ஒரு நாளுக்கு இரண்டு கிவி பழம் சாப்பிடுவதால் ஏற்படும் மாற்றம் என்ன?

தினசரி இரண்டு கிவி பழம் சாப்பிடுவது குடல் ஆரோக்கியத்திற்கு மிக முக்கியமானதாக கருதப்படுகிறது. கிவி பழத்தில் உள்ள கரையக்கூடிய நார்ச்சத்து (soluble fiber) மற்றும் ப்ரீபயோடிக் (prebiotic) தன்மைகள், குடலில் உள்ள நல்ல பாக்டீரியாக்களுக்கு உணவாக இருந்து அவற்றின் வளர்ச்சியை அதிகரிக்கின்றன. இதனால் ஜீரண முறை சீராக இயங்குகிறது மற்றும் உணவு செரிமானம் எளிதாகிறது. மலச்சிக்கல் பிரச்சினை உள்ளவர்களுக்கு கிவி ஒரு இயற்கையான தீர்வாக செயல்படுகிறது. இது மலத்தை மென்மையாக்கி, சீரான மல வெளியேற்றத்தை ஏற்படுத்துகிறது. சில்லியம் ஹஸ்க் போன்ற நார்ச்சத்து மருந்துகள் வெறும் மலத்தின் அளவை அதிகரிக்க உதவினாலும், கிவி பழம் குடல் பாக்டீரியாக்களின் சமநிலையையும் மேம்படுத்துகிறது. இதனால் குடல் சுகநிலை முழுமையாக மேம்படும்.

இங்கிலாந்தை சேர்ந்த அறுவை சிகிச்சை நிபுணர் ஒருவர் தினசரி கிவி பழம் சாப்பிடுவது குடல் செயல்பாட்டையும் நோய் எதிர்ப்பு சக்தியையும் மேம்படுத்தும் எளிய வழி என்று தெரிவித்துள்ளார். சமூக ஊடகத்தில் வெளியிட்ட காணொளியில் அவர் கூறியதாவது, கிவி பழத்தை வழக்கமாக சாப்பிடுவது சில நார்ச்சத்து மருந்துகளைக் காட்டிலும் சிறப்பாக செயல்படக்கூடும் என்று ஆய்வுகள் கூறுகின்றன. குறிப்பாக காலை நேரத்தில் இதை எடுத்துக்கொள்வது உடலுக்கு பல நன்மைகளை தரும். நார்ச்சத்து மட்டுமல்லாமல், குடலில் உள்ள நல்ல பாக்டீரியாக்களின் வளர்ச்சிக்கும் இது உதவுகிறது. இதனால் ஜீரண முறை சீராக இயங்குகிறது.

ஆய்வுகள் கூறும் உண்மை

மருத்துவர் விளக்குவதாவது, 184 பேரை கொண்டு செய்யப்பட்ட ஒரு கட்டுப்படுத்தப்பட்ட ஆய்வில், தினமும் இரண்டு கிவி பழம் சாப்பிடுபவர்களும் நார்ச்சத்து மருந்தான சில்லியம் ஹஸ்க் எடுத்தவர்களும் ஒப்பிடப்பட்டனர். நான்கு வாரங்களுக்குப் பிறகு, கிவி சாப்பிட்டவர்கள் சீரான மலச்சிக்கல் இயக்கத்தை அனுபவித்தனர். அவர்களுக்கு மலத்தின் அமைப்பும் மேம்பட்டது, அழுத்தம் குறைந்தது, குடல் சுகநிலை உயர்ந்தது. இந்த ஆய்வு மிகவும் வலுவானதாக இருப்பதால், ஐரோப்பிய உணவு பாதுகாப்பு ஆணையமும் கிவி பழத்தின் பயனை ஏற்றுக்கொண்டுள்ளது.

குடல் நலத்திற்கு கிவியின் தனித்தன்மை

கிவி பழம் சில்லியம் ஹஸ்க் விட சிறப்பாக செயல்படுவதற்கான காரணம் அதன் நார்ச்சத்து அமைப்பாகும். இதில் கரையக்கூடிய மற்றும் ப்ரீபயோடிக் நார்ச்சத்துகள் அதிகமாக உள்ளன. இவை குடலில் உள்ள நல்ல பாக்டீரியாக்களை ஊட்டம் அளித்து வளர்க்கின்றன. இதனால் குடல் நலன் மட்டுமல்லாமல், மைக்ரோபையோம் சமநிலையும் பாதுகாக்கப்படுகிறது. வெறும் அளவு அதிகரிப்பதல்ல, குடல் சூழல் ஆரோக்கியமாக இருப்பதுதான் முக்கியம் என்பதையும் இது எடுத்துக்காட்டுகிறது.

நோய் எதிர்ப்பு சக்திக்கு உதவும் கிவி

கிவி பழத்தில் வைட்டமின் C, கரோட்டினாய்டுகள், பாலிஃபெனால்கள் மற்றும் நார்ச்சத்துகள் அதிகம் உள்ளன. இவை அனைத்தும் சேர்ந்து நோய் எதிர்ப்பு சக்தியை வலுப்படுத்துகின்றன. குறிப்பாக வயதானவர்களில், தினமும் இரண்டு கிவி பழம் சாப்பிடுவது சளி, தொண்டை வலி போன்ற மேல் சுவாச நோய்களின் தீவிரத்தையும் காலத்தையும் குறைக்க உதவுகிறது. நோய் வருவதை முழுமையாகத் தடுக்கவில்லை என்றாலும், அறிகுறிகளை குறைத்து விரைவில் குணமாக உதவுகிறது.