முரண்பாட்டு மூட்டையாக விளங்கும் முதலமைச்சர் விஜய்.. தவெக அரசின் அராஜகம் – மு.க ஸ்டாலின் காட்டம்

அக்டோபர் 6, 2026: செவிலியர்கள் போராட்டத்தின்போது கைது செய்யப்பட்ட சம்பவம் தொடர்பாக தமிழ்நாடு முன்னாள் முதலமைச்சரும், திமுக தலைவருமான மு.க.ஸ்டாலின் தனது சமூக வலைதளப் பக்கத்தில் த.வெ.க. அரசை கடுமையாக விமர்சித்துள்ளார். பணி நிரந்தரம், பணிப் பாதுகாப்பு, சம வேலைக்குச் சம ஊதியம் உள்ளிட்ட கோரிக்கைகளை வலியுறுத்தி தமிழகம் முழுவதும் இருந்து ஆயிரக்கணக்கான இடைநிலை சுகாதாரப் பணியாளர்கள் போராட்டத்தில் ஈடுபட்டனர்.

போராட்டத்தில் ஈடுபட்ட செவிலியர்கள் கைது:

சென்னை எழும்பூர் ராஜரத்தினம் மைதானம் அருகே நடைபெற்ற உண்ணாவிரதப் போராட்டத்தின்போது, பேச்சுவார்த்தைக்குச் சென்ற பிரதிநிதிகள் கைது செய்யப்பட்டதாக தகவல் பரவியதைத் தொடர்ந்து பரபரப்பு ஏற்பட்டது. பின்னர் போராட்டம் தீவிரமடைந்த நிலையில், காவல்துறையினர் செவிலியர்களை கைது செய்து வாகனங்களில் அழைத்துச் சென்றனர்.

அதிகாரிகளுடன் நடைபெற்ற பேச்சுவார்த்தையைத் தொடர்ந்து போராட்டம் தற்காலிகமாக வாபஸ் பெறப்பட்டது.

தவெக அரசின் அராஜக நடவடிக்கை – ஸ்டாலின் விமர்சனம்:

கண்துடைப்புக்கு வழங்கிய வாக்குறுதிகளைக் காற்றில் பறக்கவிட்டு, முதுகில் குத்தும் த.வெ.க. அரசின் துரோகத்திற்குச் செவிலியர்கள்தான் தற்போதைய இரையா?

பணி நிரந்தரம், பணிப் பாதுகாப்பு, சம வேலைக்குச் சம ஊதியம் உள்ளிட்ட தங்களது வாழ்வாதார உரிமைகளுக்காக அறவழியில் போராடிய செவிலியர்களைக் காவல்துறையைக் கொண்டு கைது செய்த த.வெ.க. அரசின் அராஜக நடவடிக்கைக்குக் கடும் கண்டனத்தைத் தெரிவித்துக் கொள்கிறேன்.

போராடும் செவிலியர்களுடன் அமர்ந்து பேச்சுவார்த்தை நடத்திட மனம் வராத துரோக த.வெ.க. அரசுக்கு, ஈவு இரக்கமின்றி அவர்களைக் கைது செய்ய மட்டும் எப்படி மனம் வந்ததோ?

போராடிய செவிலியர்களின் பிரதிநிதிகளைப் பேச்சுவார்த்தைக்கு அழைத்துச் செல்வதாகக் கூறி கைது செய்ததாக அவர்களது சட்ட ஆலோசகரே குற்றம்சாட்டியிருக்கிறார். தொடர்ந்து, போராட்டக் களத்திலிருந்த செவிலியர்களும் காவல்துறையால் கைது செய்யப்பட்டுள்ளனர்.

எதிர்க்கட்சியாக இருக்கும்போது போராட்டக் களத்திற்குச் சென்று ஆதரவு;
தேர்தல் வந்தபோது பணி நிரந்தரம் செய்வோம் என்று வாக்குறுதி;
ஆட்சிக்கு வந்ததும் அதே கோரிக்கையை முன்வைத்தால் காவல்துறை நடவடிக்கை!

