நிம்மதியான தூக்கத்திற்கு குறட்டை கட்டுப்படுத்தும் டிப்ஸ்

தூங்கும்போது குறட்டை (Snoring) வருவது பலரும் சந்திக்கும் பொதுவான பிரச்சனையாகும். இது சில நேரங்களில் சாதாரணமாக இருந்தாலும், தொடர்ந்து குறட்டை வந்தால் தூக்கத்தின் தரம் பாதிக்கப்படுவதுடன் உடல்நலத்திற்கும் பாதிப்பு ஏற்பட வாய்ப்பு உள்ளது. குறிப்பாக, தினசரி வாழ்க்கையில் சோர்வு மற்றும் கவனக் குறைபாடு போன்ற பிரச்சனைகளையும் இது உருவாக்கக்கூடும். அதனால் குறட்டை ஒரு சாதாரண விஷயமாக எடுத்துக் கொள்ளாமல், அதன் காரணங்களை அறிந்து சரியான முறையில் கட்டுப்படுத்துவது அவசியம் என நிபுணர்கள் வலியுறுத்துகின்றனர்.

குறட்டை ஏற்படும் காரணங்கள் என்ன?

தூங்கும் போது மூக்கு மற்றும் வாயில் காற்று செல்லும் பாதை ஓரளவு தடைப்படும் போது குறட்டை ஏற்படுகிறது. அச்சமயத்தில் தொண்டையில் உள்ள திசுக்கள் அதிர்வதால் குறட்டை சத்தம் வருகிறது என்கின்றனர். மேலும், மூக்கு அடைப்பு, உடல் பருமன், பெரிதாகிய டான்சில்கள், தூங்குவதற்கு முன்பு மதுபானம் அருந்துதல், அதீத சோர்வு, மன அழுத்தம், தவறான தூக்க நிலை மற்றும் சீரற்ற தூக்க சுழற்சி போன்றவை முக்கிய காரணங்களாகக் குறிப்பிடப்படுகின்றன.

குறட்டை மற்றும் ஸ்லீப் அப்னீயா தொடர்பு

சில சமயங்களில் அதிகமாக குறட்டை விடுவது Obstructive Sleep Apnea எனப்படும் தூக்கக் கோளாறின் அறிகுறியாக இருக்கலாம். இந்த நிலை ஏற்பட்டால் தூங்கிக் கொண்டிருக்கும் போது சுவாசம் தற்காலிகமாக நிற்பது போன்ற ஆபத்தான சூழ்நிலைகள் உருவாகலாம். பகலில் அதிக சோர்வு, காலையில் வாய் வறட்சி, தூங்கும்போது உடல் அசைவு மற்றும் சுவாசம் தடைபடும் நிலை போன்ற அறிகுறிகள் இருந்தால் உடனடியாக மருத்துவ ஆலோசனை பெறுவது அவசியம் என மருத்துவர்கள் எச்சரிக்கின்றனர்.

குறட்டை குறைக்க உதவும் எளிய வழிகள்

குறட்டை பிரச்சனையை கட்டுப்படுத்த சில எளிய வாழ்க்கை முறை மாற்றங்கள் உதவுகின்றன. குறிப்பாக, பக்கவாட்டில் படுத்து தூங்குவது குறட்டை குறைக்க உதவும். முதுகில் படுத்தால் சுவாச பாதை தடைபட வாய்ப்பு அதிகரிக்கும். அதேபோல் தலையை சிறிது உயர்த்தி தூங்குவது சுவாசத்தை சீராக்கும். தினமும் போதுமான அளவு தண்ணீர் குடிப்பது உடலை நீரேற்றமாக வைத்துக் கொண்டு குறட்டையை குறைக்க உதவும். மேலும், சுவாச பயிற்சிகள் மேற்கொள்வது தொண்டை தசைகளை வலுப்படுத்தி நல்ல தூக்கத்தையும் உறுதி செய்கிறது. ஒழுங்கையான தூக்க நேரத்தை பின்பற்றுவதும் மிக முக்கியமானதாகும்.

தூங்கும் முன்பு தவிர்க்க வேண்டிய பழக்கங்கள்

தூங்குவதற்கு முன்பு சில பழக்கங்களை தவிர்ப்பது குறட்டை பிரச்சனையை குறைக்க உதவும். குறிப்பாக, காஃபின் பானங்கள் குடிப்பது, ஆல்கஹால் அருந்துவது மற்றும் லேட் நைட் உணவு உட்கொள்வது போன்றவை சுவாச பாதையை பாதித்து குறட்டையை அதிகரிக்கக்கூடும். இந்த பழக்கங்களை தவிர்ப்பதன் மூலம் தூக்கத்தின் தரத்தை மேம்படுத்த முடியும்.