“திமுகவும் தவெகவும் போடும் பிச்சையில் காங்கிரஸ் பிழைக்கிறது!” – மாணிக்கம் தாகூருக்கு நயினார் நாகேந்திரன் பதிலடி!
Nainar Nagendran VS Manickam Tagore: தமிழகத்தின் முக்கியமான உரிமைப் பிரச்சினைகளையும் தனது பதிவில் நயினார் நாகேந்திரன் குறிப்பிட்டுள்ளார். தமிழகத்தின் ஒப்புதலின்றி கச்சத்தீவு இலங்கைக்கு வழங்கப்பட்டதாகவும், காவிரி மற்றும் முல்லைப் பெரியாறு நதிநீர் உரிமைகள் தொடர்பாக தமிழக விவசாயிகளின் நலன்கள் புறக்கணிக்கப்பட்டதாகவும் குற்றம்சாட்டியுள்ளார்.
நவம்பர் 20,2026: தமிழக அரசியலில் பாஜக மாநிலத் தலைவர் நயினார் நாகேந்திரனுக்கும், காங்கிரஸ் நாடாளுமன்ற உறுப்பினர் மாணிக்கம் தாகூருக்கும் இடையே சமூக வலைதளங்களில் வார்த்தைப் போர் ஏற்பட்டுள்ளது. காங்கிரஸ் கட்சியை விமர்சித்து மாணிக்கம் தாகூர் வெளியிட்ட பதிவுக்குப் பதிலடி கொடுக்கும் வகையில், காங்கிரஸின் கடந்தகால அரசியல் வரலாறு, தேர்தல் தோல்விகள் மற்றும் தமிழக உரிமைகள் தொடர்பான விவகாரங்களைச் சுட்டிக்காட்டி நயினார் நாகேந்திரன் நீண்ட பதிவு ஒன்றை வெளியிட்டுள்ளார்.
மாணிக்கம் தாகூர் விமர்சனம் என்ன?
முன்னதாக, பாஜக மாநிலத் தலைவர் நயினார் நாகேந்திரனை விமர்சித்து மாணிக்கம் தாகூர் தனது சமூக வலைதளப் பக்கத்தில் பதிவிட்டிருந்தார். அதில், திமுகவும் தமிழக வெற்றிக் கழகமும் வழங்கும் ஆதரவால் தமிழ்நாட்டில் காங்கிரஸ் அரசியல் நடத்தி வருவது நினைவிருக்கிறதா எனக் கேள்வி எழுப்பியிருந்தார்.
மேலும், தனது கையில் இருக்கும் ஒரு தொகுதியைக்கூட தக்கவைக்க முடியாத நிலையில் இருப்பவர், மேடைக்கு மேடை காங்கிரஸை ஒழிப்போம் எனச் சவால் விடுவது தமிழக அரசியலில் மிகப்பெரிய நகைச்சுவை என்றும் நயினார் நாகேந்திரனை விமர்சித்திருந்தார்.
காங்கிரஸின் பழைய வரலாற்றை நினைத்துப் பாருங்கள்
ஞாபகம் வருகிறதா? ஞாபகம் வருகிறதா? தமிழர்களுக்கு காங்கிரஸ் இழைத்த துரோகம் ஞாபகம் வருகிறதா?
தம்பி திரு. மாணிக்கம் தாகூர் அவர்களே, பிறரை விமர்சிப்பதற்கு முன்பு உங்கள் காங்கிரஸ் கட்சியின் கடந்த கால வரலாற்றையும், இன்றைய நிலையையும் ஒருமுறை திரும்பிப் பாருங்கள்:
• இந்திய சுதந்திரத்திற்குப் பிறகு, தமிழ்நாட்டில் தொடர்ந்து 20 ஆண்டுகள் ஆட்சியில் இருந்த கட்சி காங்கிரஸ். அத்தகைய வரலாறு கொண்ட உங்கள் கட்சி, இன்று தமிழ்நாட்டில் எந்த நிலைக்குத் தள்ளப்பட்டிருக்கிறது என்பதை முதலில் எண்ணிப் பாருங்கள்!
