பழைய வாகனங்களும் எத்தனால் கலந்த பெட்ரோலை பயன்படுத்தலாமா? – மத்திய அரசு விளக்கம்

எத்தனால் கலந்த பெட்ரோல் குறித்து சமூக வலைதளங்களில் பரவி வரும் தவறான தகவல்களுக்கு மத்திய அரசு விளக்கமளித்துள்ளது. இது தொடர்பாக மத்திய அரசு வெளியிட்ட அறிக்கையில் 2023க்கு முன் தயாரிக்கப்பட்ட வாகனங்களும் E20 பெட்ரோலை பாதுகாப்பாக பயன்படுத்த முடியும் என்றும், இ20 காரணமாக நாடு முழுவதும் வாகனங்களின் எஞ்சின் சேதமடைந்ததாக எந்த உறுதிப்படுத்தப்பட்ட ஆதாரமும் இல்லை என்றும் தெரிவித்துள்ளது.

பழைய வாகனங்களும் எத்தனால் கலந்த பெட்ரோலை பயன்படுத்தலாமா?

மேலும், மாருதி சுசுகி, டொயோட்டா, ஹீரோ மோட்டோகார்ப், ஹூண்டாய், டிவிஎஸ், பஜாஜ் உள்ளிட்ட முன்னணி வாகன உற்பத்தியாளர்கள் E20 பெட்ரோல் குறித்து நம்பிக்கை தெரிவித்துள்ளதாகவும், பழைய வாகனங்களிலும் எஞ்சின் சேதம் ஏற்பட்டதற்கான ஆதாரம் இல்லை என்றும் அரசு கூறியுள்ளது. அதேபோல், E20 பயன்படுத்துவதால் மைலேஜ் மிக சிறிய அளவிலேயே குறையும் என்றும், எரிபொருள் திறன் ஓட்டும் முறை, போக்குவரத்து நெரிசல், வாகன பராமரிப்பு போன்ற காரணிகளையும் பொறுத்தே மாறுபடும் என மத்திய அரசு விளக்கம் அளித்துள்ளது.

2023க்கு முன் தயாரிக்கப்பட்ட வாகனங்களில் E20 பெட்ரோலைப் பயன்படுத்த முடியாதா?

உண்மை: நாட்டில் E15+ எரிபொருள் மூன்றரை ஆண்டுகளுக்கும் மேலாகவும், E19-E20 எரிபொருள் இரண்டரை ஆண்டுகளுக்கும் மேலாகவும் பரவலாகப் பயன்படுத்தப்பட்டு வருகிறது. இக்காலகட்டத்தில், எத்தனால் கலப்பு காரணமாக என்ஜின் பழுதடைதல் அல்லது வாகனம் நின்றுபோதல் போன்ற எந்தவொரு சம்பவமும் பதிவாகவில்லை. எத்தனால் கலப்பு என்ஜின்கள் அல்லது எரிபொருள் அமைப்புகளுக்குப் பெரிய அளவிலான பாதிப்பை ஏற்படுத்தியிருந்தால், ஏராளமான வாடிக்கையாளர் புகார்கள் எழுந்திருக்கும். ஆனால் அப்படி எதுவும் நடக்கவில்லை.

எத்தனால் என்பது புதிய எரிபொருள் அல்ல. இது உலகம் முழுவதும் நூறு ஆண்டுகளுக்கும் மேலாகப் பயன்படுத்தப்பட்டு வருகிறது. பிரேசில் போன்ற நாடுகள் பல ஆண்டுகளாக அதிக அளவு எத்தனால் கொண்ட எரிபொருளைப் பயன்படுத்தி வருகின்றன. இந்தியாவில் EBP திட்டம் 2001-ல் ஒரு முன்னோடித் திட்டமாகத் தொடங்கப்பட்டது. 2006-ல் E5 எரிபொருள் அறிமுகப்படுத்தப்பட்டது. 2013-14 ஆண்டுகளில் சராசரி கலப்பு அளவு 1.53% மட்டுமே இருந்தபோதிலும், உற்பத்தித் திறன், உள்கட்டமைப்பு மற்றும் தேவையான ஒழுங்குமுறை கட்டமைப்பை மேம்படுத்துவதன் மூலம் இது படிப்படியாக அதிகரிக்கப்பட்டது.

