காலையில் தூங்கி எழுந்ததும் முகம் வீங்கி காணப்படுவது ஏன்?

காலையில் தூங்கி எழுந்தவுடன் சிலருக்கு முகம் வீங்கியிருப்பது போன்ற தோற்றம் ஏற்படலாம். குறிப்பாக கண்களைச் சுற்றியுள்ள பகுதிகள், கன்னங்கள் ஆகியவை வழக்கத்தைவிட சற்று வீங்கிக் காணப்படும். இது சில மணி நேரங்களில் தானாகவே குறைந்துவிடும். ஆனால், இதற்குப் பின்னால் நம்முடைய அன்றாட பழக்கவழக்கங்களும் சில உடல்நலப் பிரச்சினைகளும் காரணமாக இருக்கலாம். இரவு முழுவதும் படுத்துத் தூங்கும்போது உடலில் உள்ள திரவங்கள் முகம் மற்றும் கண்களைச் சுற்றியுள்ள திசுக்களில் தற்காலிகமாகத் தேங்கலாம். இதனால் காலையில் முகம் வீங்கியதுபோன்ற தோற்றம் ஏற்படுகிறது. எழுந்து நடமாடத் தொடங்கியதும் இந்த வீக்கம் படிப்படியாகக் குறைய வாய்ப்புள்ளது.

Also Read: கழுத்து மற்றும் அக்குள் பகுதியில் கருமை ஏற்படுவது ஏன்?

அதிக உப்பு உணவுகள்

இரவு நேரத்தில் அதிக உப்பு நிறைந்த உணவுகள், சிப்ஸ், துரித உணவுகள் மற்றும் பதப்படுத்தப்பட்ட உணவுகளைச் சாப்பிடுவது உடலில் நீர் தேங்குவதற்கு வழிவகுக்கும். இதன் காரணமாக அடுத்த நாள் காலையில் முகம் வீங்கிக் காணப்படலாம்.

தூக்கமின்மை

போதுமான நேரம் தூங்காமல் இருப்பது அல்லது தூக்கத்தின் தரம் குறைவாக இருப்பது முகத்தின் தோற்றத்திலும் தாக்கத்தை ஏற்படுத்தும். குறிப்பாக கண்களுக்குக் கீழே வீக்கம் மற்றும் சோர்வான தோற்றம் ஏற்படலாம்.

மது அருந்துதல்

மது அருந்துவது உடலில் நீரிழப்பை ஏற்படுத்தக்கூடும். இதனால் உடலின் திரவச் சமநிலை பாதிக்கப்பட்டு, மறுநாள் காலையில் முகம் வீங்கியதுபோல் தெரியலாம்.

ஒவ்வாமை பாதிப்பு

தூங்கும் அறையில் இருக்கும் தூசிப் பூச்சிகள், மகரந்தத் துகள்கள், செல்லப்பிராணிகளின் முடிகள் போன்றவை ஒவ்வாமையை ஏற்படுத்தலாம். இதனால் கண்களில் அரிப்பு, நீர் வடிதல் மற்றும் முகத்தில் வீக்கம் போன்ற அறிகுறிகள் தோன்றலாம். சில அழகுசாதனப் பொருட்களும் ஒவ்வாமையைத் தூண்டக்கூடும்.

மாதவிடாய் கால ஹார்மோன் மாற்றங்கள்

பெண்களுக்கு மாதவிடாய் தொடங்குவதற்கு முந்தைய நாட்களில் ஏற்படும் ஹார்மோன் மாற்றங்கள் காரணமாக உடலில் நீர் தேங்கலாம். இதனால் காலையில் முகம் சற்று வீங்கியிருப்பது போன்ற தோற்றம் ஏற்பட வாய்ப்புள்ளது. சைனஸ் தொற்று அல்லது அழற்சி காரணமாக முகத்தில் வீக்கம், வலி, மூக்கடைப்பு மற்றும் தலைவலி போன்ற பாதிப்புகள் ஏற்படலாம். குறிப்பாக கண்களைச் சுற்றியுள்ள பகுதிகளில் வீக்கம் அதிகமாகத் தெரியலாம்.

Also Read: கழுத்து மற்றும் அக்குள் பகுதியில் கருமை ஏற்படுவது ஏன்?

முக வீக்கத்தைக் குறைக்க என்ன செய்யலாம்?

தினமும் போதுமான அளவு தண்ணீர் குடிப்பது, இரவு நேரத்தில் அதிக உப்பு நிறைந்த உணவுகளைத் தவிர்ப்பது, முறையான தூக்கத்தைப் பின்பற்றுவது போன்றவை முக வீக்கத்தைக் கட்டுப்படுத்த உதவும். காலையில் முகத்தை குளிர்ந்த நீரால் கழுவுவதும், குளிர்ந்த ஒத்தடம் கொடுப்பதும் தற்காலிக வீக்கத்தைக் குறைக்க உதவலாம். தூங்கும்போது தலையைச் சற்று உயர்த்தி வைத்துக்கொள்வதும் பயனளிக்கலாம்.

மருத்துவ கவனம் அவசியம்: காலையில் ஏற்படும் லேசான முக வீக்கம் சில மணி நேரங்களில் குறைந்துவிடுவது பொதுவாகப் பெரிய பிரச்சினையல்ல. ஆனால் தொடர்ந்து வீக்கம் நீடித்தால் அல்லது அடிக்கடி ஏற்பட்டால் மருத்துவரை அணுக வேண்டும். திடீரென உதடு, நாக்கு அல்லது தொண்டையில் வீக்கம், மூச்சுவிடுவதில் சிரமம் ஏற்பட்டால் உடனடியாக அவசர மருத்துவ உதவியை நாட வேண்டும்.