• தமிழ்நாட்டில் 18 சட்டமன்ற உறுப்பினர்களைக் கொண்டிருந்த நீங்கள், இன்று 5 சட்டமன்ற உறுப்பினர்களாகச் சுருங்கிவிட்டீர்கள். வரும் தேர்தலில் எவ்வளவு முயன்றாலும் அந்த 5 இடங்கள் கூட மிஞ்சாது!
• திரு. ராஜீவ் காந்தி தலைமையில் 400 நாடாளுமன்ற இடங்களில் வெற்றி பெற்ற காங்கிரஸ் கட்சி, இன்று தொடர்ந்து மூன்று பொதுத் தேர்தல்களாக மூன்று இலக்க (100) எண்ணிக்கையைக் கூடத் தொட முடியாத நிலைக்குச் சுருங்கிவிட்டதே; அந்தப் பழைய காலம் ஞாபகம் வருகிறதா?
• திரு. ராகுல் காந்தி தலைமையில் 100-க்கும் மேற்பட்ட தேர்தல்களில் காங்கிரஸ் கட்சி தொடர் தோல்வியைச் சந்தித்துள்ளதே, அது ஞாபகம் வருகிறதா?
• மேற்கு வங்கம், உத்தரப் பிரதேசம், குஜராத், ஒடிசா எனப் பல முக்கிய மாநிலங்களில் பல தசாப்தங்களாக உங்கள் காங்கிரஸ் கட்சியால் ஆட்சிக்கே வர முடியாமல் போனது ஞாபகம் வருகிறதா?
• வாக்குத் திருட்டு குறித்துப் பேசுகிறீர்களே… அப்படியானால் கேரளாவில் வாக்குகளைத் திருடித்தான் ஆட்சிக்கு வந்தீர்களா? காவிரி நதிநீரைத் திறந்துவிட மறுக்கும் கர்நாடகத்திலும் வாக்குகளைத் திருடித்தான் ஆட்சிக்கு வந்தீர்களா?
• எந்தவொரு கொள்கைக்கும் நேர்மையின்றி, சுய ஆதாயம் தேடும் சந்தர்ப்பவாத அரசியலே காங்கிரஸின் வழக்கம். திமுகவின் பெயரால் வாக்குகளைப் பெற்று, தவெக-வை (TVK) எதிர்த்துப் பரப்புரை செய்துவிட்டு, தற்போது அதே தவெக-வுடன் பேரம் பேசி அமைச்சரவையில் இடம் பெற்றிருக்கும் உங்களுக்குப் பிறரை விமர்சிக்க என்ன தகுதி இருக்கிறது?
• தமிழ்நாட்டின் ஒப்புதலின்றி கச்சத்தீவை இலங்கைக்குத் தாரை வார்த்ததும், காவிரி மற்றும் முல்லைப் பெரியாறு நதிநீர் உரிமைகளில் தமிழக விவசாயிகளின் நலன்களைத் தொடர்ந்து புறக்கணித்ததும் ஞாபகம் வருகிறதா?
• இலங்கையில் வாழும் நம் தமிழின உறவுகளை இந்திய அமைதிப்படை (IPKF) மூலம் படுகொலை செய்ததும், முள்ளிவாய்க்காலில் உங்கள் கட்சித் தலைவர் திருமதி. சோனியா காந்தி தலைமையிலான காங்கிரஸ் ஆட்சியில் பச்சிளம் குழந்தைகள் முதல் முதியவர்கள் வரை 1.5 லட்சம் தமிழர்கள் உயிரோடு கொன்று குவிக்கப்பட்டதும் ஞாபகம் வருகிறதா?!
