கேஸ் சிலிண்டர் தட்டுப்பாடு: விறகடுப்புகளுக்கு மாறும் சென்னை ஹோட்டல்கள்
Gas Cylinder Shortage Forces: வணிக கேஸ் சிலிண்டர் தட்டுப்பாடு காரணமாக சென்னை நகரில் பல ஹோட்டல்கள் சிரமத்தை சந்தித்து வருகின்றன. சில உணவகங்கள் மூடப்பட்டு வரும் நிலையில், சில இடங்களில் விறகடுப்பில் சமையல் செய்யப்படுகிறது. இதனால் உணவக நேரம் குறைக்கப்பட்டு, சில உணவுகள் வழங்கப்படாத நிலை ஏற்பட்டுள்ளது.
கேஸ் சிலிண்டர் தட்டுப்பாடு காரணமாக சென்னை நகரில் உள்ள பல்வேறு உணவகங்கள் கடும் சிரமத்தை எதிர்கொண்டு வருகின்றன. குறிப்பாக வணிக பயன்பாட்டிற்கான சிலிண்டர்கள் கிடைப்பதில் ஏற்பட்டுள்ள தட்டுப்பாடு காரணமாக பல ஹோட்டல்கள் தங்களது வழக்கமான செயல்பாடுகளை தொடர முடியாத நிலை ஏற்பட்டுள்ளது. இதன் விளைவாக சில உணவகங்கள் தற்காலிகமாக மூடப்பட்டு வருகின்றன. மேலும் சில ஹோட்டல்கள் விறகை பயன்படுத்தி உணவு சமைக்கும் பழைய முறைக்கு மாற வேண்டிய கட்டாய நிலைக்கு தள்ளப்பட்டுள்ளன. இதனால் உணவக உரிமையாளர்கள் மட்டுமல்லாமல் அங்கு பணிபுரியும் ஊழியர்களும், அன்றாடம் உணவு வாங்கி உண்பவர்களும் பாதிக்கப்பட்டுள்ளனர்.
உணவுப் பட்டியலில் கட்டுப்பாடு – நேரம் குறைத்து சேவை
வணிக சிலிண்டர் தட்டுப்பாட்டால் சென்னையில் உள்ள பல பிரபல ஹோட்டல்களிலும் மாற்றங்கள் காணப்படுகின்றன. சில உணவகங்களில் பல்வேறு உணவு வகைகள் தயாரிக்க முடியாததால், வாடிக்கையாளர்களுக்கு முன்கூட்டியே அறிவிப்பு பலகைகள் வைக்கப்பட்டுள்ளன. அதில் குறிப்பிட்ட சில உணவுகள் மட்டும் கிடைக்கும் என்றும், சில உணவுகள் தற்காலிகமாக வழங்கப்படாது என்றும் தெரிவிக்கப்பட்டுள்ளது. இதனுடன், சமையல் வசதிகள் குறைவாக இருப்பதால் உணவகம் செயல்படும் நேரமும் குறைக்கப்பட்டுள்ளது. இதனால் வாடிக்கையாளர்கள் குறைந்த நேரத்தில் மட்டுமே உணவு பெறும் நிலை உருவாகியுள்ளது.
Also Read: இனி விடுதிகளில் காபி, டீ, சப்பாத்தி, தோசை கிடையாது.. தவிப்பில் பேச்சுலர்ஸ்
சிறிய ஹோட்டல்களுக்கு அதிக பாதிப்பு
சென்னையின் பல பகுதிகளில் எளிய மக்களுக்கு குறைந்த விலையில் உணவு வழங்கும் சிறிய அளவிலான ஹோட்டல்கள் அதிக சிரமத்தை சந்தித்து வருகின்றன. வணிக சிலிண்டர் கிடைக்காததால் அவற்றில் சில ஹோட்டல்கள் தற்காலிகமாக மூடப்பட்டு வருகின்றன. இவ்வகை ஹோட்டல்கள் தினசரி வருமானத்தை மட்டுமே நம்பி செயல்படுவதால், சிலிண்டர் தட்டுப்பாடு அவர்களுக்கு பெரிய பொருளாதார பாதிப்பை ஏற்படுத்தியுள்ளது. இதனால் அங்கு வேலை செய்யும் ஊழியர்களின் வாழ்க்கையும் பாதிக்கப்படுவதோடு, குறைந்த விலையில் உணவு வாங்கும் பொதுமக்களும் சிரமத்தை எதிர்கொள்கிறார்கள்.
விறகடுப்பில் சமையல் – மாற்று முயற்சி
இந்நிலையில் சென்னை சேப்பாக்கம் பகுதியில் உள்ள ஒரு சிறிய ரக உணவகம், கேஸ் சிலிண்டர் இல்லாத சூழ்நிலையில் விறகு அடுப்புகளை பயன்படுத்தி உணவுகளை தயாரித்து வருவது கவனம் ஈர்த்துள்ளது. பழைய காலங்களில் பயன்படுத்தப்பட்ட இந்த சமையல் முறை தற்போது மீண்டும் நடைமுறைக்கு வந்துள்ளது. விறகு அடுப்பில் சமைப்பது அதிக நேரம் எடுத்துக்கொள்ளும் என்றாலும், வாடிக்கையாளர்களுக்கு உணவு வழங்க வேண்டும் என்ற நோக்கில் சில ஹோட்டல்கள் இந்த மாற்று முயற்சியை மேற்கொண்டு வருகின்றன. வணிக சிலிண்டர் விநியோகம் சீராகும் வரை இந்த நிலை தொடரும் என்று உணவக உரிமையாளர்கள் தெரிவிக்கின்றனர்.
