வயிற்றில் புற்றுநோயைத் தூண்டும் ரசாயனங்களைத் தடுக்குமா வைட்டமின் சி?
Block Cancer: வைட்டமின் சி வயிற்றில் புற்றுநோய் அபாயத்துடன் தொடர்புடைய நைட்ரோசமைன்கள் உருவாவதைக் கட்டுப்படுத்த உதவக்கூடும் என ஆய்வு தெரிவிக்கிறது. எலுமிச்சை, ஆரஞ்சு, குடைமிளகாய், கீரை போன்ற வைட்டமின் சி நிறைந்த உணவுகளை உணவில் சேர்த்துக்கொள்வது பயனளிக்கலாம். இருப்பினும், புற்றுநோயைத் தடுப்பதில் வைட்டமின் சி எந்த அளவுக்குப் பங்காற்றுகிறது என்பதை உறுதிப்படுத்த மேலும் ஆய்வுகள் தேவை.
வைட்டமின் சி உடலின் நோய் எதிர்ப்புச் சக்தியை மேம்படுத்துவதற்கு உதவுகிறது என்பது பலரும் அறிந்த விஷயம். ஆனால், இது வயிற்றில் புற்றுநோயுடன் தொடர்புடைய தீங்கு விளைவிக்கும் ரசாயனங்கள் உருவாவதையும் தடுக்கக்கூடும் என்று புதிய ஆய்வு தெரிவிக்கிறது. கனடாவில் உள்ள வாட்டர்லூ பல்கலைக்கழக ஆராய்ச்சியாளர்கள் மேற்கொண்ட இந்த ஆய்வு, Journal of Theoretical Biology இதழில் வெளியாகியுள்ளது. உணவு உட்கொள்ளும் நேரத்தில் வைட்டமின் சி நிறைந்த பொருட்களைச் சேர்த்துக்கொள்வது வயிற்றில் ஏற்படும் சில தீங்கு விளைவிக்கும் ரசாயன மாற்றங்களைக் கட்டுப்படுத்த உதவலாம் எனக் கூறப்படுகிறது.
Also Read: கவனம்: வாழைப்பழத்துடன் இந்த உணவுகளைச் சேர்த்து சாப்பிடலாமா?
புற்றுநோய் அபாயத்தை அதிகரிக்கும் ரசாயனங்கள்
பதப்படுத்தப்பட்ட இறைச்சிகளான சாசேஜ், சலாமி, பேக்கன் உள்ளிட்ட உணவுகளிலும், சில காய்கறிகள் மற்றும் குடிநீரிலும் நைட்ரேட், நைட்ரைட் போன்ற சேர்மங்கள் காணப்படுகின்றன. இவை வயிற்றில் உள்ள அமிலங்களுடன் வினைபுரியும்போது நைட்ரோசமைன்கள் (Nitrosamines) எனப்படும் ரசாயனங்கள் உருவாக வாய்ப்புள்ளது. இத்தகைய ரசாயனங்கள் வயிறு மற்றும் உணவுக்குழாய் புற்றுநோய் அபாயத்துடன் தொடர்புடையதாகக் கருதப்படுகின்றன.
வைட்டமின் சி எப்படி செயல்படுகிறது?
வைட்டமின் சி வயிற்றில் உள்ள நைட்ரைட்டுகளுடன் வினைபுரிந்து, அவற்றை நைட்ரிக் ஆக்சைடாக மாற்றுவதன் மூலம் நைட்ரோசமைன்கள் உருவாவதைக் கட்டுப்படுத்த உதவுகிறது. இதனால் புற்றுநோய் அபாயத்துடன் தொடர்புடைய சில ரசாயனங்கள் உருவாகும் வாய்ப்பு குறையலாம் என ஆராய்ச்சியாளர்கள் விளக்குகின்றனர்.
காய்கறிகள் ஏன் சிறந்தவை?
கீரை, செலரி போன்ற காய்கறிகளில் இயற்கையாகவே நைட்ரேட் இருந்தாலும், அவற்றில் வைட்டமின் சி மற்றும் ஆன்டிஆக்ஸிடன்ட்களும் உள்ளன. இவை வயிற்றில் தீங்கு விளைவிக்கும் ரசாயன மாற்றங்களைக் கட்டுப்படுத்த உதவுகின்றன. ஆனால், பதப்படுத்தப்பட்ட இறைச்சிகளில் நைட்ரைட் அதிகமாகவும், இயற்கையான வைட்டமின் சி குறைவாகவும் இருப்பதால் அவற்றை அடிக்கடி சாப்பிடுவது ஆரோக்கியத்திற்கு பாதிப்பை ஏற்படுத்தலாம்.
Also Read: கவனம்: வாழைப்பழத்துடன் இந்த உணவுகளைச் சேர்த்து சாப்பிடலாமா?
உணவு உட்கொள்ளும் நேரமும் முக்கியம்
வைட்டமின் சி நிறைந்த உணவுகளைச் சாப்பிடும் நேரமும் முக்கியமானதாகக் கூறப்படுகிறது. உணவுடன் சேர்த்தோ அல்லது உணவு சாப்பிட்ட சிறிது நேரத்திற்குள்ளோ வைட்டமின் சி எடுத்துக்கொள்வது சிறந்த பலனை அளிக்கலாம். உணவில் எலுமிச்சைச் சாறு சேர்ப்பது, குடைமிளகாய் பயன்படுத்துவது, இனிப்புக்குப் பதிலாக ஆரஞ்சு அல்லது ஸ்ட்ராபெர்ரி சாப்பிடுவது போன்றவற்றைப் பின்பற்றலாம். இருப்பினும், இந்த ஆய்வு கணித மாதிரிகளை அடிப்படையாகக் கொண்டது என்பதால், புற்றுநோய் அபாயத்தை உண்மையில் எந்த அளவுக்குக் குறைக்கிறது என்பதை உறுதிப்படுத்த மேலும் மனிதர்கள் மீதான மருத்துவ ஆய்வுகள் தேவைப்படுகின்றன.
பொறுப்புத்துறப்பு: இந்தக் கட்டுரையில் வழங்கப்பட்டுள்ள உடற்பயிற்சி மற்றும் ஆரோக்கியம் தொடர்பான தகவல்கள் அனைத்தும் பொதுவான விழிப்புணர்வு மற்றும் தகவல் நோக்கங்களுக்காக மட்டுமே பகிரப்பட்டுள்ளன. உங்கள் உடல்நிலைக்கு ஏற்றவாறு தகுதிவாய்ந்த மருத்துவர் அல்லது அங்கீகரிக்கப்பட்ட உடற்பயிற்சி நிபுணரின் ஆலோசனையைப் பெறுவது அவசியம்.