AQI
TV9 NETWORK LOGO
Default Image
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

Latest Newsதமிழ்நாடுகிரிக்கெட்பொழுதுபோக்குவெப் ஸ்டோரிஸ்லைஃப்ஸ்டைல்வணிகம்டெக்னாலஜிஇந்தியாஆன்மீகம்உலகம்ஹெஃல்த்வைரல்போட்டோ கேலரி

இந்தியாவில் சாலை விபத்துகள்: ‘விபத்து’ என்று கடந்து செல்லலாமா? உயிரிழப்புகளுக்குப் பின்னால் இருக்கும் கேள்விகள்!

ஒரு வாகன ஓட்டியின் தவறு மட்டுமே எல்லா விபத்துகளுக்கும் காரணம் என்று சொல்லிவிட முடியாது. சாலையை வடிவமைத்த பொறியாளர், விதிகளை அமல்படுத்தும் அதிகாரிகள், வாகன உரிமையாளர்கள், விபத்து நேரத்தில் விரைந்து உதவும் மருத்துவக் குழுக்கள் எனப் பலருக்கும் இதில் பொறுப்பு இருக்கிறது.

இந்தியாவில் சாலை விபத்துகள்: ‘விபத்து’ என்று கடந்து செல்லலாமா? உயிரிழப்புகளுக்குப் பின்னால் இருக்கும் கேள்விகள்!
சாலை விபத்துகள்
Santosh Nair
Santosh Nair | Published: 20 Nov 2026 14:00 PM IST

இந்தியாவில் சாலை விபத்துகள் என்பது நாளுக்கு நாள் அதிகரித்து வரும் மிகப்பெரிய பொதுப் பாதுகாப்பு பிரச்சினையாக மாறியுள்ளது. ஒவ்வொரு முறையும் சாலையில் ஒருவர் உயிரிழக்கும்போது, அதை ‘விபத்து’ என்று சொல்லிவிட்டு கடந்து செல்கிறோம். ஆனால், உண்மையில் அது வெறும் விபத்துதானா? அல்லது தவிர்த்திருக்கக்கூடிய உயிரிழப்பா? இந்தக் கேள்வியை நாம் அனைவரும் எழுப்ப வேண்டிய நேரம் இது.

ஆண்டுக்கு 1.72 லட்சத்துக்கும் அதிகமான உயிரிழப்புகள்

மத்திய சாலைப் போக்குவரத்து மற்றும் நெடுஞ்சாலைத் துறை அமைச்சகத்தின் 2023ஆம் ஆண்டு அறிக்கையின்படி, இந்தியாவில் ஒரே ஆண்டில் 1,72,890 பேர் சாலை விபத்துகளில் உயிரிழந்துள்ளனர். இதைக் கணக்கிட்டுப் பார்த்தால், ஒவ்வொரு மணி நேரத்திற்கும் சுமார் 20 பேர் உயிரிழக்கின்றனர். அதாவது, ஒவ்வொரு மூன்று நிமிடங்களுக்கும் ஒருவர் சாலை விபத்தில் உயிரிழக்கிறார்.

இந்த எண்ணிக்கை வெறும் புள்ளிவிவரம் மட்டுமல்ல. ஒவ்வொரு உயிரிழப்புக்குப் பின்னாலும் ஒரு குடும்பம், அவர்களைச் சார்ந்திருக்கும் உறவுகள், நிறைவேறாமல் போன கனவுகள் எனப் பல விஷயங்கள் இருக்கின்றன.

உயிரிழப்பவர்களில் அதிகம் யார்?

சாலை விபத்துகளில் உயிரிழப்பவர்களின் விவரங்களைப் பார்க்கும்போது அதிர்ச்சியளிக்கும் தகவல்கள் வெளியாகின்றன.
– இருசக்கர வாகன ஓட்டிகள் 44.8 சதவீதம் பேர்.
– பாதசாரிகள் சுமார் 20 சதவீதம் பேர்.
– உயிரிழந்தவர்களில் 85 சதவீதம் பேர் ஆண்கள்.
– 9,489 குழந்தைகள் சாலை விபத்துகளில் உயிரிழந்துள்ளனர்.
அதாவது, உயிரிழப்பவர்களில் மூன்றில் இரண்டு பங்கினர் இருசக்கர வாகனங்களில் பயணிப்பவர்கள் அல்லது சாலையில் நடந்து செல்பவர்கள். கார்களில் பயணிப்பவர்களைக் காட்டிலும் பாதுகாப்பு குறைவான நிலையில் இருப்பவர்களே அதிகம் பாதிக்கப்படுகின்றனர்.

நகரங்களைவிட கிராமப்புறங்களில் அதிக ஆபத்து!

சாலை விபத்துகள் என்றாலே நெரிசல் மிகுந்த நகரச் சாலைகள்தான் நமக்கு நினைவுக்கு வரும். ஆனால், புள்ளிவிவரங்கள் வேறொரு உண்மையைச் சொல்கின்றன.

இந்தியாவில் சாலை விபத்து உயிரிழப்புகளில் சுமார் 68 சதவீதம் கிராமப்புறங்களில் நிகழ்ந்துள்ளன.

அதிக உயிரிழப்புகளைப் பதிவு செய்த மாநிலமாக உத்தரப் பிரதேசம் உள்ளது. அங்கு 23,652 பேர் உயிரிழந்துள்ளனர். இது நாட்டின் மொத்த உயிரிழப்புகளில் 13.7 சதவீதமாகும்.

