இடமே தேவையில்லை! சின்ன பால்கனியில் அமைக்கலாம் தோட்டம்..

நகர்ப்புற வாழ்க்கையில் இயற்கையான மற்றும் ரசாயனமற்ற உணவுகளை உட்கொள்வது சவாலாக மாறியுள்ளது. இதற்கு சிறந்த தீர்வாக பால்கனி தோட்டம் உருவெடுத்துள்ளது. குறைந்த இட வசதியிலும், எளிமையான பராமரிப்பிலும் அதிக ஊட்டச்சத்துக்கள் நிறைந்த பசுமைக் கீரைகளை நம் வீட்டிலேயே வளர்க்க முடியும். தினமும் புதிய கீரைகளைச் சமையலில் சேர்ப்பது உடலுக்குப் புத்துணர்ச்சியையும் வலுவான நோயெதிர்ப்புச் சக்தியையும் வழங்குகிறது.

பசலைக்கீரை: இரும்புச்சத்தின் உறைவிடம்

பால்கனி தொட்டிகளில் வளர்ப்பதற்கு மிகவும் ஏற்ற கீரைகளில் முதன்மையானது பசலைக்கீரை. இதில் வைட்டமின் ஏ, சி மற்றும் இரும்புச்சத்து, பொட்டாசியம் போன்ற அத்தியாவசியத் தாதுக்கள் அதிக அளவில் நிறைந்துள்ளன. மிதமான சூரிய ஒளி மற்றும் தொடர்ச்சியான நீர்ப்பாசனம் இருந்தால் இது விரைவாக வளரக்கூடியது. ரத்த சோகையைக் கட்டுப்படுத்தவும், எலும்புகளின் அடர்த்தியை அதிகரிக்கவும் இந்த கீரை பெரிதும் உதவுகிறது.

வெந்தயக்கீரை: சர்க்கரை அளவைக் கட்டுப்படுத்தும் இயற்கை மருந்து

குறைந்த நாட்களில் பலன் தரும் கீரைகளில் வெந்தயக்கீரை முக்கியமானது. வீட்டில் சமையலுக்குப் பயன்படுத்தும் வெந்தய விதைகளைச் சிறிய தொட்டி மண்ணில் தூவி, லேசாகத் தண்ணீர் தெளித்து வந்தாலே சில நாட்களில் தளதளவென வளரத் தொடங்கும். நார்ச்சத்து நிறைந்துள்ள இக்கீரை, செரிமான மண்டலத்தைச் சீராக்குவதுடன் ரத்தத்தில் உள்ள சர்க்கரையின் அளவைக் கட்டுப்படுத்தவும், உடல் சூட்டைத் தணிக்கவும் உதவுகிறது.

கொத்தமல்லி: நறுமணமும் நன்மைகளும் நிறைந்த மூலிகை

தினசரி சமையலுக்குப் பயன்படுத்தப்படும் கொத்தமல்லித் தழையை பால்கனியில் வளர்ப்பது மிகவும் எளிது. முழு தனியா விதைகளை இரண்டாக உடைத்து மண்ணில் விதைத்தால், சில வாரங்களில் பசுமையான கொத்தமல்லித் தழைகளைப் அறுவடை செய்யலாம். வைட்டமின் கே மற்றும் ஆன்டிஆக்ஸிடன்ட்கள் நிறைந்துள்ள இது, இதய ஆரோக்கியத்தைப் பாதுகாப்பதோடு உணவிற்கு நறுமணத்தையும் சுவையையும் கூட்டுகிறது.

Also Read: அசல் உடன்குடி கருப்பட்டியைக் கண்டறிவது எப்படி? போலி பித்தலாட்டம் அம்பலம்!

புதினா: உடனடி புத்துணர்ச்சி தரும் எளிய பயிர்

சமையலறையில் பயன்படுத்திய புதினா தண்டுகளைத் தூக்கி எறியாமல், சிறிய தொட்டி மண்ணில் ஊன்றி வைத்தாலே அது புதிய கிளைகளைப் பரப்பி வேகமாக வளரும். புதினாவில் உள்ள மருத்துவக் குணங்கள் வயிற்று உபாதைகள் மற்றும் செரிமானக் கோளாறுகளைக் குணப்படுத்த உதவுகின்றன. பால்கனியில் புதினா செடிகளை வளர்ப்பது வீட்டிற்கு நறுமணத்தைத் தருவதோடு, தூய்மையான காற்றை அளிக்கவும் துணைபுரிகிறது.

சிறுகீரை: தினசரி ஊட்டச்சத்திற்கான சிறந்த தேர்வு

சிறுகீரை விதைகள் சிறிய தொட்டிகளிலும், பிளாஸ்டிக் டப்பாக்களிலும் கூட மிக விரைவாக முளைத்து வளரக்கூடியவை. வைட்டமின்களும், தாது உப்புகளும் இதில் ஏராளமாக உள்ளதால், குழந்தைகளின் வளர்ச்சிக்கு இது மிகவும் நல்லது. ரசாயன உரங்கள் ஏதுமின்றி இயற்கை முறையில் பால்கனியிலேயே இவற்றை வளர்ப்பதன் மூலம் குடும்பத்தினர் அனைவருக்கும் சத்தான, புதிய உணவை தினமும் வழங்க முடியும்.