சுமார் 30 கோடி வாகனங்கள் பயனற்றதாகிவிடுமா?

உண்மை: நாட்டில் E15+ பெட்ரோல் மூன்றரை ஆண்டுகளுக்கும் மேலாகவும், E19-E20 பெட்ரோல் இரண்டரை ஆண்டுகளுக்கும் மேலாகவும் பயன்பாட்டில் உள்ளன. இக்காலகட்டத்தில், 20 கோடிக்கும் அதிகமான இருசக்கர வாகனங்களும், 3 கோடிக்கும் அதிகமான பெட்ரோல் கார்களும் எந்தச் சிக்கலுமின்றி இந்த எரிபொருளில் இயங்கி வருகின்றன. E20 எரிபொருள் வாகனங்களைப் பயன்படுத்த முடியாத நிலையை உருவாக்கும் என்ற கூற்று உண்மையாக இருந்திருந்தால், லட்சக்கணக்கான வாகனங்கள் சாலையில் பழுதாகி நின்றிருக்கும். ஆனால் நாட்டில் அத்தகைய சம்பவங்கள் எதுவும் நிகழவில்லை.

E20 எரிபொருள் ஏற்றதல்ல என்று கூறும் வாகன உற்பத்தியாளர்கள்?

உண்மை: டொயோட்டா கிர்லோஸ்கர், மாருதி சுஸுகி, ஹீரோ மோட்டோகார்ப், ஹூண்டாய் மோட்டார் இந்தியா, டிவிஎஸ் மோட்டார் கம்பெனி மற்றும் பஜாஜ் ஆட்டோ ஆகியவற்றின் உயர் அதிகாரிகள், ஜூலை 4, 2026 அன்று பெட்ரோலியம் மற்றும் இயற்கை எரிவாயு அமைச்சகம், கனரகத் தொழில்கள் அமைச்சகம் மற்றும் சாலைப் போக்குவரத்து அமைச்சகம் ஆகியவை இணைந்து நடத்திய செய்தியாளர் சந்திப்பில் பங்கேற்று, E20 எரிபொருளுக்கு முழு ஆதரவை தெரிவித்தனர்.

வாகனங்களின் மைலேஜ் கணிசமாகக் குறையும்?

உண்மை: எரிபொருள் சிக்கனமானது வாகனம் ஓட்டும் முறை, போக்குவரத்து நிலைமைகள், வாகனப் பராமரிப்பு, டயர்களில் உள்ள காற்றின் அளவு மற்றும் ஏர் கண்டிஷனர் பயன்பாடு ஆகியவற்றைப் பொறுத்தே அமைகிறது. பழைய E10 வாகனங்களில் E20 எரிபொருளைப் பயன்படுத்தும்போது ஏற்படக்கூடிய மைலேஜ் குறைவு வெறும் 3 முதல் 5 சதவீதம் மட்டுமே. அதே வேளையில், E20 எரிபொருள் அதிக ஆக்டேன் அளவு, சிறந்த ‘ஆன்டி-நாக்’பண்புகள், தூய்மையான எரிதல், சீரான இயந்திர இயக்கம் மற்றும் சிறந்த முடுக்கம் ஆகியவற்றை வழங்குகிறது.

அரசின் அழுத்தம்?

உண்மை: இந்திய வாகன உற்பத்தியாளர்கள் சட்டரீதியாகவும் தொழில்நுட்ப ரீதியாகவும் பொறுப்புள்ள, சுதந்திரமான மற்றும் பங்குச் சந்தையில் பட்டியலிடப்பட்ட நிறுவனங்கள் ஆகும். அவர்கள் வாகனக் குறைபாடுகளை மறைத்தால், மிகப்பெரிய உத்தரவாதக் கோரிக்கைகள் (warranty claims), சட்ட நடவடிக்கைகள் மற்றும் நிதி மற்றும் நற்பெயர் இழப்புகளைச் சந்திக்க நேரிடும். முறையான பொறியியல் சோதனைகள் மற்றும் களத் தரவுகளின் அடிப்படையில் உற்பத்தியாளர்கள் எவ்விதத் தடையுமின்றி உத்தரவாதங்களை வழங்குகின்றனர்.