பெண்களின் மாரடைப்பு அறிகுறிகள் – ஆண்களிடம் இருந்து ஏன் வேறுபடுகின்றன?

மாரடைப்பு (Heart Attack) எப்பொழுது யாருக்கு ஏற்படும் என்பதை கணிக்க முடியாததாக இருக்கிறது. எனவே சரியான நேரத்தில் கண்டறிந்து சிகிச்சை அளித்தால், நோயாளியின் உயிரைக் காப்பாற்ற முடியும், ஆனால் சிறிது தாமதம் ஏற்பட்டாலும், உயிருக்கு ஆபத்து ஏற்படலாம். அதற்கு மாரடைப்புக்கான அறிகுறிகளை சரியாக தெரிந்து வைத்திருப்பது அவசியம்.  பொதுவாக, கடுமையான மார்பு வலி, இடது தோள்பட்டையில் அல்லது சுவாசிப்பதில் சிரமம் ஆகியவை மாரடைப்பின் பொதுவான அறிகுறிகளாக கருதப்படுகிறது. ஆனால் பெண்களில் (Women) மாரடைப்பின் அறிகுறிகள் பெரும்பாலும் ஆண்களை விட மிகவும் வித்தியாசமாகவும் இருக்கும் என்று கூறப்படுகிறது. பெண்களில் மாரடைப்புக்கான அறிகுறிகள் பெரும்பாலும் லேசானதாகவும் தெளிவற்றதாகவும் இருக்கும்.  பல நேரங்களில் பெண்கள் இந்த அறிகுறிகளைப் பலவீனம், சோர்வு அல்லது வாயுப் பிரச்னைகள் என்று கருதி புறக்கணிக்கிறார்கள். முதலில் பெண்களுக்கு மாரடைப்பு ஏற்படுவதற்கான அறிகுறிகள் என்ன என்பதை பற்றி பார்க்கலாம்.

பெண்களுக்கு மாரடைப்பு ஏற்படுவதற்கான அறிகுறிகள்

• எந்த வேலையும் செய்யாமல் சோர்வு ஏற்படுவது பெண்களுக்கு மாரடைப்பு ஏற்படுவதற்கான மிகவும் பொதுவான அறிகுறியாகும். இந்த சோர்வு பல நாட்கள் அல்லது வாரங்கள் கூட நீடிக்கும். ஓய்வுக்குப் பிறகும் அது நீங்காது.
• பெரும்பாலும் பெண்கள் மேல் முதுகு, கழுத்து, தாடை அல்லது தோள்பட்டையில் வலி அல்லது அழுத்தத்தை உணரலாம். இந்த வலி படிப்படியாக அதிகரிக்கக்கூடும்.
• மாரடைப்பின் போது பல பெண்கள் வயிற்றில் வலி, எரிச்சல் அல்லது கனமான உணர்வை உணரலாம். இதை அவர்கள் பெரும்பாலும் அமிலத்தன்மை அல்லது வாயு பிரச்னை என்று நினைத்து புறக்கணிக்கிறார்கள். சரியான நேரத்தில் சிகிச்சை இல்லாததால் பிரச்னை தீவிரமாகிவிடும்.
• மாரடைப்பின் போது பல நேரங்களில், பெண்களுக்கு மூச்சுத் திணறல் அல்லது சுவாசிப்பதில் சிரமம் ஏற்படும். அதிக உடல் உழைப்பு இல்லாத போது சுவாசிப்பதில் சிரமம் ஏற்பட்டால் மருத்துவர்களை அணுக வேண்டும்.
• பெண்களுக்கு, திடீரென ஏற்படும் வாந்தி, தலைச்சுற்றல் போன்றவையும் மாரடைப்பின் அறிகுறிகளாக இருக்கலாம்.
• பெண்களுக்கு மாரடைப்பு ஏற்படுவதற்கு சில நாட்கள் அல்லது வாரங்களுக்கு முன்பு தூக்கமின்மை,  பதட்டம் போன்ற பிரச்னைகளும் இருக்கலாம்.

பெண்களில் அறிகுறிகள் ஏன் வேறுபடுகின்றன?

• பெண்களின் தமனிகள் அடைபடும் விதம், ஹார்மோன் மாற்றங்கள் மற்றும் உடல் அமைப்பு ஆகியவை வேறுபட்டவை.
• பெண்களுக்கு பெரும்பாலும் சிறிய தமனிகளில் அடைப்புகள் இருக்கும், இது கடுமையான மார்பு வலியை ஏற்படுத்தாது.
• மாதவிடாய் நின்ற பிறகு, பெண்களுக்கு மாரடைப்பு ஏற்படும் அபாயம் ஆண்களுக்கு சமமாகவோ அல்லது அதிகமாகவோ மாறுகிறது.
• உயர் இரத்த அழுத்தம், நீரிழிவு நோய், உடல் பருமன், மன அழுத்தம் மற்றும் வாழ்க்கை முறை தொடர்பான காரணிகள் பெண்களுக்கு மாரடைப்பு அபாயத்தை அதிகரிக்கின்றன.

பாதுகாத்துக்கொள்வது எப்படி?

• பெண்களில் அறிகுறிகள் லேசானதாகவும் தெளிவற்றதாகவும் இருக்கும், இதனால் பெரும்பாலும் சிகிச்சை தாமதமாகிறது.
• பெண்கள் தங்கள் உடல் சமிக்ஞைகளை ஒருபோதும் புறக்கணிக்கக்கூடாது.
• தேவைப்பட்டால், ஈ.சி.ஜி., இரத்த அழுத்தம், கொழுப்பு மற்றும் சர்க்கரை அளவைப் பரிசோதிக்கவும்.
• சீரான உணவை உண்ணுங்கள், தவறாமல் உடற்பயிற்சி செய்யுங்கள், மன அழுத்தத்தைக் குறைத்து புகைபிடிப்பதைத் தவிர்க்கவும்.
• உடலில் ஏதேனும் அசாதாரண அறிகுறிகள் தோன்றினால் மருத்துவரைத் தொடர்பு கொள்ளவும்.