இலை உதிரும் காலத்தில் இதயம் கவரும் இந்தியாவின் 10 சொர்க்கப் பூமிகள்
Autumn Travel: மழைக்காலத்திற்குப் பிந்தைய சரத் காலத்தில் இந்தியாவின் மலைப்பிரதேசங்கள், கடற்கரைகள் மற்றும் கலாச்சார நகரங்கள் மிக எழிலாக மாறுகின்றன. ஸ்ரீநகர், கூர்க், வயநாடு மற்றும் கட்ச் போன்ற பகுதிகள் இதமான வானிலையுடனும் இயற்கையின் வண்ணமயமான மாற்றங்களுடனும் சுற்றுலாப் பயணிகளைக் கவர்கின்றன.
இந்தியாவில் மழைக்காலம் முடிந்த பிறகு தொடங்கும் சரத் காலம், இயற்கை எழில் கொஞ்சும் இடங்களைச் சுற்றிப் பார்ப்பதற்கு மிகவும் ஏற்ற பருவமாகும். காஷ்மீரின் ஸ்ரீநகரில் இலைகள் தங்கம் மற்றும் சிவப்பு நிறத்தில் மாறி ஒரு அழகிய சொர்க்கபுரியாகக் காட்சியளிக்கிறது. ஷில்லாங், ரிஷிகேஷ் மற்றும் கின்னௌர் பள்ளத்தாக்கு ஆகியவை தெளிவான வானத்துடனும் இதமான குளிர்ந்த காற்றுடனும் சுற்றுலாப் பயணிகளை வரவேற்கின்றன. தென்னிந்தியாவில் வயநாடு காபித் தோட்ட நறுமணத்தாலும், கூர்க் ஆர்ப்பரிக்கும் அருவிகளாலும் பயணிகளின் மனதைக் கவர்கின்றன. குஜராத்தின் கட்ச் பகுதி உப்புப் பாலைவனப் பொலிவையும், அருணாச்சலப் பிரதேசத்தின் ஜிரோ பள்ளத்தாக்கு அமைதியான இயற்கைச் சூழலையும் வழங்குகின்றன.
ஸ்ரீநகர், ஜம்மு-காஷ்மீர்
சரத் காலத்தில் ஸ்ரீநகர் பகுதி தங்கம் மற்றும் சிவப்பு நிறத்தில் மின்னும் ஒரு சொர்க்கபுரியாக மாறுகிறது. செப்டம்பர் இறுதி முதல் நவம்பர் வரை இங்குள்ள மரங்களின் இலைகள் மஞ்சள், ஆரஞ்சு மற்றும் சிவப்பு நிறங்களுக்கு மாறி காண்போரைக் கவரக்கூடிய வகையில் மிக அழகாகக் காட்சியளிக்கின்றன.
ஷில்லாங், மேகாலயா
மழைக்காலத்திற்குப் பிந்தைய பசுமையோடு, மேகாலயாவின் ஷில்லாங் நகரம் இந்த பருவத்தில் பளிச்சிடுகிறது. தெளிவான நீல நிற வானமும், 12 டிகிரி முதல் 22 டிகிரி வரையிலான இதமான வெப்பநிலையும் இங்கு செல்பவர்களுக்கு ஒரு சிறந்த சுற்றுலா அனுபவத்தை வழங்குகின்றன.
ரிஷிகேஷ், உத்தரகாண்ட்
மழைக்காலம் முடிந்தவுடன் ரிஷிகேஷின் அழகே தனித்துவமாக மாறுகிறது. மலைகளில் வீசும் குளிர்ந்த காற்றும், அடர்ந்த பசுமையும் இங்குள்ள சூழலை மேலும் அழகாக்குகின்றன. பகலில் இததமான வெயிலும், மாலையில் குளிரான வானிலையும் சுற்றுலாப் பயணிகளை வெகுவாகக் கவர்கிறது.
