மேற்கு தொடர்ச்சி மற்றும் தென் மாவட்டங்களில் தொடரும் கனமழை.. சென்னைக்கு மழை இருக்குமா?

ஜூன் 29, 2026: தமிழகத்தில் கடந்த சில நாட்களாக தொடர்ந்து பல்வேறு பகுதிகளில் மழை பதிவாகி வரும் நிலையில், ஜூன் 29-ஆம் தேதியான இன்று டெல்டா மாவட்டங்கள் மற்றும் வட தமிழகத்தின் ஒரு சில இடங்களில் இடி, மின்னல் மற்றும் பலத்த காற்றுடன் கூடிய மிதமான மழை பெய்ய வாய்ப்புள்ளதாக தெரிவிக்கப்பட்டுள்ளது. ஏனைய பகுதிகளில் லேசான முதல் மிதமான மழை மட்டுமே இருக்கும் எனவும் தெரிவிக்கப்பட்டுள்ளது.

பல்வேறு மாவட்டங்களுக்கு மஞ்சள் அலர்ட்:

ஜூன் 30-ஆம் தேதியைப் பொருத்தவரையில், வட தமிழகத்தின் ஒரு சில இடங்களில் லேசான முதல் மிதமான மழைக்கு வாய்ப்பு இருப்பதாகவும், தென் தமிழகத்திலும் ஓரிரு இடங்களில் மழை பெய்யக்கூடும் எனவும் தெரிவிக்கப்பட்டுள்ளது. அதேசமயம், கோவை மற்றும் நீலகிரி மாவட்டங்களில் கனமழைக்கான வாய்ப்புகள் அதிகமாக இருப்பதாகவும் தெரிவிக்கப்பட்டுள்ளது.

ஜூலை 1 மற்றும் 2 ஆகிய தேதிகளில், கோவை, திருப்பூர், நீலகிரி, திண்டுக்கல், தேனி, ஈரோடு, சேலம் ஆகிய மாவட்டங்களில் இடி, மின்னல் மற்றும் பலத்த காற்றுடன் கூடிய மிதமான மழை பெய்ய வாய்ப்புள்ளதாகவும், ஏனைய தமிழகத்தின் ஒரு சில இடங்களில் லேசான முதல் மிதமான மழை பெய்யக்கூடும் எனவும் தெரிவிக்கப்பட்டுள்ளது.

மேலும் படிக்க: அரசியல் தலையீடு இன்றி காவல்துறை செயல்படலாம்.. முதல்வர் ஜோசப் விஜய்!

ஜூலை 3-ஆம் தேதியைப் பொருத்தவரையில், கோவை, நீலகிரி, தேனி ஆகிய மூன்று மாவட்டங்களில் இடி, மின்னல் மற்றும் பலத்த காற்றுடன் கூடிய கனமழை பெய்யக்கூடும் என்றும், மதுரை, திண்டுக்கல் மற்றும் வட தமிழகத்தின் ஓரிரு இடங்களில் பலத்த காற்றுடன் கூடிய மிதமான மழை பெய்யக்கூடும் எனவும் தெரிவிக்கப்பட்டுள்ளது. அதேசமயம், தென் தமிழகத்தின் ஓரிரு இடங்களில் லேசான மழைக்கு வாய்ப்பு இருப்பதாகவும் தெரிவிக்கப்பட்டுள்ளது.

ஜூலை 4 மற்றும் 5-ஆம் தேதிகளைப் பொருத்தவரையில், கோவை, நீலகிரி மற்றும் கன்னியாகுமரி மாவட்டங்களில் கனமழைக்கு வாய்ப்பு இருப்பதாக தெரிவிக்கப்பட்டுள்ளது.

வெப்பநிலை எப்படி இருக்கும்?

அதிகபட்ச வெப்பநிலையைப் பொருத்தவரையில், ஒரு சில மாவட்டங்களில் 100 டிகிரி ஃபாரன்ஹீட்டை கடந்த வெப்பநிலை பதிவாகி வருகிறது. வரக்கூடிய நாட்களிலும் பெரிய அளவில் மாற்றம் இருக்காது; இயல்பை ஒட்டியே வெப்பநிலை நீடிக்கக்கூடும் என தெரிவிக்கப்பட்டுள்ளது.

சென்னையில் மழை தொடரும்:

சென்னை மற்றும் புறநகர் பகுதிகளைப் பொருத்தவரையில், பகல் நேரங்களில் வானம் ஓரளவு மேகமூட்டத்துடன் காணப்படலாம் என தெரிவிக்கப்பட்டுள்ளது. அதேசமயம், மாலை அல்லது இரவு நேரங்களில் நகரின் ஒரு சில பகுதிகளில் இடி, மின்னலுடன் கூடிய லேசான மழை பெய்ய வாய்ப்பு இருப்பதாகவும் தெரிவிக்கப்பட்டுள்ளது. அதிகபட்ச வெப்பநிலை 40 டிகிரி செல்சியஸாகவும், குறைந்தபட்ச வெப்பநிலை 28 டிகிரி செல்சியஸை ஒட்டியும் இருக்கக்கூடும் என தெரிவிக்கப்பட்டுள்ளது.

சென்னை மற்றும் புறநகர் பகுதிகளில் கடந்த இரண்டு நாட்களாக மாலை மற்றும் இரவு நேரங்களில் ஆங்காங்கே மிதமானது முதல் கனமழை வரை பதிவாகி வருவது குறிப்பிடத்தக்கது.