இருதரப்பு வர்த்தகத்தை இரட்டிப்பாக்கும் ஒரு லட்சிய இலக்கு – ஸ்வீடன் பயணம் குறித்து பதிவிட்ட பிரதமர் மோடி

பிரதமர் நரேந்திர மோடி தற்போது ஐக்கிய அரபு அமீரகம், நெதர்லாந்து, ஸ்வீடன், நார்வே மற்றும் இத்தாலி உள்ளிட்ட ஐந்து நாடுகளுக்கு சுற்றுப்பயணம் மேற்கொண்டுள்ளார். ஐக்கிய அரபு அமீரகம் மற்றும் நெதர்லாந்துக்குச் சென்ற பிறகு, பிரதமர் மோடி ஸ்வீடனுக்குப் பயணம் மேற்கொண்டார். அதனைத் தொடர்ந்து அவர் நார்வேக்கும், இறுதியாக இத்தாலிக்கும் பயணம் செய்ய உள்ளார். இந்நிலையில் ஸ்வீடன் பயணம் குறித்து பிரதமர் மோடி ட்விட்டரில் பதிவிட்டுள்ளார். அதில்,

எனது ஸ்வீடன் பயணம், இந்தியா-ஸ்வீடன் உறவுகளுக்குப் புதிய உத்வேகம் அளிக்கும் பல முக்கிய விளைவுகளைக் கொண்டிருந்தது. நமது உறவுகளை ஒரு உத்திசார் கூட்டாண்மை நிலைக்கு உயர்த்துவது, கூட்டுப் புத்தாக்கக் கூட்டாண்மை 2.0 மற்றும் இந்தியா-ஸ்வீடன் தொழில்நுட்பம் மற்றும் செயற்கை நுண்ணறிவு வழித்தடத்தைத் தொடங்குவது, அடுத்த ஐந்தாண்டுகளில் இருதரப்பு வர்த்தகத்தை இரட்டிப்பாக்கும் ஒரு லட்சிய இலக்கை நிர்ணயிப்பது என, இந்தக் கலந்துரையாடல்கள் மிகவும் பயனுள்ளதாக அமைந்தன. ஸ்வீடன் மக்களுக்கும், ஸ்வீடன் அரசாங்கத்திற்கும், பிரதமர் உல்ஃப் கிரிஸ்டர்சனுக்கும் அவர்களின் அன்பான உபசரிப்புக்கும் நட்புறவுக்கும் எனது நன்றியைத் தெரிவித்துக் கொள்கிறேன் எனக் குறிப்பிட்டுள்ளார்.

பிரதமர் பதிவு

My visit to Sweden was marked by several important outcomes that will add new momentum to India-Sweden relations.

From elevating our ties to a Strategic Partnership, launching the Joint Innovation Partnership 2.0 and the India-Sweden Technology and Artificial Intelligence… pic.twitter.com/KhzfaXbSey

— Narendra Modi (@narendramodi) May 18, 2026

ஸ்வீடன் பயணம்

ஸ்வீடன் பயணத்தை முடித்த பிறகு, பிரதமர் மோடி இன்று நார்வே புறப்படுகிறார். பிரதமர் ஐந்து நாடுகளுக்கான சுற்றுப்பயணத்தில் உள்ளார். ஸ்வீடனின் கோதென்பர்க்கில் வோல்வோ நிறுவனம் ஏற்பாடு செய்திருந்த “ஐரோப்பிய தலைமைச் செயல் அதிகாரிகள் வட்டமேசை மாநாட்டில்” உரையாற்றிய பிரதமர் மோடி, இந்தியாவுக்கும் ஐரோப்பாவுக்கும் இடையே ஒரு வலுவான கூட்டாண்மைக்கு அழைப்பு விடுத்தார். உலகளாவிய நிச்சயமற்ற தன்மை மற்றும் விநியோகச் சங்கிலிகள் மீதான அழுத்தம் நிறைந்த இக்காலகட்டத்தில், இவ்விரு நாடுகளும் இணைந்து ஸ்திரத்தன்மை, நீடித்த நிலைத்தன்மை மற்றும் பகிரப்பட்ட செழிப்பு ஆகியவற்றின் வலுவான தூண்களாக மாற முடியும் என்று அவர் வலியுறுத்தினார்.

இன்று நாம் பல சவால்களை எதிர்கொள்கிறோம்: பிரதமர் மோடி

அவர் மேலும் கூறுகையில், “இன்று, உலகில் மூன்றாவது பெரிய ஸ்டார்ட்அப் சூழலமைப்பை இந்தியா கொண்டுள்ளது. நமது ஸ்டார்ட்அப்கள் செயற்கை நுண்ணறிவு, நிதித் தொழில்நுட்பம், விண்வெளி, ட்ரோன்கள் மற்றும் போக்குவரத்து ஆகிய துறைகளில் உலகிற்கான தீர்வுகளை உருவாக்கி வருகின்றன. இன்றைய உலகம் நிச்சயமற்ற தன்மையால் நிறைந்துள்ளது; விநியோகச் சங்கிலிகள் குறிப்பிடத்தக்க அழுத்தத்திற்கு உள்ளாகியுள்ளன, தொழில்நுட்பப் போட்டி தீவிரமடைந்து வருகிறது, மேலும் எரிசக்திப் பாதுகாப்பு மற்றும் பருவநிலை மாற்றம் போன்ற சவால்களை எதிர்கொள்கிறது. இத்தகைய நேரத்தில், இந்தியாவும் ஐரோப்பாவும் இணைந்து ஸ்திரத்தன்மை, நீடித்த நிலைத்தன்மை மற்றும் பகிரப்பட்ட செழிப்பு ஆகியவற்றின் வலுவான தூண்களாக மாற முடியும். இந்த தொலைநோக்குப் பார்வையுடன், இந்தியாவின் வளர்ச்சிப் பயணத்தில் இணையுமாறு உங்கள் அனைவரையும் அழைக்கிறேன்.” என்றார்