• 1975-இல் அவசரநிலையை (Emergency) கொண்டுவந்து ஜனநாயகத்தை முடக்கியதும், மக்களால் தேர்ந்தெடுக்கப்பட்ட மாநில அரசுகளை 90 முறை கலைத்ததும் உங்கள் காங்கிரஸ் கட்சிதான். ஆனால், ஜனநாயகத்தை மதிக்கும் பாஜக ஆட்சியில் அவ்வாறு கலைக்கப்பட்ட மாநில அரசுகளின் எண்ணிக்கை பூஜ்ஜியம்! உங்கள் கட்சியின் அந்த ஜனநாயக மீறல்கள் ஞாபகம் வருகிறதா?
• வெறும் 2 நாடாளுமன்ற உறுப்பினர்களுடன் பயணத்தைத் தொடங்கிய பாரதிய ஜனதா கட்சிதான் இன்று ஆலமரம் போல வளர்ந்து நாட்டையே ஆட்சி செய்கிறது. அதேபோல, இங்குள்ள 1 சட்டமன்ற உறுப்பினரைச் சாதாரணமாக எண்ணிவிடாதீர்கள் — இதுவே எங்கள் வளர்ச்சியின் தொடக்கம்!
• இந்திய அரசியல் வரலாற்றின் மிகப்பெரிய ஆளுமைகளான திரு. ராஜாஜியும், திரு. காமராஜரும் வளர்த்த கட்சி, இன்று திமுகவும் தவெக-வும் போடும் பிச்சையில் தமிழ்நாட்டில் பிழைத்துக் கொண்டிருக்கிறது.
நினைவிருக்கிறதா தம்பி, நினைவிருக்கிறதா?!
— Nainar Nagenthran (@NainarBJP) November 19, 2026
இதற்குப் பதிலளிக்கும் வகையில் நயினார் நாகேந்திரன் தனது எக்ஸ் வலைதளப் பக்கத்தில், “ஞாபகம் வருகிறதா? தமிழர்களுக்கு காங்கிரஸ் இழைத்த துரோகம் ஞாபகம் வருகிறதா?” எனத் தொடங்கி மாணிக்கம் தாகூருக்கு பல்வேறு கேள்விகளை முன்வைத்துள்ளார்.
சுதந்திரத்திற்குப் பிறகு தமிழகத்தில் தொடர்ந்து 20 ஆண்டுகள் ஆட்சியில் இருந்த காங்கிரஸ் கட்சி, தற்போது எந்த நிலைக்குத் தள்ளப்பட்டுள்ளது என்பதை முதலில் சிந்தித்துப் பார்க்க வேண்டும் எனக் குறிப்பிட்டுள்ளார். தமிழகத்தில் 18 சட்டமன்ற உறுப்பினர்களைக் கொண்டிருந்த காங்கிரஸ் தற்போது 5 உறுப்பினர்களாகச் சுருங்கிவிட்டதாகவும், வரும் தேர்தலில் அந்த இடங்களைக்கூட தக்கவைக்க முடியாது என்றும் விமர்சித்துள்ளார்.
ராகுல் காந்தி தலைமையில் தொடர் தோல்வி என விமர்சனம்!
நாடாளுமன்றத் தேர்தல்களில் காங்கிரஸ் கட்சியின் வெற்றி எண்ணிக்கை குறைந்து வருவதாகக் குறிப்பிட்டுள்ள நயினார் நாகேந்திரன், ராஜீவ் காந்தி தலைமையில் 400 இடங்களில் வெற்றி பெற்ற காங்கிரஸ், தற்போது தொடர்ந்து மூன்று பொதுத் தேர்தல்களாக 100 இடங்களைக்கூட எட்ட முடியாத நிலைக்குத் தள்ளப்பட்டுள்ளதாகத் தெரிவித்துள்ளார்.
மேலும் படிக்க: “சட்டப்பேரவையில் நம்பிக்கையில்லா தீர்மானம் வந்தால் என்ன முடிவு?”.. சஸ்பென்ஸ் வைத்த சிபிஐ வீரபாண்டியன்!!
