சி. விஜயபாஸ்கர் மற்றும் அவரது மனைவிக்கு அமலாக்கத்துறை சம்மன்.. சொத்து குவிப்பு வழக்கில் தீவிரமடையும் விசாரணை!

சென்னை, நவ.03: தமிழக அரசியலில் பெரும் பரபரப்பை ஏற்படுத்தியுள்ள சொத்து குவிப்பு மற்றும் பணமோசடி வழக்கில், அஇஅதிமுக ஆட்சி காலத்தில் மக்கள் நல்வாழ்வு மற்றும் சுகாதாரத்துறை அமைச்சராகப் பதவி வகித்தவரும், தற்போது தமிழக வெற்றிக் கழகத்தின் மாவட்ட அமைப்புச் செயலாளராகப் பொறுப்பு வகித்துவரும் சி. விஜயபாஸ்கர் மற்றும் அவரது மனைவி ரம்யா ஆகியோருக்கு அமலாக்கத்துறை (ED) தரப்பிலிருந்து அதிகாரப்பூர்வமாகச் சம்மன் அனுப்பப்பட்டுள்ளது. கடந்த 2016 முதல் 2021 வரையிலான காலகட்டத்தில் அமைச்சர் பதவியில் இருந்தபோது வருமானத்திற்கு அதிகமான முறையற்ற சொத்துக்களைச் சேர்த்ததாகக் கூறப்படும் குற்றச்சாட்டுகளின் அடிப்படையில் இந்த நடவடிக்கை எடுக்கப்பட்டுள்ளது.

இதையும் படிக்க: தீபாவளி சிறப்பு ரயில்.. முன்பதிவு தொடங்கிய சில நிமிடங்களில் விற்றுத்தீர்ந்த டிக்கெட்.. பயணிகள் ஏமாற்றம்!!

லஞ்ச ஒழிப்புத்துறையின் சோதனை:

கடந்த 2021-ஆம் ஆண்டில் தமிழக லஞ்ச ஒழிப்பு மற்றும் கண்காணிப்புத் துறை பதிவு செய்த வழக்கின் அடிப்படையில், அமலாக்கத்துறை சட்டவிரோத பணப்பரிமாற்றத் தடுப்புச் சட்டத்தின் (PMLA) கீழ் விசாரணையைத் தீவிரப்படுத்தியுள்ளது. தொடர்ந்து நடத்தப்பட்ட விசாரணைகளின் அடிப்படையில், கடந்த 2023-ஆம் ஆண்டில் லஞ்ச ஒழிப்புத்துறை தாக்கல் செய்த குற்றப்பத்திரிகையில், விஜயபாஸ்கர் சுமார் ரூ.35.79 கோடி அளவுக்கு மதிப்பிலான சொத்துக்களைக் குவித்துள்ளதாகக் குறிப்பிடப்பட்டிருந்தது. இதன் தொடர்ச்சியாக, கடந்த 2024-ஆம் ஆண்டில் புதுக்கோட்டையில் உள்ள அவரது இல்லங்களில் அமலாக்கத்துறை அதிகாரிகள் அதிரடிச் சோதனைகளை மேற்கொண்டதுடன், முந்தைய கட்டச் சம்மன்களின் அடிப்படையில் அவரிடமும் அவரது மனைவியிடமும் வாக்குமூலங்களைப் பதிவு செய்திருந்ததும் குறிப்பிடத்தக்கது.

அமலாக்கத்துறையின் அடுத்த கட்ட நகர்வுகள்:

தற்போது அமலாக்கத்துறை தரப்பிலிருந்து பிறப்பிக்கப்பட்டுள்ள புதிய சம்மனின்படி, முன்னாள் அமைச்சர் சி. விஜயபாஸ்கர் மற்றும் அவரது மனைவி ரம்யா ஆகியோர் சென்னையில் உள்ள அமலாக்கத்துறையின் மண்டல அலுவலகத்தில் விசாரணைக்காக நேரில் ஆஜராக வேண்டும் என உத்தரவிடப்பட்டுள்ளது. இதில் ஒருவார் வரும் வெள்ளிக்கிழமையும், மற்றொருவர் அடுத்த வாரமும் விசாரணைக்கு ஆஜராவார்கள் என எதிர்பார்க்கப்படுகிறது. இந்த விசாரணையின்போது கடந்த காலங்களில் திரட்டப்பட்ட சொத்து விவரங்கள் மற்றும் நிதிப் பரிமாற்றங்கள் குறித்து விரிவான கேள்விகள் எழுப்பப்படும் எனத் தெரிகிறது.

இதையும் படிக்க: தமிழக அரசின் தீபாவளி கிஃப்ட்.. கூட்டுறவு- போக்குவரத்து கழக ஊழியர்களுக்கு போனஸ் அறிவிப்பு.. எவ்வளவு தெரியுமா?

அமலாக்கத்துறையின் தொடர் நடவடிக்கைகள்:

முக்கியமான முன்னாள் அமைச்சர் ஒருவர் மீதான அமலாக்கத்துறையின் இந்தச் சம்மன் நடவடிக்கை தமிழக அரசியல் களத்தில் பெரும் விவாதங்களை ஏற்படுத்தியுள்ளது. சட்டவிரோத பணப் பரிமாற்றம் மற்றும் பொருளாதாரக் குற்றங்கள் தொடர்பான வழக்குகளில் மத்தியப் புலனாய்வு முகாமைகள் காட்டிவரும் தீவிரம் அரசியல் கட்சிகள் மத்தியில் கவன ஈர்ப்பைப் பெற்றுள்ளது. அமலாக்கத்துறை விசாரணைக்குப் பிறகு இவ்வழக்கில் மேலும் பல திடுக்கிடும் உண்மைகள் வெளிவரும் என எதிர்பார்க்கப்படுவதால், அரசியல் மற்றும் சட்ட வட்டாரங்கள் இதன் மீது மிகுந்த எதிர்பார்ப்புடன் உற்றுநோக்கி வருகின்றன.