கின்னௌர் பள்ளத்தாக்கு, இமாச்சலப் பிரதேசம்
இமாச்சலப் பிரதேசத்தில் உள்ள கின்னௌர் பள்ளத்தாக்கு இந்த காலத்தில் பல வண்ணங்கள் நிறைந்த இயற்கை ஓவியமாக மாறுகிறது. மழை மேகங்கள் விலகி, கின்னெர் கைலாச மலைச் சிகரங்கள் தெளிவான நீல வானத்தின் பின்னணியில் மிக பிரம்மாண்டமாகத் தெரிகின்றன.
Also Read: விவாகரத்துக்குப் பிறகும் இதை மட்டும் தொடரும் துணைகள்… என்ன அது?
வயநாடு, கேரளா
கேரளாவின் வயநாடு பகுதியில் மழை ஓய்ந்து, பள்ளத்தாக்குகளை பனிமூட்டம் சூழத் தொடங்குகிறது. இந்த காலத்தில் அங்குள்ள காபி தோட்டங்களில் காபி கொட்டைகள் முதிர்வடைவதும், ஏலக்காய் மற்றும் மிளகு போன்ற நறுமணப் பொருட்களின் வாசனை காற்றில் கலந்து வீசுவதும் தனித்துவமான உணர்வைத் தருகிறது.
கூர்க், கர்நாடகா
‘இந்தியாவின் ஸ்காட்லாந்து’ என்று அழைக்கப்படும் கூர்க் பகுதிக்கு இந்த பருவம் மிகவும் ஏற்றது. மழைக்காலம் தந்த நீர்வரத்தால் இங்குள்ள அபே அருவி மற்றும் இருப்பு அருவி போன்ற நீர்வீழ்ச்சிகள் இந்த காலத்தில் ஆர்ப்பரித்து கொட்டுவது கண்கொள்ளாக் காட்சியாகும்.
கட்ச் ரான் பகுதி, குஜராத்
மழைக்காலத்திற்குப் பிறகு இங்குள்ள வெள்ள நீர் வற்றத் தொடங்கி, உலகின் மிகப்பெரிய வெள்ளை உப்புப் பாலைவனம் மெல்ல வெளிப்படத் தொடங்குகிறது. இந்த ஆரம்ப காலத்தில் உப்பின் மேல் தேங்கியிருக்கும் குறைந்த அளவு நீரில் வானம் பிரதிபலிப்பது ஒரு விசித்திரமான அழகைத் தருகிறது.
வாரணாசி, உத்தரபிரதேசம்
வாரணாசியின் கலாச்சார நிகழ்வுகளுக்கு இந்த பருவமே மிக முக்கியமானது. நவராத்திரி மற்றும் தசரா பண்டிகைகளுடன் தொடங்கும் இந்த சீசன், நவம்பரில் நடைபெறும் ‘தேவ் தீபாவளி’ விழாவோடு உச்சத்தை எட்டுகிறது. அப்போது இங்குள்ள 84 படிகட்டுகளிலும் (காட்களில்) லட்சக்கணக்கான அகல் விளக்குகள் ஏற்றப்பட்டு நகரம் ஒளிர்கிறது.
ஜிரோ பள்ளத்தாக்கு, அருணாச்சலப் பிரதேசம்
அருணாச்சலப் பிரதேசத்தின் அமைதியான சூழலில் அமைந்துள்ள ஜிரோ பள்ளத்தாக்கு, மழைக்குப் பிந்தைய தெளிவான வானத்தையும் புதிய மலைக்காற்றையும் வரவேற்கிறது. இயற்கையை ரசிக்க விரும்புவோருக்கு இது ஒரு அமைதியான புகலிடமாகும்.
கோவா
கூட்டம் அதிகமாக இருக்கும் டிசம்பர் மாதத்திற்கு முன்பாக, குறைந்த செலவில் கோவாவை சுற்றிப் பார்க்க இதுவே சரியான தருணமாகும். மழைக்கு பிந்தைய பசுமையான சூழல், அமைதியான கடற்கரைகள் மற்றும் குறைவான சுற்றுலாப் பயணிகளின் கூட்டம் ஆகியவை இந்த காலத்தில் கோவாவிற்கு கூடுதல் சிறப்பைத் தருகின்றன.
