UPI : யுபிஐ-ல் வந்த அதிரடி மாற்றங்கள்.. இனி எல்லாம் மின்னல் வேகத்தில் நடக்கும்!

இந்தியாவில் பொதுமக்கள் மத்தியில் யுபிஐ (UPI – Unified Payment Interface) பயன்பாடு அதிகரித்துள்ள நிலையில், அதனை மேலும் பயனுள்ளதாக மாற்ற இந்திய தேசிய கொடுப்பனவு கழகம் (NPCI – National Payment Corporation of India) பல அதிரடி நடவடிக்கைகளை மேற்கொண்டு வருகிறது. பொதுமக்கள் விரைவாகவும், எளிதாகவும் பண பரிவர்த்தனைகளை மேற்கொள்ளும் வகையில் பல புதிய விதிகளையும், அம்சங்களையும் அறிமுகம் செய்து வருகிறது. அந்த வகையில், யுபிஐ-ல் தற்போது சில புதிய மாற்றங்களை மேற்கொள்ளப்பட்டுள்ளது.  இதன் மூலம் மிக விரைவாகவும், எளிதாகவும் யுபிஐ செயலிகளை பயன்படுத்தலாம்.

இந்தியாவில் கோடிக்கணக்கான மக்கள் பயன்படுத்தும் யுபிஐ

இந்தியா, டிஜிட்டல் இந்தியா என்ற இலக்கை நோக்கி பயணிப்பதற்கு சான்றாக இந்தியர்கள் யுபிஐ பண பரிவர்த்தனையை அதிகம் பயன்படுத்த ஆரம்பித்து விட்டனர். முன்பெல்லாம் யாருக்கேனும் பணம் அனுப்ப வேண்டும் என்றால் வங்கிகளுக்கு சென்று பல மணி நேரம் காத்திருந்து செய்து வந்த வேலைகளை எல்லாம் தற்போது யூபிஐ மூலம் மிக விரைவாக செய்து முடித்து விட முடியும். இதன் காரணமாக இந்தியாவில் பலரும் யுபிஐ-ஐ அதிகம் பயன்படுத்துகின்றனர். குறிப்பாக இந்தியாவின் கடைகோடி கிராமங்கள் முதல் பெரிய நகரங்கள் வரை என அனைத்து இடங்களிலும் இந்த யுபிஐ கட்டண முறை பயன்பாட்டில் உள்ளது. இவ்வாறு மிக முக்கிய அம்சமாக யுபிஐ உள்ள நிலையில், அதில் தற்போது சில முக்கிய மாற்றங்கள் மேற்கொள்ளப்பட்டுள்ளன.

பண பரிவர்த்தனை முதல் இருப்பு சோதனை வரை – நேரம் குறைப்பு

UPI gets faster from June 16, 2025!

NPCI has reduced the response time for banks & apps now most UPI transactions will be processed in just 10 seconds instead of 30 seconds. pic.twitter.com/XJocBNcgfC

— DealzTrendz (@dealztrendz) June 16, 2025

இந்திய தேசிய கொடுப்பனவு கழகம், யுபிஐ செயலிகளின் வேகத்தை அதிகரித்துள்ளது. யுபிஐ-ல் முன்னதாக பரிவர்த்தனை செய்வதற்கான நேரம் 30 விநாடிகளாக இருந்த நிலையில், அது தற்போது வெறும் 15 விநாடிகளாக குறைக்கப்பட்டுள்ளது. இதேபோல வங்கி இருப்பை செக் செய்வதற்கான நேரம் 30 விநாடிகளாக இருந்த நிலையில், அது வெறும் 10 விநாடிகளாக குறைக்கப்பட்டுள்ளது.

மேலும், டிரான்ஷாக்சன் ரிவர்சல் (Transaction Reversal) நேரமும் குறைக்கப்பட்டுள்ளது. முன்னதாக இதற்கு 30 விநாடிகள் எடுத்துக்கொள்ளப்பட்ட நிலையில், தற்போது அது வெறும் 10 விநாடிகளாக குறைக்கப்பட்டுள்ளது. யுபிஐ ஐடியை சரிப்பார்ப்பதற்கான நேரமும் 15 விநாடிகளில் இருந்து 10 விநாடிகளாக குறைக்கப்பட்டுள்ளது. இந்த புதிய மாற்றங்கள் இன்று (ஜூன் 16, 2025) முதல் அமலுக்கு வந்துள்ளது குறிப்பிடத்தக்கது.