அதேபோல், அதிக உயிரிழப்புகளைப் பதிவு செய்த நகரமாக டெல்லி உள்ளது. அங்கு 1,457 பேர் உயிரிழந்துள்ளனர்.

கிராமப்புறங்களில் போதிய நடைபாதைகள் இல்லாதது, சாலைப் பிரிப்பான்கள் இல்லாதது, முறையான சாலை விளக்குகள் இல்லாதது போன்ற பிரச்சினைகள் பாதசாரிகளுக்கும் வாகன ஓட்டிகளுக்கும் ஆபத்தை ஏற்படுத்துகின்றன.

அதிவேகப் பயணம் முக்கிய காரணம்

சாலை விபத்து உயிரிழப்புகளில் 68.1 சதவீதம் அதிவேகப் பயணத்துடன் தொடர்புடையதாக அறிக்கை தெரிவிக்கிறது.

வேகமாகச் செல்வது மட்டுமல்லாமல், சாலை வடிவமைப்பில் உள்ள குறைபாடுகள், போக்குவரத்து விதிகளை முறையாக அமல்படுத்தாதது, வாகனங்களின் பராமரிப்பில் அலட்சியம் போன்றவையும் விபத்துகளுக்குக் காரணமாக இருக்கலாம்.

ஒரு வாகன ஓட்டியின் தவறு மட்டுமே எல்லா விபத்துகளுக்கும் காரணம் என்று சொல்லிவிட முடியாது. சாலையை வடிவமைத்த பொறியாளர், விதிகளை அமல்படுத்தும் அதிகாரிகள், வாகன உரிமையாளர்கள், விபத்து நேரத்தில் விரைந்து உதவும் மருத்துவக் குழுக்கள் எனப் பலருக்கும் இதில் பொறுப்பு இருக்கிறது.

விபத்து’ என்ற வார்த்தையை மாற்ற வேண்டுமா?

சாலைப் பாதுகாப்பு நிபுணர்கள் பலர் ‘Accident’ என்ற வார்த்தைக்குப் பதிலாக ‘Crash’ என்ற வார்த்தையைப் பயன்படுத்த விரும்புகின்றனர். இதற்குக் காரணம் இருக்கிறது. ‘விபத்து’ என்று சொல்லும்போது அது யாருடைய கட்டுப்பாட்டிலும் இல்லாமல் தற்செயலாக நடந்த சம்பவம் என்ற எண்ணம் உருவாகிறது. ஆனால், ‘மோதல்’ என்று குறிப்பிடும்போது அதற்கான காரணங்கள் என்ன, அதைத் தடுத்திருக்க முடியுமா என்ற கேள்விகள் எழுகின்றன.

அதிவேகம், போதிய சாலை வசதிகள் இல்லாமை, போக்குவரத்து விதிமீறல்கள், ஓட்டுநர்களின் சோர்வு, அவசர மருத்துவ உதவி கிடைப்பதில் தாமதம் எனப் பல காரணங்கள் ஒரு உயிரிழப்புக்குப் பின்னால் இருக்கலாம்.

எனவே, ஒவ்வொரு விபத்தையும் வெறும் துரதிர்ஷ்டம் என்று கருதாமல், அதற்கான காரணங்களைக் கண்டறிந்து நடவடிக்கை எடுப்பதே முக்கியம்.

உயிர் வாழும் உரிமையும் சாலைப் பாதுகாப்பும்!

இந்திய அரசியலமைப்புச் சட்டத்தின் 21வது பிரிவு ஒவ்வொரு குடிமகனுக்கும் உயிர் வாழும் உரிமையை உறுதி செய்கிறது. அந்த உரிமை வீட்டின் வாசலோடு முடிந்துவிடுவதில்லை. இருசக்கர வாகனத்தில் பயணிப்பவருக்கும், பள்ளிக்குச் செல்லும் குழந்தைக்கும், சாலையில் நடந்து செல்பவருக்கும் அந்த உரிமை உண்டு.

ஹெல்மெட் மற்றும் சீட் பெல்ட் அணிவது தொடர்பான விதிமுறைகள் பாதுகாப்பை உறுதி செய்வதற்காகவே உருவாக்கப்பட்டுள்ளன. அவற்றைப் பின்பற்றுவது அவசியம்.
இனியாவது கேள்வி எழுப்புவோம்!
சாலை விபத்தில் உயிரிழப்பவர்கள் அனைவரும் நம்மைப் போலவே அன்றைய நாளுக்கான திட்டங்களுடன் வீட்டை விட்டு வெளியேறியவர்கள்தான். மாலையில் வீடு திரும்புவோம் என்ற நம்பிக்கையுடன் பயணித்தவர்கள்.எனவே, சாலை விபத்து குறித்த செய்தியைப் படிக்கும்போது, அதை வெறும் செய்தியாகக் கடந்து செல்லாமல், ஏன் இந்த விபத்து நடந்தது? இதைத் தடுத்திருக்க முடியுமா? இனி இதுபோன்ற உயிரிழப்புகள் ஏற்படாமல் இருக்க என்ன செய்ய வேண்டும்? என்ற கேள்விகளை எழுப்ப வேண்டும்.

ஒவ்வொரு சாலை உயிரிழப்பையும் விதி என்று ஏற்றுக்கொள்வதற்குப் பதிலாக, தவிர்க்க வேண்டிய உயிரிழப்பாகப் பார்க்கத் தொடங்கினால்தான் பாதுகாப்பான சாலைகளை உருவாக்க முடியும்.

Follow Us