அதிமுக எம்.எல்.ஏக்கள் 3 பேர் ராஜினாமா.. ஆதவ் அர்ஜுனாவை சந்தித்து த.வெ.கவில் இணைந்தனர்..

மரகதம் குமரவேல் தலைமையில், பெருந்துறை எம்.எல்.ஏ. ஜெயக்குமார், தாராபுரம் எம்.எல்.ஏ. சத்தியபாமா ஆகிய மூவரும் ராஜினாமா செய்துள்ளனர். தலைமைச் செயலகத்தில் சபாநாயகர் ஜே.சி.பி. பிரபாகரனை சந்தித்த மூன்று அதிமுக எம்.எல்.ஏ.க்களும் தங்களது ராஜினாமா கடிதத்தை வழங்கியுள்ளனர்.

இந்த நிலையில், அவர்கள் மூவரும் தமிழக வெற்றிக்கழகத்தில் இணைய உள்ளதாக தகவல்கள் வெளியாகியுள்ளன. மூவரும் ராஜினாமா செய்த கையோடு அமைச்சர் ஆதவ் அர்ஜுனாவை நேரில் சந்தித்தனர்.

அதிமுக உட்கட்சி விவகாரம்:

அதிமுகவைப் பொறுத்தவரையில், இரண்டு அணிகளாக பிரிந்து செயல்பட்டு வருகிறது. இந்த சூழலில், எஸ்.பி. வேலுமணி, சி.வி. சண்முகம் அடங்கிய அதிமுக அணி மீண்டும் எடப்பாடி பழனிசாமியுடன் இணைய பேச்சுவார்த்தை நடைபெற்று வருவதாக தகவல்கள் வெளியாகியுள்ளன. பல்வேறு கருத்து வேறுபாடுகளுக்கு மத்தியில் ஒரு பக்கம் பேச்சுவார்த்தைகளும் நடைபெற்று வரும் சூழலில், தற்போது அதிமுகவிலிருந்து மூன்று எம்.எல்.ஏ.க்கள் ராஜினாமா செய்துள்ளனர்.

இதனால், அதிமுக எம்.எல்.ஏ.க்களின் எண்ணிக்கை 44 ஆக குறைந்துள்ளது. இரண்டு அணிகளும் மீண்டும் ஒன்றிணைய வாய்ப்புள்ளதாக தெரிவிக்கப்பட்டுள்ள சூழலில், இந்த ராஜினாமா முக்கியத்துவம் பெற்றுள்ளதாக கூறப்படுகிறது.

ஒரே குடும்பமாக செயல்படுவோம் – அமைச்சர் ஆதவ் அர்ஜுனா:

ராஜினாமா செய்த கையோடு மூன்று பேரும் அமைச்சர் ஆதவ் அர்ஜுனாவை நேரில் சந்தித்தனர். அப்போது, அவர் மூன்று பேரையும் பொன்னாடை போர்த்தி வரவேற்றார்.

“தமிழக வெற்றிக்கழகம் ஆட்சி அமைத்த 15 நாளில், மறைந்த முன்னாள் முதல்வர் ஜெயலலிதாவின் ஆட்சியைப் பார்க்கிறோம்” என அமைச்சர் ஆதவ் அர்ஜுனாவிடம் சத்தியபாமா நெகிழ்ச்சியாக பேசியிருந்தார்.

மேலும் படிக்க: சுட்டெரிக்கும் சூரியன்.. சதம் அடிக்கும் வெயில் ஒரு பக்கம்.. கொட்டும் மழை ஒரு பக்கம்.. வானிலை ரிப்போர்ட்..

அதனைத் தொடர்ந்து, “முதல்வர் விஜயை நம்பி வந்திருக்கிறீர்கள். இனி நல்லதே நடக்கும். நாம் இனி ஒரே குடும்பமாக பயணிப்போம்” என அமைச்சர் ஆதவ் அர்ஜுனாவும் உறுதி அளித்திருந்தார்.

ராஜினாமா செய்த மூன்று பேரும் இன்னும் சற்று நேரத்தில் முதல்வர் விஜயை நேரில் சந்திக்க உள்ளதாகவும் தகவல் வெளியாகியுள்ளது. அதிமுகவிலிருந்து மூன்று எம்.எல்.ஏ.க்கள் ராஜினாமா செய்து தமிழக வெற்றிக்கழகத்தில் இணைந்திருப்பது அரசியலில் பரபரப்பை ஏற்படுத்தியுள்ளது.