மாலை நேர உடற்பயிற்சி தூக்கத்தைக் கெடுக்குமா? உண்மை என்ன?

மாலை வேளையில் அல்லது இரவு தூங்குவதற்கு முன் உடற்பயிற்சி செய்வது நல்ல தூக்கத்தைக் கெடுத்துவிடும் என்று நீண்ட காலமாக ஒரு கருத்து நிலவி வருகிறது. ஏனெனில், கடினமான உடற்பயிற்சிகள் உடலின் வெப்பநிலையை அதிகரிப்பதோடு, தூக்கத்தை வரவழைக்கும் மெலடோனின் (melatonin) ஹார்மோன் சுரப்பையும் தற்காலிகமாகக் குறைத்துவிடுகின்றன. இருப்பினும், சமீபத்திய ஆய்வுகள் இந்த பொதுவான கருத்தில் சில முக்கிய மாற்றங்களைச் சுட்டிக்காட்டுகின்றன. மாலை நேர உடற்பயிற்சி அனைவருக்கும் தூக்கத்தைக் கெடுப்பதில்லை என்றும், அது நாம் மேற்கொள்ளும் பயிற்சியின் தீவிரத்தைப் பொறுத்தது என்றும் உடலியல் நிபுணர்கள் தெரிவிக்கின்றனர்.

பயிற்சியின் தீவிரமும் தூக்கத்தின் தரமும்

இரவு நேரப் பயிற்சிகள் தூக்கத்தைப் பாதிக்குமா என்பது நீங்கள் எவ்வளவு கடினமாகப் பயிற்சி செய்கிறீர்கள் என்பதைப் பொறுத்தே அமைகிறது. சமீபத்திய ஆய்வுகளின்படி, தூங்குவதற்கு ஒரு மணி நேரத்திற்கு முன்பு செய்யப்படும் மிகக் கடுமையான மற்றும் தீவிரமான பயிற்சிகள் மட்டுமே ஒருவரது தூக்கத்தைக் கலைக்கின்றன. மாறாக, லேசான நடைப்பயிற்சி அல்லது யோகா போன்ற எளிய பயிற்சிகள் உடலைத் தளர்த்தி, அன்றைய நாளின் சோர்வை நீக்கி, நிம்மதியான தூக்கத்திற்கு வழிவகுக்கின்றன. குறிப்பாக, இரவு உணவிற்குப் பின் நடப்பது ரத்த அழுத்தத்தைக் குறைத்து நரம்பு மண்டலத்தை அமைதிப்படுத்த உதவுகிறது.

மனிதருக்கு மனிதர் மாறுபடும் உடலமைப்பு

உடற்பயிற்சியின் தாக்கம் என்பது நபருக்கு நபர் மாறுபடும் தன்மையுடையது. நல்ல உடற்தகுதி கொண்ட நபர்களின் இதயம் மற்றும் உடல் வெப்பநிலை, உடற்பயிற்சிக்குப் பிறகு மிக வேகமாகக் இயல்பு நிலைக்குத் திரும்பிவிடுகிறது. இதனால் அவர்களுக்குத் தூக்கமின்மைப் பாதிப்பு ஏற்படுவதில்லை. ஆனால், உடற்பயிற்சிப் பழக்கம் இல்லாதவர்கள் அல்லது ஆரம்பக் கட்டத்தில் இருப்பவர்கள் கடினமான உடற்பயிற்சி செய்யும்போது, அவர்களது உடல் இயல்பு நிலைக்குத் திரும்ப அதிக நேரமாவதால் தூக்கம் பாதிக்கப்படலாம். அதேபோல், இரவு நேரங்களில் சுறுசுறுப்பாக இருக்கும் சிலருக்கு மாலை நேரப் பயிற்சிகள் கூடுதல் பலனைத் தருவதாகவும் மருத்துவர்கள் குறிப்பிடுகின்றனர்.

Also Read: விபூதி அணிவதின் மறைந்திருக்கும் ஆன்மிக ரகசியம் தெரியுமா?

சிறந்த நேரத்தைத் தேர்ந்தெடுப்பது எப்படி?

உங்கள் தூக்கம் எந்த வகையிலும் பாதிக்கப்படக் கூடாது எனில், தூங்குவதற்கு குறைந்தது நான்கு மணி நேரத்திற்கு முன்பாகவே உடற்பயிற்சியை நிறைவு செய்துவிடுவது நல்லது என்று தரவுகள் காட்டுகின்றன. மேலும், காலையில் அல்லது பகல் பொழுதில் திறந்தவெளியில் சூரிய வெளிச்சம் படுமாறு உடற்பயிற்சி செய்வது இரவு நேரத்தில் மிக ஆழமான தூக்கத்தைப் பெற உதவும். ஒருவேளை உங்களுக்கு மாலை நேரத்தில் மட்டுமே உடற்பயிற்சி செய்ய நேரம் கிடைத்தால், தீவிரமான பயிற்சிக்குப் பிறகு மூச்சுப்பயிற்சி அல்லது தியானம் மூலம் உடலைக் குளிர்விக்க பழக வேண்டும். அத்துடன் உடற்பயிற்சிக்குப்பின் கார்போஹைட்ரேட் மற்றும் புரோட்டீன் நிறைந்த தகுந்த உணவை உட்கொள்வது நள்ளிரவில் தூக்கம் கலைவதைத் தடுக்கும்.