கல்யாண வரன் தேடும் சிங்கப்பூர் அரசு: இளசுகளுக்காக களமிறக்கப்பட்ட புதிய டேட்டிங் செயலி

சிங்கப்பூரில் வரலாற்றுச் சாதனையாகப் பிறப்பு விகிதம் குறைந்ததைத் தொடர்ந்து, இளம் அரசு ஊழியர்களுக்குப் பொருத்தமான வாழ்க்கைத்துணையைக் கண்டறிய ‘ஃபர்ஸ்ட் டேட்’ என்ற சிறப்புச் செயலியை அரசு சோதனையோட்டமாக அறிமுகப்படுத்தியுள்ளது. பயனர்களின் விருப்பங்கள் மற்றும் வாழ்க்கை முறையை ஆய்வு செய்து மாதத்திற்கு ஒரு வரனை மட்டுமே பரிந்துரைக்கும் இந்தச் செயலி, இருவரின் ஒப்புதலுக்குப் பிறகே தொடர்பு விவரங்களைப் பகிர்ந்து கொள்கிறது. 1984-ஆம் ஆண்டிலிருந்தே திருமண வழிகாட்டுதல்களை வழங்கி வரும் சிங்கப்பூர், தற்போது தொழில்நுட்பத்தைப் பயன்படுத்தி இளம் தலைமுறையினரை இணைக்கும் புதிய முயற்சியை மேற்கொண்டுள்ளது.

சிங்கப்பூர் அரசு உருவாக்கிய புதிய செயலி

சிங்கப்பூரில் பிறப்பு விகிதம் முன்னெப்போதும் இல்லாத அளவுக்குக் கடுமையாகக் சரிந்து வருகிறது. இந்தச் சவாலான நிலையை எதிர்கொள்ளும் முயற்சியாக, நாட்டின் இளம் அரசு ஊழியர்களுக்குப் பொருத்தமான வாழ்க்கைத்துணையைத் தேடிக் கொடுப்பதற்காக ‘ஃபர்ஸ்ட் டேட்’ (FirstDate) என்ற புதிய செயலியை அந்நாட்டு அரசு சோதனையோட்டமாக அறிமுகப்படுத்தியுள்ளது.

சரிவடையும் மக்கள்தொகையும் திருமண வயதும்

கடந்த 2025-ஆம் ஆண்டின் கணக்கெடுப்பின்படி, சிங்கப்பூரில் ஒரு பெண்ணிற்கான சராசரி பிறப்பு விகிதம் 0.87 ஆகக் குறைந்துள்ளது. அதேவேளையில், இளைஞர்கள் திருமணம் செய்துகொள்ளும் சராசரி வயதும் கணிசமாக அதிகரித்துள்ளது. இந்த மக்கள் தொகையியல் மாற்றத்தைக் கருத்தில் கொண்டு, இளைஞர்கள் தங்களுக்கு ஏற்ற துணையைத் தேர்ந்தெடுப்பதற்குத் தொழில்நுட்ப வழியில் அரசாங்கமே முன்னின்று உதவி செய்ய முடிவு செய்துள்ளது.

Also Read: டெங்கு கொசுக்கள் வீடுகளில் முட்டையிடுவதை தடுப்பது எப்படி?

தனித்துவமான அம்சம்

சாதாரண டேட்டிங் செயலிகள் போல முடிவில்லாமல் சுயவிவரங்களைச் (Profiles) சுழற்றிக் கொண்டே இருக்கும் முறை இதில் இல்லை. பயனர்கள் தங்களின் விருப்பங்கள், வாழ்க்கை முறை மற்றும் தார்மீக மதிப்புகள் பற்றிய கேள்விகளுக்குப் பதிலளிக்க வேண்டும். அதன் அடிப்படையில், மாதத்திற்கு ஒருமுறை மட்டுமே பொருத்தமான ஒருவரின் சுயவிவரம் பரிந்துரைக்கப்படும். மேலும், கணிதக் கோட்பாடுகளின் அடிப்படையிலான அல்காரிதம் (Algorithm) மூலம் இருவருக்கு இடையிலான பொருத்தத்தின் அளவு கணக்கிட்டுக் காட்டப்படுகிறது.

பாதுகாப்பும் எதிர்காலத் திட்டமும்

இரண்டு நபர்களுக்குப் பொருத்தம் உறுதியானதும், இருவரின் ஒப்புதலுக்குப் பிறகே தொடர்புகொள்ளும் விவரங்கள் பகிரப்படும். இதில் பயனர்களின் விவரங்கள் மிகவும் பாதுகாப்பாகப் பராமரிக்கப்படுவதோடு, ஒரே அலுவலகப் பிரிவில் பணிபுரிபவர்கள் இணைக்கப்பட மாட்டார்கள். 1984-ஆம் ஆண்டிலேயே அரசாங்க அமைப்புகள் மூலம் திருமண வழிகாட்டுதல்களை வழங்கிய பாரம்பரியம் கொண்ட சிங்கப்பூர், தற்போது நவீனத் தொழில்நுட்பத்தின் மூலம் இந்த முயற்சியைக் கையில் எடுத்துள்ளது.

பொறுப்புத் துறப்பு: இத்தளத்தில் உள்ள லைப்ஸ்டைல், ஆரோக்கியம் மற்றும் உணவு சார்ந்த தகவல்கள் பொதுவான விழிப்புணர்விற்காக மட்டுமே; இவை மருத்துவ ஆலோசனையல்ல. இதில் உள்ள குறிப்புகளைப் பின்பற்றும் முன் தகுந்த நிபுணர் அல்லது மருத்துவரின் ஆலோசனையைப் பெறுவது அவசியமாகும்.