முட்டை மஞ்சள் கரு இதயத்திற்கு ஆபத்தா? இதோ உண்மை!

நீண்ட காலமாகவே முட்டையின் வெள்ளைக்கரு புரதச் சத்துக்காகப் பாராட்டப்பட்டாலும், அதன் மஞ்சள் கருவில் கொலஸ்ட்ரால் அதிகம் இருப்பதாகக் கூறிப் பலர் அதைத் தவிர்க்கின்றனர். ஒரு பெரிய முட்டையின் மஞ்சள் கருவில் சுமார் 185 முதல் 200 மில்லிகிராம் வரை கொலஸ்ட்ரால் உள்ளது என்பது உண்மைதான். இருப்பினும், நாம் உணவின் மூலம் உட்கொள்ளும் கொலஸ்ட்ராலும், நமது ரத்தத்தில் உருவாகும் கொலஸ்ட்ராலும் வெவ்வேறானவை என்பதைப் புரிந்துகொள்வது அவசியமாகும். மனித உடல் தானாகவே கொலஸ்ட்ராலை உருவாக்கும் திறன் கொண்டது. எனவே, உணவில் உள்ள கொலஸ்ட்ரால் மட்டுமே ரத்தத்தில் கெட்ட கொழுப்பை (LDL) உயர்த்துகிறது என்று முழுமையாகச் சொல்லிவிட முடியாது.

ஆராய்ச்சிகள் சுட்டிக்காட்டும் முரண்பாடுகள்

முட்டையின் மஞ்சள் கரு குறித்து நடத்தப்பட்ட பல்வேறு சர்வதேச ஆய்வுகள் வெவ்வேறான முடிவுகளைக் காட்டுகின்றன. அமெரிக்காவில் நடத்தப்பட்ட ஒரு ஆய்வில், தினசரி 300 மில்லிகிராம் அளவுக்கு அதிகமாக உணவில் கொலஸ்ட்ரால் சேரும்போது இதய நோய் ஆபத்து 17 சதவீதம் வரை உயர வாய்ப்புள்ளதாகக் கூறப்பட்டது. ஆனால் அதேவேளையில், 50 நாடுகளைச் சேர்ந்த 1,77,000-க்கும் மேற்பட்ட மக்களிடம் நடத்தப்பட்ட மற்றொரு மிகப்பெரிய ஆய்வில், முட்டை சாப்பிடுவதற்கும் இதய நோய்களுக்கும் இடையே குறிப்பிடத்தக்க நேரடித் தொடர்பு ஏதும் இல்லை என்பது தெரியவந்துள்ளது. இதனால், மஞ்சள் கருவை முற்றிலும் தவிர்ப்பது மட்டுமே இதயப் பாதுகாப்பிற்கு ஒரே வழி அல்ல என்பது தெளிவாகிறது.

மஞ்சள் கருவில் மறைந்துள்ள ஊட்டச்சத்துக்கள்

மஞ்சள் கருவில் வெறும் கொலஸ்ட்ரால் மட்டுமே நிறைந்துள்ளது என்ற எண்ணம் முற்றிலும் தவறானது. அதில் உடலுக்கு மிகவும் அவசியமான கோலின் (Choline), வைட்டமின் B12, வைட்டமின் D மற்றும் கண்களின் ஆரோக்கியத்தைப் பாதுகாக்கும் லூடின் (Lutein), செக்ஸாந்தின் (Zeaxanthin) போன்ற முக்கியமான ஊட்டச்சத்துக்கள் நிறைந்துள்ளன. எனவே, மஞ்சள் கருவை அகற்றிவிட்டு வெள்ளைக்கருவை மட்டுமே சாப்பிடுவது அனைவருக்கும் உகந்த ஆரோக்கியமான தேர்வாக இருக்காது. நாம் முட்டையை எவ்வாறு சமைக்கிறோம் மற்றும் எந்த மாதிரியான உணவுமுறையைப் பின்பற்றுகிறோம் என்பதில்தான் அதன் ஆரோக்கிய நன்மைகள் அடங்கியுள்ளன.

Also Read: இனி மலச்சிக்கல் பயமே வேண்டாம்: குடலை சுறுசுறுப்பாக்கும் 10 சூப்பர் உணவுகள்!

யாருக்குக் கட்டுப்பாடு அவசியம்?

பொதுவாக எந்தவிதமான உடல்நலப் பிரச்சனைகளும் இல்லாத ஆரோக்கியமான மனிதர்கள், அளவோடு முழு முட்டையைத் தங்கள் அன்றாட உணவில் சேர்த்துக்கொள்வது பாதிப்பை ஏற்படுத்தாது. ஆனால், ஏற்கனவே ரத்தத்தில் கெட்ட கொழுப்பின் அளவு அதிகமாக உள்ளவர்கள், நீரிழிவு நோய், அல்லது இதய நோய் பாதிப்பு உள்ளவர்கள் மஞ்சள் கருவை உட்கொள்வதில் கூடுதல் கவனம் செலுத்த வேண்டும். இத்தகைய பாதிப்பு உள்ளவர்கள் தங்களுக்குப் பொருத்தமான உணவுமுறையைத் தீர்மானிக்க, மருத்துவ ஆலோசனையின் அடிப்படையில் முட்டையின் அளவை நிர்ணயித்துக் கொள்வதே மிகவும் பாதுகாப்பான வழிமுறையாகும்.