தமிழ்நாடு குறியா? சி.பி. ராதாகிருஷ்ணனை தேர்வு செய்தது ஏன்? உண்மையை உடைத்த அமித் ஷா!
India 2025 VP Election : துணை குடியரசுத் தலைவர் பதவிக்கான தேர்தல் செப்டம்பர் 9 ஆம் தேதி நடைபெற உள்ளது. இந்த தேர்தலில் DA கூட்டணி சார்பில் சி.பி. ராதாகிருஷ்ணன் களமிறக்கப்பட்டுள்ளார். தமிழ்நாட்டில் தேர்தல் வருவதே இந்த தேர்வுக்கு காரணம் என கூறப்பட்ட நிலையில் அமித்ஷா விளக்கமளித்துள்ளார்
2025, செப்டம்பர் 9 ஆம் தேதி நாட்டில் துணை குடியரசுத்தலைவர் தேர்தல் நடைபெற உள்ளது. NDA கூட்டணி தமிழ்நாட்டைச் சேர்ந்த சி.பி. ராதாகிருஷ்ணனை களமிறக்கியுள்ளது. NDA தெற்கிலிருந்து ஒரு வேட்பாளரை நிறுத்திய பிறகு, தமிழ்நாட்டு அரசியலில் அதன் அதிகாரத்தை நிலைநாட்ட இந்த முடிவு எடுக்கப்பட்டுள்ளதாக சொல்லப்பட்டது. இது தொடர்பான கேள்விக்கு இப்போது உள்துறை அமைச்சர் அமித் ஷாவும் இதற்கு பதிலளித்துள்ளார். தெற்கிலிருந்து துணை ஜனாதிபதி வேட்பாளர் ஏன் தேர்ந்தெடுக்கப்பட்டார் என்பதை அவர் கூறியுள்ளார். பாஜக இப்போது தமிழ்நாட்டில் காலூன்ற விரும்புவதால், துணை ஜனாதிபதி வேட்பாளரைத் தேர்ந்தெடுத்ததாகக் கூறப்படுகிறது என்று அமித் ஷாவிடம் கேள்வி கேட்கப்பட்டது. இதற்கு பதிலளித்த அமித் ஷா, ”இல்லை, அப்படி இல்லை. நீங்கள் எங்கிருந்தும் ஒரு வேட்பாளரைத் தேர்வுசெய்தால், அதற்கான காரணங்கள் ஊகிக்கப்படுவது வழக்கம் . துணை ஜனாதிபதி வேட்பாளர் தெற்கிலிருந்து வருவது இயல்பானது என்றார்
மேலும் இது குறித்து விரிவாக பேசிய அமித்ஷா, ஏனெனில் ஜனாதிபதி கிழக்கிலிருந்தும், பிரதமர் மேற்கு மற்றும் வடக்கிலிருந்தும் வந்தவர். எனவே அவர் தெற்கிலிருந்து வருவது மிகவும் இயல்பானது. இப்போது அதை அரசியல் கண்ணோட்டத்தில் பார்க்கக்கூடாது. சி.பி. ராதாகிருஷ்ணனின் அரசியல் வாழ்க்கை மிக நீண்டது. அவர் இரண்டு முறை எம்.பி.யாக இருந்துள்ளார், எங்கள் கட்சியின் தலைவராக இருந்துள்ளார், ஜார்க்கண்ட், தெலுங்கானா, புதுச்சேரி மற்றும் மகாராஷ்டிரா மாநிலங்களின் ஆளுநராக இருந்துள்ளார். அவரது வாழ்க்கை தூய்மையானது என்றார்.
அமித்ஷா பேசிய வீடியோ
#WATCH | On opposition linking NDA’s Vice Presidential candidate to Tamil Nadu Assembly elections, Union HM Amit Shah says, “No, it is not like that… It is natural for the Vice Presidential candidate to come from the South because the President was from the East, the Prime… pic.twitter.com/MJ59ubqc87
— ANI (@ANI) August 25, 2025
ஆர்.எஸ்.எஸ் உடனான தொடர்பு
அவர் ஆர்.எஸ்.எஸ் உடன் தொடர்புடையவர் என்பதால் தேர்ந்தெடுக்கப்பட்டார் என்றும் பலர் கூறுகிறார்கள் என்ற கேள்விக்கு பதிலளித்த அமித் ஷா , பலரும் அப்படித்தான். பிரதமர் மோடியும் இப்படித்தான், நானும் இப்படித்தான். எனவே, நாங்கள் ஆர்.எஸ்.எஸ்-ஐச் சேர்ந்தவர்கள் என்பதால் நாடு எங்களைத் தேர்ந்தெடுத்துள்ளது. ஆர்.எஸ்.எஸ் உடன் தொடர்பு கொள்வது ஒரு மைனஸ் பாயிண்டா? இல்லவே இல்லை. அடல் பிஹாரி வாஜ்பாய், லால் கிருஷ்ண அத்வானி ஆகியோரும் ஆர்.எஸ்.எஸ் உடன் தொடர்புடையவர்கள். பிரதமர் மோடியும் இருக்கிறார், நானும் இருக்கிறேன், அதேபோல் சி.பி. ராதாகிருஷ்ணனும் இருக்கிறார் என்றார்.
Also Read : துணை ஜனாதிபதி தேர்தல்.. சி.பி.ராதாகிருஷ்ணன் வேட்புமனு தாக்கல்.. உடனிருந்த பிரதமர் மோடி!
பி.சுதர்சன் ரெட்டி VS ராதாகிருஷ்ணன்
துணை குடியரசுத் தலைவர் பதவிக்கான தேர்தல் செப்டம்பர் 9 ஆம் தேதி நடைபெற உள்ளது. தேசிய ஜனநாயக கூட்டணி சிபி ராதாகிருஷ்ணனை தேர்தலில் நிறுத்தியுள்ள நிலையில், எதிர்க்கட்சிகள் முன்னாள் நீதிபதி பி. சுதர்சன் ரெட்டியை நிறுத்தியுள்ளன. இருவருக்கும் இடையே கடுமையான போட்டி நிலவுகிறது. செப்டம்பர் 9 ஆம் தேதி வாக்குப்பதிவு நடைபெற்று, அதே நாளில் தேர்தல் முடிவுகள் அறிவிக்கப்படும்.
