புதுத் துணியை அப்படியே உடுத்தினா ‘தோல் நோய்’ வருமா? அதிர்ச்சித் தகவல்கள்!

புது ஆடைகளைத் துவைக்காமல் அணிவதால் ஏற்படும் ஆபத்துகள்: மருத்துவ நிபுணர்களின் எச்சரிக்கை
கடைகளில் வாங்கும் புதிய ஆடைகளையோ அல்லது இணையவழியில் ஆர்டர் செய்து பெறப்படும் உடைகளையோ, வாங்கிய உடனே அப்படியே அணிவது பெரும்பாலானோரின் வழக்கமாக உள்ளது. இருப்பினும், இத்தகைய பழக்கம் கடுமையான தோல் அலர்ஜி மற்றும் நோய்த்தொற்றுகளுக்கு வழிவகுக்கும் என்று மருத்துவ வல்லுநர்கள் எச்சரிக்கின்றனர். புது உடைகளைத் துவைக்காமல் அணிவதால் ஏற்படும் சுகாதாரச் சிக்கல்கள் குறித்து விரிவாகக் காண்போம்.

இரசாயனங்களால் ஏற்படும் பாதிப்புகள்

துணிகள் சுருங்காமல் இருக்கவும், அவற்றின் நிறம் மங்காமல் பளபளப்பாகக் காட்சியளிக்கவும் உற்பத்தி நிறுவனங்கள் ஃபார்மால்டிஹைடு (Formaldehyde) மற்றும் அசோ டை (Azo Dyes) போன்ற சக்திவாய்ந்த இரசாயனங்களைப் பயன்படுத்துகின்றன. இத்தகைய இரசாயனங்கள் அடங்கிய உடைகளைத் துவைக்காமல் நேரடியாக அணியும்போது, அவை சருமத்தில் பட்டு சிவத்தல், அரிப்பு, கண் எரிச்சல் மற்றும் சிலருக்கு மூச்சுத்திணறல் போன்ற பிரச்சினைகளை ஏற்படுத்தக்கூடும்.

சாயக் கழிவுகளால் உண்டாகும் தோல் அலர்ஜி

கருப்பு, அடர் சிவப்பு மற்றும் ஜீன்ஸ் போன்ற அடர் நிற உடைகளில் அதிகளவிலான இரசாயனச் சாயங்கள் சேர்க்கப்படுகின்றன. இந்த உடைகளை அணியும்போது உடலிலிருந்து வெளிப்படும் வியர்வையுடன் இச்சாயங்கள் கலந்து சருமத்திற்குள் ஊடுருவுகின்றன. இதன் காரணமாக ‘காண்டாக்ட் டெர்மடிடிஸ்’ (Contact Dermatitis) எனப்படும் கடுமையான தோல் அலர்ஜி நோய் ஏற்பட அதிக வாய்ப்புள்ளது.

கிருமிகள் மற்றும் பூஞ்சை தொற்று

கடைகளில் காட்சிக்கு வைக்கப்படும் உடைகளை வாங்குவதற்கு முன் பலர் ‘ட்ரையல்’ (Trial) செய்து பார்ப்பது வழக்கம். இதனால் மற்றவர்களின் வியர்வை, தூசு மற்றும் பாக்டீரியாக்கள் அந்த உடைகளில் படிந்திருக்கக் கூடும். மேலும், ஆடைகள் சேமித்து வைக்கப்படும் கிடங்குகளில் (Godowns) பூச்சிகள் மற்றும் எலிகளின் நடமாட்டத்தால் பரவும் கிருமிகள், துவைக்கப்படாத புது ஆடைகள் மூலம் நேரடியாக நமக்குத் தொற்றக்கூடும்.

பேன் மற்றும் தோல் வியாதிகள் பரவும் அபாயம்

குறிப்பாக உள்ளாடைகள், தொப்பிகள் மற்றும் குளிர்கால உடைகளை மற்றவர்கள் அணிந்து பார்த்திருந்தால், அவற்றின் வழியாகச் சிரங்கு (Scabies), பூஞ்சை காளான் தொற்றுகள் (Fungal Infection) மற்றும் பேன் தொல்லைகள் எளிதாகப் பரவக்கூடும். எனவே, சுகாதாரமற்ற முறையில் ஆடைகளைப் பயன்படுத்துவது பெரும் பாதிப்பை ஏற்படுத்தும்.

வியர்வை துர்நாற்றம் மற்றும் சரும உபாதைகள்

புது உடைகளில் பயன்படுத்தப்படும் கஞ்சி மற்றும் கெமிக்கல் பூச்சுகள் காரணமாக, உடைகளின் சுவாசிக்கும் தன்மை (Breathability) குறைகிறது. இதனால் ஆடை வியர்வையைச் சரியாக உறிஞ்சாமல், உடலில் அதிகளவில் வியர்வை தேங்கித் துர்நாற்றத்தை உருவாக்குகிறது.

பாதுகாப்பாகப் பயன்படுத்தும் வழிமுறைகள்

புதிய ஆடைகளை வாங்கியவுடன் மிதமான சோப்புத் தூள் அல்லது உப்பு நீரில் சுமார் 15 முதல் 20 நிமிடங்கள் ஊறவைத்துத் துவைத்த பிறகே அணிய வேண்டும். குறிப்பாகக் குழந்தைகளின் உடைகள் மற்றும் உள்ளாடைகளில் இப் பழக்கத்தைக் கண்டிப்பாகப் பின்பற்ற வேண்டும். துவைத்த உடநலப் பாதுகாப்பு முறைகள், சரும நோய்களிலிருந்து நம்மை முழுமையாகப் பாதுகாக்கும்.