்று திடீரென எஸ்.பி. வேலுமணி அணியில் இருந்த மூன்று அதிமுக எம்.எல்.ஏ.க்கள் தங்களது பதவியை ராஜினாமா செய்தனர். அவர்கள் அளித்த ராஜினாமா கடிதத்தை சபாநாயகர் ஏற்றுக்கொண்டார்.

இதன் மூலம், தமிழ்நாடு முதலமைச்சர் சி. ஜோசப் விஜய் போட்டியிட்ட திருச்சி கிழக்கு தொகுதி மற்றும் ராஜினாமா செய்த மூன்று அதிமுக எம்.எல்.ஏ.க்களின் தொகுதிகள் என மொத்தம் நான்கு தொகுதிகள் காலியாக உள்ளன.

தவெகவுக்கு இது மேலும் பலமா? அடுத்து என்ன ?

இந்த சூழலில், இது தமிழக வெற்றி கழக அரசுக்கு மேலும் பலம் சேர்க்குமா என்ற கேள்வி எழுந்துள்ளது. ஒரு சட்டமன்ற தொகுதி காலியாக அறிவிக்கப்பட்டால், ஆறு மாதங்களுக்குள் அங்கு இடைத்தேர்தல் நடத்தப்பட வேண்டும்.

அப்படி இடைத்தேர்தல் நடைபெறும் சூழலில், தமிழக வெற்றி கழகத்தில் இணைந்துள்ள முன்னாள் அதிமுக எம்.எல்.ஏ.க்களுக்கு மீண்டும் போட்டியிட வாய்ப்பு வழங்கப்படலாம் என கூறப்படுகிறது.

மேலும் படிக்க: அதிமுகவில் இருந்து விலகும் மற்றொரு எம்எல்ஏ.. தவெகவில் இணைய முடிவு?

இடைத்தேர்தலில் தமிழக வெற்றி கழகம் நான்கு தொகுதிகளிலும் வெற்றி பெற்றால், அந்தக் கட்சியின் சட்டமன்ற உறுப்பினர்கள் எண்ணிக்கை 112 ஆக உயரும். மேலும், காங்கிரஸ் கட்சியின் 5 உறுப்பினர்கள், விடுதலை சிறுத்தைகள் கட்சி, இந்திய யூனியன் முஸ்லிம் லீக், மார்க்சிஸ்ட் கம்யூனிஸ்ட் கட்சி மற்றும் இந்திய கம்யூனிஸ்ட் கட்சி உறுப்பினர்களின் ஆதரவுடன் கூட்டணியின் பலம் 124 ஆக அதிகரிக்கும்.

தமிழகத்தில் ஒரு கட்சி ஆட்சியை அமைக்க 118 இடங்கள் தேவை என்பது குறிப்பிடத்தக்கது. இந்த நான்கு சட்டமன்ற தொகுதிகளுக்கும் இடைத்தேர்தல் அறிவிக்கப்பட்டால், முக்கிய அரசியல் கட்சிகள் அனைத்தும் அந்த தொகுதிகளை கைப்பற்ற முழு வீச்சில் களமிறங்கும் என்பதும் அரசியல் வட்டாரத்தில் பேசப்பட்டு வருகிறது.