“வரலாற்று சாதனைக்கு தயாராகும் தமிழ்நாடு!”.. குலசேகரப்பட்டினம் விண்வெளி ஏவுதளத்தில் இருந்து அடுத்த ஆண்டு முதல் ராக்கெட் லான்ச்!

சென்னை, நவ.10: இந்திய விண்வெளி ஆய்வு மையமான ‘இஸ்ரோ’ (ISRO) தனது இரண்டாவது ராக்கெட் ஏவுதளத்தை தமிழ்நாட்டின் தூத்துக்குடி மாவட்டம் குலசேகரப்பட்டினத்தில் மிக நவீன வசதிகளுடன் அமைத்து வருகிறது. இந்தியாவின் விண்வெளித் துறையில் வரலாற்றுச் சிறப்புமிக்க மைல்கல்லாகப் பார்க்கப்படும் இந்த புதிய விண்வெளி மையம், நாட்டின் விண்வெளிப் பயணத் தேவைகளை நிறைவேற்றுவதிலும், வர்த்தக ரீதியான சிறிய செயற்கைக்கோள்களை விண்ணில் செலுத்துவதிலும் முக்கியப் பங்கு வகிக்க உள்ளது. ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி மையத்தைத் தொடர்ந்து, இரண்டாவது ஏவுதளமாக உருவாகும் இந்த வளாகத்திலிருந்து அடுத்த ஆண்டு (2027) முதல் ராக்கெட்டுகளை விண்ணில் ஏவ இஸ்ரோ தீவிர ஏற்பாடுகளை மேற்கொண்டு வருகிறது.

இதையும் படிக்க: தொடர் சர்ச்சைகளில் சிக்கும் தவெக எம்எல்ஏ-க்கள்.. முதல்வர் தலைமையில் நாளை அவசர ஆலோசனை கூட்டம்!!

முதல்வருடன் இஸ்ரோ தலைவர் சந்திப்பு:

குலசேகரப்பட்டினத்தில் அமைக்கப்பட்டு வரும் புதிய விண்வெளி ஏவுதளத்தின் இறுதிக்கட்டப் பணிகள் மற்றும் லாஞ்ச் செயல்பாடுகளுக்கான பூர்வாங்கப் பணிகள் குறித்த ஆலோசனைகளை மேற்கொள்வதற்காக, இஸ்ரோ தலைவர் வி. நாராயணன் அவர்கள் தமிழக முதலமைச்சர் ஜோசப் விஜய்யை நேரில் சந்தித்துப் பேசினார். இந்தச் சந்திப்பின் போது, விண்வெளித் திட்டத்திற்கான மாநில அரசின் தொடர்ச்சியான ஒத்துழைப்பு, உள்கட்டமைப்பு மேம்பாடுகள் மற்றும் பாதுகாப்பு ஏற்பாடுகள் குறித்து விரிவாக விவாதிக்கப்பட்டது. திட்டத்தை விரைந்து செயல்படுத்தத் தேவையான அனைத்து உதவிகளையும் தமிழக அரசு வழங்கி வருவதால், திட்டப் பணிகள் திட்டமிட்டபடி வேகமாக நடைபெற்று வருகின்றன.

SSLV ராக்கெட்டும் புவியியல் சிறப்பம்சமும்:

குறிப்பாக, சிறிய ரக செயற்கைக்கோள் ஏவு வாகனங்களை ஏவுவதற்காகவே பிரத்யேகமாக இந்த நவீன விண்வெளி நிலையம் வடிவமைக்கப்பட்டுள்ளது. குலசேகரப்பட்டினம் கடற்கரையோரம் அமைந்துள்ளதன் மூலமாக, ராக்கெட்டுகள் ஏவப்படும் போது வளைந்து செல்லாமல் நேரடியாகத் தெற்கு திசையை நோக்கிச் கடலை நோக்கிப் பயணிக்க முடியும். இந்த நேரடிப் பாதையானது தேவையற்ற சிக்கலான வழிமாற்றுக் கணக்கீடுகளைத் தவிர்க்க உதவுவதுடன், எரிபொருள் திறனை அதிகரிப்பதோடு ராக்கெட் ஏவுதலின் ஒட்டுமொத்த செயல்திறனையும் கணிசமாக மேம்படுத்துகிறது.

இதையும் படிக்க: பாமக பிரமுகர் சுட்டுக் கொலை.. குற்றவாளியை சுட்டுப்பிடித்த போலீசார்.. குடியாத்தம் அருகே அடுத்தடுத்த பரபரப்பு!!

தமிழ்நாட்டின் பொருளாதார வளர்ச்சி:

நாட்டின் வளர்ந்து வரும் வணிகரீதியான சிறிய செயற்கைக்கோள் தேவைகளைப் பூர்த்தி செய்யும் வகையில் அமையவுள்ள இந்தத் திட்டம், இந்தியாவின் விண்வெளிப் பொருளாதாரத்தை அடுத்த கட்டத்திற்கு நகர்த்தும் என எதிர்பார்க்கப்படுகிறது. மேலும், இந்த உலகத்தரம் வாய்ந்த விண்வெளிப் பூங்கா அமைவதன் மூலம் தமிழ்நாட்டில் விண்வெளி மற்றும் வான்வெளித் தொழில்நுட்பம் சார்ந்த தொழில்கள் பெருமளவில் வளர்ச்சியடையும் என்றும், ஏராளமான முதலீடுகளும் வேலைவாய்ப்புகளும் உருவாகி தமிழகம் நாட்டின் முக்கிய விண்வெளி மையமாக உருவெடுக்கும் என்றும் எதிர்பார்க்கப்படுகிறது.