காஞ்சிபுரத்தில் சினிமா பாணியில் அரங்கேறிய துணிகர கொள்ளை.. டாஸ்மாக் வசூல் பணம் ரூ.1.5 கோடியுடன் கார் கடத்தல்!!

காஞ்சிபுரம், நவ.11: தமிழகத்தில் சட்டம் ஒழுங்கு மற்றும் குற்றச் சம்பவங்கள் குறித்த செய்திகள் அவ்வப்போது பொதுமக்களை அதிர்ச்சிக்குள்ளாக்கி வரும் நிலையில், தற்போது காஞ்சிபுரம் மாவட்டத்தில் அரங்கேறியுள்ள ஒரு துணிகரக் கொள்ளைச் சம்பவம் மாநிலம் முழுவதும் பெரும் பரபரப்பை ஏற்படுத்தியுள்ளது. காஞ்சிபுரம் மாவட்டம் மற்றும் அதன் சுற்றுவட்டாரப் பகுதிகளில் இயங்கி வரும் 20க்கும் மேற்பட்ட டாஸ்மாக் மதுபானக் கடைகளில் வசூலிக்கப்பட்ட கோடிக்கணக்கான சில்லறை விற்பனைப் பணத்தை முறையாகச் சேகரித்து வங்கியில் செலுத்தும் பணியில் தனியார் வங்கி ஏஜென்ட்டுகள் ஈடுபட்டு வருகின்றனர். வழக்கம் போல் டாஸ்மாக் கடைகளின் வசூல் தொகையைச் சேகரிக்கும் பணியில் ஈடுபட்டிருந்த தனியார் ஏஜென்ட் மற்றும் ஓட்டுநர் சென்ற கார், மர்மக் கும்பல் ஒன்றால் திட்டமிடப்பட்டுப் பணத்துடன் கடத்தப்பட்டுள்ளது. இச்சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.

இதையும் படிக்க: சமயபுரம் இரட்டை கொலை வழக்கு.. தப்பியோட முயன்ற குற்றவாளி போலீசாரால் சுட்டுப் பிடிப்பு!!

சினிமா பாணியில் அரங்கேறிய சதித்திட்டம்:

காஞ்சிபுரம் மாவட்டம் ஸ்ரீபெரும்புதூர் அருகிலுள்ள வரகடம் பகுதியில் உள்ள டாஸ்மாக் மதுபானக் கடைக்கு அருகில் இந்தச் சம்பவம் அரங்கேறியுள்ளது. இருபதுக்கும் மேற்பட்ட டாஸ்மாக் கடைகளில் வசூலிக்கப்பட்ட சுமார் ரூ.1.5 கோடி ரொக்கப் பணத்துடன் தனியார் வங்கி ஏஜென்ட் தாஸ் மற்றும் ஓட்டுநர் ஆகியோர் வாடகை கார் ஒன்றில் வந்துள்ளனர். ஒரகடம் டாஸ்மாக் கடைக்கு அருகில் காரை நிறுத்திவிட்டு, பணத்தை வசூல் செய்யும் பணியில் தாஸ் ஈடுபட்டுள்ளார். அப்போது, அங்கு திடீரென இருசக்கர வாகனத்தில் வந்த நபர் ஒருவர், எதிர்பாராதவிதமாக அந்த கார் மீது வேண்டுமென்றே மோதி விபத்து ஏற்படுத்தியது போல் நாடகமாடியுள்ளார். உடனே காரின் ஓட்டுநர் வாகனத்திலிருந்து இறங்கி அந்த நபர் மீது மோதியது குறித்துத் தகராறில் ஈடுபட்டுள்ளார். ஓட்டுநர் கவனம திசைதிருப்பப்பட்ட அந்தச் சமயத்தில், மறைந்திருந்த மற்றொரு மர்மக் கும்பல் மின்னல் வேகத்தில் வந்து, பணப் பைகளுடன் நின்றிருந்த அந்தக் காரை அப்படியே ஓட்டிச் சென்று கடத்தியுள்ளார்.

காவல்துறையின் தீவிர விசாரணை:

பட்டப்பகலில் சினிமா பாணியில் ஒன்றரை கோடி ரூபாய் ரொக்கப் பணத்துடன் கார் கடத்தப்பட்ட இச்சம்பவம் குறித்து உடனடியாகக் காஞ்சிபுரம் மாவட்டக் காவல்துறையினருக்குத் தகவல் தெரிவிக்கப்பட்டது. தகவலறிந்ததும் சம்பவ இடத்திற்கு விரைந்து வந்த காவல் துறையினர், முதற்கட்ட விசாரணைகளைத் தீவிரப்படுத்தினர். மேலும், அப்பகுதியில் உள்ள சிசிடிவி கேமரா பதிவுகளைக் கைப்பற்றி, குற்றவாளிகள் எந்தப் பாதையில் தப்பிச் சென்றார்கள் என்பது குறித்து ஆய்வு செய்து வருகின்றனர். விபத்து போல் நாடகமாடி ஓட்டுநரின் கவனத்தை திசைதிருப்பி இந்தத் துணிகரக் கொள்ளையில் ஈடுபட்டுள்ள மர்மக் கும்பல் யார், இதற்குப் பின்னணியில் டாஸ்மாக் வசூல் நிலவரம் தெரிந்த உள் ஆட்கள் யாராவது உள்ளார்களா என்பது குறித்த கோணங்களில் போலீசார் தீவிர விசாரணை நடத்தி வருகின்றனர்.

இதையும் படிக்க: “தமிழ்நாடு முழுவதும் உள்ள அரசுப் பள்ளிகளில் சிசிடிவி பொருத்துவது கட்டாயம்!”.. உயர்நீதிமன்றம் அதிரடி உத்தரவு!

குற்றவாளிகளைத் தேடும் பணி தீவிரம்:

காஞ்சிபுரம் மற்றும் ஸ்ரீபெரும்புதூர் சுற்றியுள்ள பகுதிகளில் தலைமறைவாகியுள்ள கொள்ளைக் கும்பலைப் பிடிப்பதற்காகக் காவல்துறையினர் தனிப்படைகளை அமைத்துத் தீவிரத் தேடுதல் வேட்டையில் ஈடுபட்டுள்ளனர். இவ்வளவு பெரிய தொகையைப் பாதுகாப்பாகக் கொண்டு செல்வதற்கான உரிய பாதுகாப்பு வழிகாட்டுதல்கள் பின்பற்றப்பட்டதா என்பது குறித்தும் தனியார் வங்கி நிர்வாகத்திடம் போலீசார் விசாரணை மேற்கொண்டு வருகின்றனர். பட்டப்பகலில் லட்சக்கணக்கில் அல்லாமல் கோடிக்கணக்கில் பணம் கொள்ளையடிக்கப்பட்ட இந்தச் சம்பவம் காஞ்சிபுரம் மாவட்ட வர்த்தக வட்டாரங்களிலும் பொதுமக்களுக்கிடையேயும் பெரும் அச்சத்தை ஏற்படுத்தியுள்ளது. தனிப்படை போலீசாரின் தீவிர தேடுதல் வேட்டைக்குப் பிறகு குற்றவாளிகள் விரைவில் கைது செய்யப்படுவார்கள் என எதிர்பார்க்கப்படுகிறது.