பக்தர்களே ரெடியா? ஒரே நாளில் 14 திவ்ய தேசங்களை தரிசிக்கலாம்!

கும்பகோணம் அரசுப் போக்குவரத்துக் கழகம் சார்பில் ஒரே நாளில் 14 ஸ்ரீவைஷ்ணவ திவ்ய தேச கோயில்களை தரிசிக்கும் வகையில் சிறப்பு ஆன்மிக சுற்றுலா பேருந்து சேவை தொடங்கப்பட்டுள்ளது. இந்த சிறப்பு பேருந்து சனி மற்றும் ஞாயிற்றுக்கிழமைகளில் கும்பகோணத்தில் இருந்து இயக்கப்படுகிறது. அதிகாலை 5 மணிக்கு புறப்படும் பேருந்து இரவு 8 மணியளவில் கும்பகோணத்திற்கு திரும்பும் வகையில் பயணத் திட்டம் அமைக்கப்பட்டுள்ளது. 53 இருக்கைகள் கொண்ட குளிர்சாதன வசதி கொண்ட பேருந்தில் பக்தர்கள் ஒரே நாளில் பல முக்கிய வைணவத் திருத்தலங்களைச் சுற்றிப் பார்க்கலாம். இந்த ஆன்மிகச் சுற்றுலாவுக்கு ஒரு நபருக்கு ரூ.1,350 கட்டணம் நிர்ணயிக்கப்பட்டுள்ளது. சீர்காழி, திருநாங்கூர், திருஇந்தளூர், சேங்கனூர், நாச்சியார்கோவில் உள்ளிட்ட பகுதிகளில் அமைந்துள்ள பல்வேறு பெருமாள் கோயில்கள் இந்தப் பயணத்தில் இடம்பெறுகின்றன. ஒரே நாளில் 14 திவ்ய தேசங்களை தரிசிக்க விரும்பும் பக்தர்களுக்கு இந்தப் புதிய பேருந்து சேவை வசதியான வாய்ப்பாக அமைந்துள்ளது.

14 திவ்ய தேசங்களுக்கு ஒரே நாள் பயணம்

வைணவ பக்தர்கள் ஒரே நாளில் 14 திவ்ய தேச கோயில்களை தரிசிக்கும் வகையில் கும்பகோணம் அரசுப் போக்குவரத்துக் கழகம் சார்பில் புதிய ஆன்மிக சுற்றுலா பேருந்து சேவை தொடங்கப்பட்டுள்ளது. டெல்டா மாவட்டங்களில் உள்ள முக்கிய வைணவத் திருத்தலங்களை ஒருங்கிணைத்து இந்த சிறப்புப் பயணம் ஏற்பாடு செய்யப்பட்டுள்ளது.

வார இறுதிகளில் சிறப்பு சேவை

இந்த ஆன்மிக சுற்றுலா பேருந்து சேவை ஒவ்வொரு சனி மற்றும் ஞாயிற்றுக்கிழமைகளில் இயக்கப்படும் என தெரிவிக்கப்பட்டுள்ளது. கும்பகோணம் பேருந்து நிலையத்திலிருந்து அதிகாலை 5 மணிக்கு புறப்படும் பேருந்து, சுமார் 15 மணி நேர பயணத்துக்குப் பிறகு இரவு 8 மணியளவில் மீண்டும் கும்பகோணத்தை வந்தடையும் வகையில் திட்டமிடப்பட்டுள்ளது.

ஏசி பேருந்தில் ஆன்மிகப் பயணம்

53 இருக்கைகள் கொண்ட குளிர்சாதன வசதியுள்ள பேருந்து இந்தப் பயணத்திற்காக பயன்படுத்தப்படுகிறது. இதனால் ஒரே நாளில் பல்வேறு திவ்ய தேச கோயில்களுக்கு செல்ல விரும்பும் பக்தர்கள் தனித்தனியாக போக்குவரத்து ஏற்பாடு செய்ய வேண்டிய சிரமம் குறையும் என எதிர்பார்க்கப்படுகிறது.

நபருக்கு ரூ.1,350 கட்டணம்

இந்த ஒரு நாள் ஆன்மிகச் சுற்றுலாவுக்கு நபர் ஒருவருக்கு ரூ.1,350 கட்டணம் நிர்ணயிக்கப்பட்டுள்ளது. பயணிகள் TNSTC-யின் அதிகாரப்பூர்வ இணையதளம் அல்லது மொபைல் செயலி மூலம் முன்பதிவு செய்து கொள்ளலாம் என போக்குவரத்துக் கழகம் தெரிவித்துள்ளது.

Also Read: மகாளய அமாவாசை அன்று இந்தப் பொருளை வீட்டிற்குக் கொண்டு வராதீங்க

தரிசிக்கப்படும் முக்கிய தலங்கள்

இந்தப் பயணத்தில் சீர்காழி தாடாளன் பெருமாள் கோயில், அண்ணன்கோவில் அண்ணன் பெருமாள் கோயில், திருநகரி கல்யாண ரங்கநாத பெருமாள் கோயில், திருமணிக்கூடம் வரதராஜ பெருமாள் கோயில், திருநாங்கூர் வைகுந்தநாதர், வண்புருஷோத்தமர், செம்பொன்செய் பெருமாள் மற்றும் பள்ளிகொண்ட பெருமாள் கோயில்கள் உள்ளிட்ட முக்கிய தலங்கள் இடம்பெற்றுள்ளன.

பக்தர்களுக்கு பயனுள்ள திட்டம்

இதனுடன் அரியமேய விண்ணகரம் குடமாடு கூத்தர் கோயில், மணிமாடக்கோவில் நாராயண பெருமாள் கோயில், திருஇந்தளூர் பரிமள ரங்கநாதர் கோயில், சேங்கனூர் சீனிவாசப் பெருமாள் கோயில், நாச்சியார்கோவில் சீனிவாசப் பெருமாள் கோயில் மற்றும் கும்பகோணம் சாரங்கபாணி கோயிலும் பயணத்திட்டத்தில் இடம்பெற்றுள்ளன. ஒரே நாளில் 14 திவ்ய தேசங்களை தரிசிக்கும் வசதி கிடைத்துள்ளதால் வைணவ பக்தர்கள் மத்தியில் இந்த புதிய பேருந்து சேவைக்கு வரவேற்பு கிடைத்துள்ளது.