மேற்கு தொடர்ச்சி மலை மாவட்டங்களில் தொடரும் மழை.. சென்னையில் மழை இருக்குமா? வானிலை சொல்லும் தகவல் இதோ..

ஜூன் 25, 2026: தமிழகத்தில் கடந்த சில வாரங்களாக வெப்பநிலை அதிகபட்சமாக இருந்த சூழலில், தற்போது அது சற்று குறைந்து பதிவாகி வருகிறது. கடந்த 24 மணி நேரத்தில் தமிழகத்தில் அதிகபட்சமாக மதுரையில் 39 டிகிரி செல்சியஸ் வெப்பநிலை பதிவாகியுள்ளது. அதனைத் தொடர்ந்து, பாளையங்கோட்டையில் 38.2 டிகிரி செல்சியஸ், திருத்தணியில் 37.7 டிகிரி செல்சியஸ், வேலூரில் 37.6 டிகிரி செல்சியஸ், நாகப்பட்டினத்தில் 37.5 டிகிரி செல்சியஸ், கரூரில் 36.5 டிகிரி செல்சியஸ் மற்றும் ஈரோட்டில் 35 டிகிரி செல்சியஸ் வெப்பநிலை பதிவாகியுள்ளது.

சென்னையைப் பொறுத்தவரையில், நுங்கம்பாக்கத்தில் 36.9 டிகிரி செல்சியஸ் மற்றும் மீனம்பாக்கத்தில் 36.7 டிகிரி செல்சியஸ் வெப்பநிலை பதிவாகியுள்ளது. தமிழகத்தில் அடுத்த சில நாட்களுக்கு வெப்பநிலையில் பெரிய அளவிலான மாற்றம் இருக்காது என்றும், இயல்பை ஒட்டியே இருக்கும் என்றும் தெரிவிக்கப்பட்டுள்ளது. அதேசமயம், பல்வேறு பகுதிகளில் மழைக்கான வாய்ப்புகள் அதிகமாக இருப்பதாகவும் கூறப்பட்டுள்ளது.

எந்தெந்த மாவட்டங்களுக்கு கனம்ழை எச்சரிக்கை?

மேற்கு திசைக் காற்றின் வேகமாறுபாடு காரணமாக, ஜூன் 25-ஆம் தேதி (இன்று) மேற்கு தொடர்ச்சி மலை மாவட்டங்கள் மற்றும் கடலோர தமிழகத்தின் ஒரு சில இடங்களில் இடி, மின்னல் மற்றும் பலத்த காற்றுடன் கூடிய மிதமான மழைக்கு வாய்ப்பு இருப்பதாக தெரிவிக்கப்பட்டுள்ளது.

ஜூன் 26-ஆம் தேதி தென் தமிழகம், மேற்கு தொடர்ச்சி மலை மாவட்டங்கள் மற்றும் வட தமிழகத்தின் ஒரு சில இடங்களில் இடி, மின்னல் மற்றும் பலத்த காற்றுடன் கூடிய மிதமான மழைக்கு வாய்ப்பு உள்ளது.

மேலும் படிக்க: தாம்பரம் – வேளச்சேரி சாலைக்கு மேஜர் முகுந்த் வரதராஜன் பெயர் – முதல்வர் விஜய் உத்தரவு..

ஜூன் 27-ஆம் தேதி கோவை, தேனி மற்றும் நீலகிரி மாவட்டங்களில் கனமழைக்கு வாய்ப்பு இருப்பதாக தெரிவிக்கப்பட்டுள்ளது. ஜூன் 28-ஆம் தேதி திருவள்ளூர், காஞ்சிபுரம், ராணிப்பேட்டை, வேலூர், திருவண்ணாமலை, நீலகிரி, கோவை, திருப்பூர், திண்டுக்கல், தேனி, விருதுநகர், தென்காசி, திருநெல்வேலி மற்றும் கன்னியாகுமரி மாவட்டங்களில் ஓரிரு இடங்களில் கனமழை பெய்யக்கூடும் என தெரிவிக்கப்பட்டுள்ளது.

ஜூன் 29-ஆம் தேதி கோவை, தேனி மற்றும் நீலகிரி மாவட்டங்களில் கனமழைக்கான வாய்ப்புகள் அதிகமாக இருப்பதாக வானிலை ஆய்வு மையம் தெரிவித்துள்ளது.

சென்னையில் மழைக்கு வாய்ப்பா?

சென்னை மற்றும் புறநகர் பகுதிகளைப் பொறுத்தவரையில், வானம் ஓரளவு மேகமூட்டத்துடன் காணப்படலாம். மாலை அல்லது இரவு நேரங்களில் நகரின் ஒரு சில பகுதிகளில் இடி, மின்னலுடன் கூடிய லேசான முதல் மிதமான மழை பெய்ய வாய்ப்பு உள்ளது. அதிகபட்ச வெப்பநிலை 38 டிகிரி செல்சியஸை ஒட்டியும், குறைந்தபட்ச வெப்பநிலை 29 டிகிரி செல்சியஸை ஒட்டியும் இருக்கக்கூடும் என சென்னை வானிலை ஆய்வு மையம் தெரிவித்துள்ளது.