நெல்லை அருகே பயங்கரம்.. ஊருக்குள் புகுந்து மூன்று பேரை அரிவாளால் வெட்டிவிட்டு தப்பிய மர்ம கும்பல்!!
Mysterious Gang Attacks: திருநெல்வேலி மாவட்டம் ஏர்வாடி அருகே உள்ள கிராமத்திற்குள் மோட்டார் சைக்கிள்களில் வந்த மர்மக் கும்பல் ஒன்று கண்மூடித்தனமாக அரிவாளால் வெட்டியதில் மூன்று பேர் படுகாயமடைந்தனர். வள்ளியூர் அரசு மருத்துவமனையில் அனுமதிக்கப்பட்டுள்ள அவர்கள் குறித்து ஏர்வாடி காவல்துறையினர் தீவிர விசாரணை நடத்தி வருகின்றனர்.
நெல்லை, அக்.24: திருநெல்வேலி மாவட்டப் பகுதியில் நாளுக்கு நாள் அதிகரித்து வரும் குற்றச் சம்பவங்களும் மோதல்களும் பொதுமக்களிடையே பெரும் அச்சத்தை ஏற்படுத்தி வரும் நிலையில், தற்போது ஏர்வாடி அருகே உள்ள கிராமம் ஒன்றில் அரங்கேறியுள்ள கொலைவெறித் தாக்குதல் சம்பவம் அப்பகுதியில் பெரும் அதிர்வலைகளை ஏற்படுத்தியுள்ளது. அமைதியான கிராமப் பகுதிக்குள் புகுந்த வன்முறை கும்பல் ஒன்று பொதுமக்களை அச்சுறுத்தும் வகையில் நடத்திய இந்தத் தாக்குதல், சட்டம்-ஒழுங்கின் மீதான கேள்விகளை மீண்டும் ஒருமுறை வலுவாக எழுப்பியுள்ளது. பகல் நேரத்திலோ அல்லது மக்கள் நடமாட்டம் உள்ள நேரங்களிலோ இது போன்ற வன்முறைகளில் ஈடுபடும் நபர்களைக் காவல்துறையினர் இரும்புக்கரம் கொண்டு ஒடுக்க வேண்டும் என்ற கோரிக்கைகள் பொதுமக்கள் மத்தியில் எழுந்துள்ளன.
இதையும் படிக்க: தூத்துக்குடியில் பரபர சம்பவம்.. வீடு புகுந்து அரிவாள் தாக்குதல்.. கணவன்- மனைவி கொடூர கொலை.. கைதான நபர் பகீர் வாக்குமூலம்!
கண்மூடித்தனமாகத் தாக்கிய மர்மக் கும்பல்:
நெல்லை மாவட்டம் ஏர்வாடிக்கு அருகில் உள்ள திருவரங்கநேரி என்ற கிராமத்திற்குள் பல மோட்டார் சைக்கிள்களில் வந்த அடையாளம் தெரியாத மர்மக் கும்பல் ஒன்று திடீரென நுழைந்துள்ளது. அங்குச் சாலையோரத்தில் நின்று கொண்டிருந்தவர்கள் மீது எந்தவித முன்னறிவிப்புமின்றி மறைத்து வைத்திருந்த அரிவாள்களைக் கொண்டு அந்த மர்மக் கும்பல் கண்மூடித்தனமாக வெறியாட்டத்தில் ஈடுபட்டுள்ளது. இந்தத் திடீர் தாக்குதலில் திருவரங்கநேரி கிராமத்தைச் சேர்ந்த மனோகர், பெருமாள் மற்றும் சண்முகவேல் ஆகிய மூன்று பேரும் பலத்த வெட்டுக் காயங்களுடன் ரத்த வெள்ளத்தில் கீழே சரிந்தனர். ஊருக்குள் அரங்கேறிய இந்தச் திடீர் தாக்குதலால் அதிர்ந்துபோன அப்பகுதி மக்கள் என்ன செய்வதென்று தெரியாமல் அலறி அடித்து ஓடியுள்ளனர்.
தீவிர சிகிச்சை பெறும் காயமடைந்தவர்கள்:
சம்பவ இடத்திற்கு உடனடியாக விரைந்து வந்த அக்கம் பக்கத்தினர், படுகாயமடைந்து உயிருக்குப் போராடிக்கொண்டிருந்த மனோகர், பெருமாள் மற்றும் சண்முகவேல் ஆகிய மூவரையும் மீட்டுச் சிகிச்சைக்காக வள்ளியூர் தலைமை அரசு மருத்துவமனைக்கு விரைவாக அனுப்பி வைத்தனர். அங்கு அவர்களுக்கு மருத்துவர்கள் தீவிர சிகிச்சையளித்து வருவதோடு, காயமடைந்தவர்களின் உடல்நிலை குறித்துத் தொடர்ந்து கண்காணிக்கப்பட்டு வருகிறது. மருத்துவமனையில் அனுமதிக்கப்பட்டுள்ளவர்களிடம் இருந்து வாக்குமூலம் பெறுவதற்கான முயற்சிகளும், இந்தத் தாக்குதலுக்கான உண்மையான காரணம் என்ன என்பது குறித்த விவரங்களைச் சேகரிக்கும் பணிகளிலும் மருத்துவர்களும் காவல்துறையினரும் தீவிரமாக ஈடுபட்டுள்ளனர்.
இதையும் படிக்க: முதல்வர் விஜய் குறித்து அவதூறு.. சென்னையில் திமுக பிரமுகர் அதிரடி கைது.. பரபரப்பில் கட்சியினர்!
தப்பியோடியவர்களை தேடும் பணியில் காவல்துறை:
இந்தக் கொடூரச் சம்பவம் குறித்துத் தகவல் அறிந்ததும் ஏர்வாடி காவல் நிலையப் போலீசார் உடனடியாகச் சம்பவ இடத்திற்கு விரைந்து சென்று தீவிர விசாரணை நடத்தினர். ஊருக்குள் வந்து கைவரிசைக் காட்டிவிட்டுத் தப்பியோடிய மர்ம நபர்கள் எந்தப் பகுதியைச் சேர்ந்தவர்கள், முன்விரோதம் காரணமாக இந்தத் தாக்குதல் நடத்தப்பட்டதா அல்லது வேறு ஏதேனும் காரணமா என்பது குறித்துப் பல்வேறு கோணங்களில் காவல்துறையினர் விசாரணை நடத்தி வருகின்றனர். மேலும், அப்பகுதியில் உள்ள சிசிடிவி (CCTV) கேமரா பதிவுகளை முழுமையாக ஆய்வு செய்து வரும் போலீசார், தப்பியோடிய மர்மக் கும்பலை விரைவில் கைது செய்வதற்கான அதிரடி நடவடிக்கைகளை முடுக்கிவிட்டுள்ளனர்.