மேலும், ராகுல் காந்தி தலைமையில் 100-க்கும் மேற்பட்ட தேர்தல்களில் காங்கிரஸ் தொடர் தோல்வியைச் சந்தித்துள்ளதாகவும், மேற்கு வங்கம், உத்தரப் பிரதேசம், குஜராத், ஒடிசா உள்ளிட்ட மாநிலங்களில் பல தசாப்தங்களாக ஆட்சிக்கு வர முடியாத நிலை இருப்பதாகவும் விமர்சித்துள்ளார்.
கச்சத்தீவு, காவிரி, முல்லைப் பெரியாறு விவகாரங்கள்
தமிழகத்தின் முக்கியமான உரிமைப் பிரச்சினைகளையும் தனது பதிவில் நயினார் நாகேந்திரன் குறிப்பிட்டுள்ளார். தமிழகத்தின் ஒப்புதலின்றி கச்சத்தீவு இலங்கைக்கு வழங்கப்பட்டதாகவும், காவிரி மற்றும் முல்லைப் பெரியாறு நதிநீர் உரிமைகள் தொடர்பாக தமிழக விவசாயிகளின் நலன்கள் புறக்கணிக்கப்பட்டதாகவும் குற்றம்சாட்டியுள்ளார்.
மேலும், இலங்கையில் தமிழர்கள் கொல்லப்பட்ட விவகாரத்தையும், முள்ளிவாய்க்கால் இனப்படுகொலை தொடர்பாக அப்போதைய காங்கிரஸ் தலைமையிலான மத்திய அரசின் செயல்பாடுகளையும் சுட்டிக்காட்டி கேள்வி எழுப்பியுள்ளார்.
அவசரநிலை பிரகடனம் குறித்தும் கேள்வி
1975ஆம் ஆண்டு அவசரநிலையைப் பிரகடனப்படுத்தி ஜனநாயகத்தை முடக்கியதும், மக்களால் தேர்ந்தெடுக்கப்பட்ட மாநில அரசுகளை 90 முறை கலைத்ததும் காங்கிரஸ் கட்சிதான் எனக் குற்றம்சாட்டியுள்ளார். அதேநேரத்தில், பாஜக ஆட்சியில் மாநில அரசுகள் கலைக்கப்பட்டதில்லை என்றும் தனது பதிவில் குறிப்பிட்டுள்ளார்.
மேலும் படிக்க: தமிழகத்தின் முதலீட்டு கட்டமைப்பு பலவீனமானதா? வழிகாட்டு நிறுவன அதிகாரிகள் பணி நீக்கம் குறித்து டி.ஆர்.பி. ராஜா விமர்சனம்
மேலும், வெறும் இரண்டு நாடாளுமன்ற உறுப்பினர்களுடன் பயணத்தைத் தொடங்கிய பாஜக இன்று நாட்டை ஆளும் அளவிற்கு வளர்ந்துள்ளதாகவும், தமிழகத்தில் தற்போது ஒரே ஒரு சட்டமன்ற உறுப்பினர் மட்டுமே இருந்தாலும் அதனை பாஜகவின் வளர்ச்சிக்கான தொடக்கமாகப் பார்க்க வேண்டும் என்றும் தெரிவித்துள்ளார்.
காமராஜர் வளர்த்த கட்சியின் இன்றைய நிலை இதுதானா?
இறுதியாக, ராஜாஜி மற்றும் காமராஜர் போன்ற தலைவர்களால் வளர்க்கப்பட்ட காங்கிரஸ் கட்சி, இன்று திமுகவும் தவெகவும் வழங்கும் ஆதரவை நம்பி தமிழகத்தில் அரசியல் நடத்தும் நிலைக்குத் தள்ளப்பட்டுள்ளதாக விமர்சித்துள்ளார்.
மற்ற கட்சிகளை விமர்சிப்பதற்கு முன்பு காங்கிரஸ் தனது கடந்தகால வரலாற்றையும் தற்போதைய அரசியல் நிலையையும் திரும்பிப் பார்க்க வேண்டும் எனக் கூறியுள்ள நயினார் நாகேந்திரன், “நினைவிருக்கிறதா தம்பி, நினைவிருக்கிறதா?” எனக் குறிப்பிட்டு தனது பதிவை முடித்துள்ளார்.