முரண்பாட்டு மூட்டையாக விளங்கும் முதலமைச்சர் விஜயும், அவரது நிர்வாகத் திறனற்ற துக்ளக் நடவடிக்கைகளுக்கு முட்டுக் கொடுக்கும் அதிமேதாவி அமைச்சர்களும் இப்போது என்ன சொல்லப் போகிறார்கள்?

போராட்டக் களத்தில் மின்சாரம் துண்டிக்கப்பட்ட நிலையிலும், செல்போன் டார்ச் வெளிச்சத்தில் தங்களது போராட்டத்தைத் தொடர்ந்த செவிலியர்களை இரவோடு இரவாக வலுக்கட்டாயமாகக் கைது செய்ததுதான் த.வெ.க. கூறும் ‘மாற்றமா’? இதுதான் அவர்கள் போற்றும் ஜனநாயகமா?

போராடிய செவிலியர்களை நோக்கி பெண் காவல் அதிகாரி ஒருவரே விரலை உயர்த்தி “வேண்டாம் உங்க உயிர் முக்கியம்” என மிரட்டியதுதான் ஜனநாயக வில்லனின் குரலா என்பதைக் காவல்துறைக்குப் பொறுப்பு வகிக்கும் முதலமைச்சர் விளக்குவாரா? அல்லது, செவிலியர்களை மிரட்டி குண்டுகட்டாகக் கைது செய்த பெண் காவலர்களின் செயலை “சிங்கப்பெண் in action” என Reels செய்து தனது virtual abuser-கள் மூலம் trend செய்து விளம்பரம் தேடுவாரா?

#NursesProtest #MedicalWorkersProtest

— M.K.Stalin (@mkstalin) October 6, 2026

இந்நிலையில், செவிலியர்கள் கைது செய்யப்பட்டதைக் கண்டித்துள்ள மு.க.ஸ்டாலின், அறவழியில் போராடிய செவிலியர்களை காவல்துறையைக் கொண்டு கைது செய்தது த.வெ.க. அரசின் அராஜக நடவடிக்கை என விமர்சித்துள்ளார். எதிர்க்கட்சியாக இருந்தபோது போராட்டக் களத்திற்குச் சென்று ஆதரவு தெரிவித்துவிட்டு, தேர்தலின்போது பணி நிரந்தரம் செய்வதாக வாக்குறுதி அளித்து, ஆட்சிக்கு வந்த பின்னர் அதே கோரிக்கையை முன்வைத்து போராடியவர்களைக் கைது செய்வது முரண்பாடாக இருப்பதாகவும் அவர் தெரிவித்துள்ளார்.

வலுக்கட்டாயமாக கைது செய்ததுதான் த.வெ.க. கூறும் ‘மாற்றமா?

மேலும், போராட்டக் களத்தில் மின்சாரம் துண்டிக்கப்பட்ட நிலையிலும் செல்போன் டார்ச் வெளிச்சத்தில் செவிலியர்கள் போராட்டத்தைத் தொடர்ந்ததாகக் குறிப்பிட்ட அவர், இரவோடு இரவாக அவர்களை வலுக்கட்டாயமாக கைது செய்ததுதான் த.வெ.க. கூறும் ‘மாற்றமா’, இதுதான் அவர்கள் போற்றும் ஜனநாயகமா என கேள்வி எழுப்பியுள்ளார்.

மேலும் படிக்க: பட்டினப்பாக்கத்தில் புதிய தலைமைச் செயலகம்.. முதற்கட்டப் பணிகளுக்கு CMDA பச்சைக்கொடி!

போராடிய செவிலியர்களை நோக்கி பெண் காவல் அதிகாரி ஒருவர், “வேண்டாம், உங்க உயிர் முக்கியம்” என மிரட்டியதாகக் கூறப்படும் சம்பவத்தையும் சுட்டிக்காட்டிய மு.க.ஸ்டாலின், இதுதான் ஜனநாயக வில்லனின் குரலா என்பதை காவல்துறைக்குப் பொறுப்பு வகிக்கும் முதலமைச்சர் விஜய் விளக்குவாரா என்றும் கேள்வி எழுப்பியுள்ளார்.